പ്രവാസി ഭാരതീയ സമ്മേളനത്തില് ഗള്ഫിന്റെ ശബ്ദം ഉയരില്ല
സ്വദേശിവത്കരണത്തിന്റെയും തൊഴില് നഷ്ടപ്പെടലിന്റെയും ഭീതി ഗള്ഫ് രാജ്യങ്ങളില് വ്യാപകമായ സാഹചര്യത്തില് ഇക്കുറി ദേശീയ പ്രവാസി സംഗമത്തില് ഗള്ഫിന്റെ ശബ്ദം ഉയരില്ല. പ്രവാസി ഇന്ത്യക്കാര്ക്കായി പ്രത്യേക സമ്മേളനങ്ങളില്ലെന്നുളളതാണ് ഇതിനു കാരണം. കഴിഞ്ഞ സമ്മേളനങ്ങളിലെല്ലാം ഗള്ഫിന് പ്രത്യേക സെമിനാറുകള് നടത്തിയിരുന്നു. ഗള്ഫിലെ പ്രശ്നങ്ങള് കേന്ദ്രമന്ത്രിമാരുടെയും മുഖ്യമന്ത്രിമാരുടെയും മുന്നില് അവതരിപ്പിക്കാനുള്ള അവസരമായാണ് പ്രവാസി മലയാളികള് ഇത് ഉപയോഗപ്പെടുത്തിയിരുന്നത്. ഇത്തരത്തില് പ്രശ്നങ്ങള് അവതരിക്കപ്പെട്ടിരുന്നതിനാല് സമ്മേളനത്തിനു മുമ്പ് തന്നെ പ്രശ്നങ്ങള് പരിഹരിക്കുന്നതിന് ഗള്ഫിലെ ഇന്ത്യന് നയതന്ത്ര കാര്യാലയങ്ങള് ശുഷ്കാന്തി പ്രകടിപ്പിച്ചിരുന്നു. ഇക്കുറി വിദേശത്തെ ഇന്ത്യന് വിദ്യാര്ഥികളുടെ പ്രശ്നങ്ങള്, പുതുതായി വരുന്ന സ്റ്റര്ട്ടപ് സംരംഭങ്ങളുടെ പ്രാധാന്യം, വിനോദസഞ്ചാര വികസനത്തില് പ്രവാസികളുടെ പങ്ക്, ഇന്ത്യന് പ്രവാസി സംഘടനകള് ഉപയോഗപ്പെടുത്തി വിദേശത്ത് ഇന്ത്യയുടെ പ്രതിഛായ മെച്ചപ്പെടുത്തല് തുടങ്ങിയവയൊക്കെ ചര്ച്ചചെയ്യുന്നുണ്ടെങ്കിലും ഗള്ഫിലെ പ്രവാസിക്കായി പ്രത്യേക സെഷനുകളില്ല. പകരം, എമിഗ്രേഷന് ക്ളിയറന്സ് ആവശ്യമുള്ള രാജ്യങ്ങളിലെ ഇന്ത്യന് തൊഴിലാളികളെ പിന്തുണക്കുന്നത് സംബന്ധിച്ച് തിങ്കളാഴ്ച രാവിലെ 10.15 മുതല് 11മണിവരെ മുക്കാല് മണിക്കൂര് നീളുന്ന സെഷനാണ് ഉള്പ്പെടുത്തിയിരിക്കുന്നത്. ഈ സെഷനില് ഖത്തര്, ബഹ്റൈന്, ഒമാന്, യു.എ.ഇ, മലേഷ്യ, അമേരിക്ക തുടങ്ങിയ രാജ്യങ്ങളില്നിന്നുള്ള പ്രവാസി സംഘടന പ്രതിനിധികളും വിദേശകാര്യ മന്ത്രലായത്തിലെ ഉദ്യോഗസ്ഥരുടക്കം 14 പേര് സംസാരിക്കാനായി ഷെഡ്യൂള് തയാറാക്കിയിട്ടുണ്ട്. ഇന്ത്യയില് നടപ്പാക്കിയ നോട്ട് പ്രതിസന്ധിയിലുള്ള പ്രവാസികളുടെ ആശങ്ക സമ്മേളനത്തില് ചര്ച്ചയാകുമെന്ന് സൂചനയുണ്ട്. സമ്മേളനം ഉദ്ഘാടനം ചെയ്യുന്ന പ്രധാനമന്ത്രി നരേന്ദ്ര മോദി ഇതുസംബന്ധിച്ച് പ്രസ്താവന നടത്താനും സാധ്യതയുണ്ട്.
https://www.facebook.com/Malayalivartha