പ്രാണവേദന വീണവായന...പ്രവാസികള്ക്ക് എയര് ഇന്ത്യയുടെ മുട്ടന് പണി; ദുബായില് നിന്നെത്തിയ നാല്പ്പതോളം പേരുടെ ലഗേജ് രണ്ടു ദിവസമായിട്ടും കിട്ടിയില്ല
എല്ലാ ദുരിതങ്ങളും താണ്ടിയാണ് പ്രിയപ്പെട്ടവര്ക്കൊപ്പം ഓണം ആഘോഷിക്കാന് പ്രവാസികള് എത്തുന്നത്. അതിനിടയിലാണ് അവര്ക്ക് ഇത്തരം ദുരിത പര്വ്വം. ദുബായില് നിന്നു തിരുവനന്തപുരത്തെത്തിയ നാല്പ്പതോളം പേരുടെ സാധനങ്ങള് രണ്ടുദിവസമായി ദുബായില് തന്നെയാണ്.
രണ്ടുദിവസം മുമ്പാണ് ദുബായില് നിന്ന് എയര് ഇന്ത്യ എക്സ്പ്രസ് വിമാനത്തില് 350ഓളം യാത്രക്കാര് തിരുവനന്തപുരത്ത് എത്തിയത്. സെപ്റ്റംബര് പത്തിനു യാത്ര പുറപ്പെട്ട അവര് പുലര്ച്ചെ മൂന്നോടെ തിരുവനന്തപുരം വിമാനത്താവളത്തില് എത്തുകയും ചെയ്തു.
കൃത്യമായി എത്തിച്ച എയര് ഇന്ത്യക്കു നന്ദി പറഞ്ഞ് ലഗേജിനായി കാത്തിരിക്കുമ്പോഴാണ് അറിയുന്നത് നാല്പ്പതോളം പേരുടെ ലഗേജ് എത്തിയില്ല എന്ന്. വിമാനത്തില് അധിക ഭാരമായതിനാലാണു നാല്പ്പതു പേരുടെ ലഗേജ് കയറ്റാത്തത് എന്നാണ് അധികൃതര് നല്കുന്ന വിശദീകരണം. തുടര്ന്ന് രണ്ടു മണിക്കൂറോളം വിമാനത്താവളത്തില് ഇരുന്ന് യാത്രക്കാര് വിവിധ ഫോമുകള് പൂരിപ്പിച്ചു കൊടുക്കുകയും ചെയ്തു.
ലഗേജ് എത്തിച്ചാല് വിമാനക്കമ്പനി അധികൃതര് യാത്രക്കാര് നല്കിയിരിക്കുന്ന നമ്പരില് വിളിച്ച് അറിയിക്കാറു പതിവാണ്. എന്നാല്, രണ്ടു ദിവസമായിട്ടും അധികൃതരുടെ ഭാഗത്തു നിന്ന് ഒരു വിവരവുമുണ്ടായിട്ടില്ലെന്നു കോഴഞ്ചേരി സ്വദേശി ജിനു തോമസ് പറയുന്നു. വിലകൂടിയ അവശ്യമരുന്നുകള് ഉള്പ്പെടെയുള്ള സാധനങ്ങളാണ് ഇത്തരത്തില് ദുബായില് തന്നെ കുടുങ്ങിക്കിടക്കുന്നതെന്നും ജിനു പറയുന്നു.
തങ്ങളുടെ സാധനങ്ങള് അധികൃതര് നഷ്ടപ്പെടുത്തിയോ എന്നു പോലും സംശയിക്കുന്നതായാണു യാത്രക്കാര് പറയുന്നത്. എന്തായാലും എയര് ഇന്ത്യയുടെ 'ഓണം ബമ്പറി'ല് ലഗേജ് നഷ്ടമായ യാത്രക്കാരെല്ലാം ചേര്ന്ന് തുടര്നടപടികള് സ്വീകരിക്കാന് ഒരുങ്ങുകയാണിപ്പോള്.
അതിനിടെ, ഒമാന് എയറിലും സമാന സംഭവമുണ്ടായതായി യാത്രക്കാര് പരാതിപ്പെട്ടു. കോഴിക്കോടു വിമാനത്താവളത്തില് ഇറങ്ങിയ 171 യാത്രക്കാരില് 30 പേരുടെ ലഗേജ് മാത്രം നല്കിയാണ് ഒമാന് എയര് യാത്രക്കാരെ വലച്ചത്. അടുത്ത ദിവസം എത്തിയാല് ലഗേജുകള് നല്കാമെന്ന ഒഴുക്കന് മറുപടിയാണ് അധികൃതര് നല്കിയതെന്നും പരാതി ഉയര്ന്നിട്ടുണ്ട്.
https://www.facebook.com/Malayalivartha