ഫെബ്രുവരി അഞ്ച് കാര് രഹിത ദിനം
പരിസ്ഥിതി സംരക്ഷിക്കുന്നതിനും പൊതുഗതാഗത സൗകര്യങ്ങള് സാര്വത്രികമാക്കുന്നതിനും വേണ്ടിയുളള ശ്രമത്തിന്റെ ഭാഗമായി ദുബൈയില് ഫെബ്രുവരി അഞ്ചിന് കാര് രഹിതദിനം ആചരിക്കുന്നു. 2010 മുതല് നഗരസഭ കാര് രഹിത ദിനം ആചരിച്ചുവരുന്നുണ്ട്. ഓരോ തവണയും പിന്തുണ ഏറിവരുന്നതായാണ് കാണുന്നത്. പോയ വര്ഷം ദുബൈ കിരീടാവകാശിയും ദുബൈ എക്സിക്യൂട്ടീവ് കൗണ്സില് ചെയര്മാനുമായ ശൈഖ് ഹംദാന് ബിന് മുഹമ്മദ് ബിന് റാശിദ് ആല് മക്തൂം സൈക്കിളിലാണ് അന്നേ ദിവസം യാത്ര ചെയ്തത്.
ദുബൈ നഗരസഭയുടെ ആഭിമുഖ്യത്തില് നടത്തുന്ന ഈ പരിസ്ഥിതി സൗഹാര്ദ ബോധവത്കരണ യജ്ഞത്തിന് പ്രമുഖ സ്ഥാപന മേധാവികള് ഇതിനകം പിന്തുണ അറിയിച്ചതായി ഡയറക്ടര് ജനറല് ഹുസൈന് നാസര് ലൂത്ത വാര്ത്താ സമ്മേളനത്തില് വ്യക്തമാക്കി. 1500 ലേറെ സര്ക്കാര് സ്വകാര്യ സ്ഥാപനങ്ങളിലെ ഉദ്യോഗസ്ഥരും ജീവനക്കാരും ഫെബ്രുവരി അഞ്ചിന് സ്വകാര്യവാഹനങ്ങള് ഒഴിവാക്കി പൊതുഗതാഗത സംവിധാനങ്ങളെ ആശ്രയിച്ച് യാത്ര ചെയ്യും. നഗരത്തിലെ താമസക്കാരും ഈ ഉദ്യമത്തില് സഹകരിക്കും. പ്രകൃതിയോടുള്ള സാമൂഹിക ഉത്തരവാദിത്വം നിറവേറ്റാനും ആരോഗ്യപൂര്ണമായ ജീവിതരീതി പിന്പറ്റാനുമുള്ള മികച്ച ശ്രമമാണ് കാര് രഹിത ദിനാചരണമെന്ന് താമസവിദേശകാര്യ ഡയറക്ടറേറ്റ് ഡി.ജി മേജര് ജനറല് മുഹമ്മദ് അഹ്മദ് അല് മാരി പറഞ്ഞു. ഗുരുതരമായ ആഗോള താപനത്തിനും കാലാവസ്ഥാ മാറ്റത്തിനും വഴിവെക്കുന്ന ഇത്തരം മലിനീകരണത്തിനെതിരായ ബോധവത്കരണവും ബദല്, പരിസ്ഥിതി സൗഹൃദ യാത്രാ മാര്ഗങ്ങളുടെയും ആശയങ്ങളുടെയൂം പ്രചാരണവും ലക്ഷ്യമിട്ട് പ്രദര്ശനവും നഗരസഭ സംഘടിപ്പിക്കും. കാര്രഹിത ദിനത്തില് പങ്കുചേരുന്ന വ്യക്തികള്ക്കും സ്ഥാപനങ്ങള്ക്കും ദുബൈ നഗരസഭയുടെ WWW.dm.gov.ac എന്ന വെബ്സൈറ്റില് രജിസ്റ്റര് ചെയ്യാം.
https://www.facebook.com/Malayalivartha