പ്രവാസി മലയാളി വനിതയെ കബളിപ്പിച്ച കേസില്‍ സന്തോഷ് മാധവനെതിരെ സമര്‍പ്പിച്ച ക്രൈംബ്രാഞ്ചിന്റെ കുറ്റപത്രം ഞെട്ടിക്കുന്നത്. ദുബായില്‍ ബിസിനസ് ചെയ്യുന്ന തിരുവനന്തപുരം പട്ടം സ്വദേശിനി സെറാഫിന്‍ എഡ്വിന്റെ 50 ലക്ഷം രൂപ (നാലു ലക്ഷം ദിര്‍ഹം) തട്ടിയെടുത്ത കേസിലാണു കുറ്റപത്രം സമര്‍പ്പിച്ചത്. ഹോട്ടല്‍ ബിസിനസില്‍ പങ്കാളിയാക്കി ലാഭം വാഗ്ദാനം ചെയ്തായിരുന്നു തട്ടിപ്പ്.

സന്തോഷ് മാധവനു പുറമേ ഇയാളുടെ കൂട്ടാളി ദുബായിലെ ഡ്രൈവര്‍ തിരുവനന്തപുരം കിളിമാനൂര്‍ പഴയകുന്നേല്‍ തോപ്പില്‍ സെയ്ഫുദ്ദീനും കേസിലെ പ്രതിയാണ്. ജ്യോത്സ്യനെന്ന നിലയിലെ ഇടപെടലിലൂടെയായിരുന്നു പണം തട്ടിയെടുത്തത്. മുഖലക്ഷണം നോക്കി ഇപ്പോള്‍ ബിസിനസിനു പറ്റിയ സമയമാണെന്നു സെറാഫിനെ തെറ്റിദ്ധരിപ്പിച്ച സന്തോഷ് മാധവന്‍, ദുബായിലെ ധേരയില്‍ അടഞ്ഞുകിടക്കുന്ന 'ഫോര്‍ച്യുണ്‍' ഹോട്ടല്‍ വാങ്ങി ബിസിനസ് നടത്തിയാല്‍ മികച്ച ലാഭമുണ്ടാവുമെന്നു പ്രവചിച്ചു. യഥാര്‍ത്ഥത്തില്‍ ബന്ധുവിന്റെ കടം തീര്‍ക്കാനുള്ള തന്ത്രമായിരുന്നു ഇത്.

ഹോട്ടല്‍ ബിസിനസിനു കരാര്‍ ഉണ്ടാക്കിയ ശേഷം 2002 ഡിസംബര്‍ ഒന്നിനും 2003 ജനുവരി നാലിനും 50,000 ദിര്‍ഹം വീതവും 2003 ജനുവരി ഏഴിന് 2.5 ലക്ഷം ദിര്‍ഹവും പിന്നീടു ഹോട്ടലിലെ വൈദ്യുതി, വെള്ളം എന്നിവയുടെ കുടിശിക തീര്‍ക്കാനെന്ന പേരില്‍ 50,000 ദിര്‍ഹവുമടക്കം നാലു ലക്ഷം ദിര്‍ഹമാണു പരാതിക്കാരി പ്രതികള്‍ക്കു നല്‍കിയത്.

2002 2003 കാലഘട്ടത്തിലാണ് ഒന്നും രണ്ടും പ്രതികളായ സന്തോഷ് മാധവനും സെയ്ഫുദ്ദീനും ചേര്‍ന്ന് ഗൂഢാലോചന നടത്തി പലപ്പോഴായി വന്‍ തുക തട്ടിയെടുത്തത്. കരാര്‍ മടക്കിവാങ്ങിയ പ്രതികള്‍ പണവുമായി ദുബൈയില്‍നിന്ന് രക്ഷപ്പെട്ടു. കേരളത്തിലെത്തിയ സന്തോഷ് മാധവന്‍ ഈ തുക ഉപയോഗിച്ച് ഫഌറ്റുകളും സ്ഥലവും വാങ്ങിക്കൂട്ടി. സെറാഫിന്‍ നല്‍കിയ പരാതിയിലാണ് സന്തോഷ് മാധവന്‍ ആദ്യമായി പിടിയിലാകുന്നത്.