2.2 ലക്ഷം സ്വദേശികള്ക്ക് തൊഴില് നല്കുമെന്ന് സൗദി തൊഴില് മന്ത്രാലയം
സൗദിയില് യുവാക്കളുടെയും യുവതികളുടെയും തൊഴിലില്ലായ്മ നിരക്ക് കുറയ്ക്കുന്നതിന് ഊര്ജ്ജിത പരിപാടി നടപ്പാക്കുമെന്ന് തൊഴില് മന്ത്രി ഡോ. അലി അല് ഗഫീസ് പറഞ്ഞു. വിദേശ തൊഴിലാളികളെ നിയമിക്കുന്നതിനുപകരം വര്ഷത്തില് 2.2 ലക്ഷം സ്വദേശികളെ തൊഴില് വിപണിയില് നിയമിക്കാനാണ് സൗദി തൊഴില് മന്ത്രാലയം പദ്ധതിയിടുന്നത്. സൗദി ചേംബര് കൗണ്സില് സംഘടിപ്പിച്ച തൊഴില് വിപണി സമിതിയുടെ യോഗത്തില് പങ്കെടുത്ത് സംസാരിക്കുവേ സൗദി വിഷന് 2030 ന്റെയും ദേശീയ പരിവര്ത്തന പദ്ധതി 2020 ന്റെയും ഭാഗമായി നടപ്പാക്കുന്ന ഊര്ജിത സ്വദേശിവത്കരണത്തിലൂടെയാണ് ലക്ഷ്യം നേടുക എന്നും തൊഴില് മന്ത്രി പറഞ്ഞു.
യുവാക്കളുടെ സാമ്പത്തികവും സാമൂഹികവുമായ വളര്ച്ച ലക്ഷ്യമാക്കി ആരംഭിക്കുന്ന പദ്ധതി വിവിധ മേഖലകളില് വ്യത്യസ്തമായ രീതിയിലാണ് നടപ്പാക്കുക. ഏതാനും തൊഴിലുകളില് സ്വദേശികള്ക്ക് സംവരണം ഏര്പ്പെടുത്തുക, പ്രത്യേക മേഖലകളിലെ ചില ജോലികള് സ്വദേശികള്ക്ക് മാത്രമായി പരിമിതപ്പെടുത്തുക എന്നതും പദ്ധതിയുടെ ഭാഗമായി നടപ്പാക്കുമെന്ന് തൊഴില് മന്ത്രി പറഞ്ഞു. സ്വദേശി യുവാക്കള്ക്കുള്ള തൊഴില് പരിശീലനം, സ്വദേശികളെ റിക്രൂട്ട് ചെയ്യാനുള്ള വെബ് പോര്ട്ടല് എന്നിവ ഇതിന് ഉപകരിക്കും. സ്വകാര്യമേഖലയില് സ്വദേശി തൊഴിലാളികള്ക്ക് തൊഴില് ഉറപ്പുവരുത്താനാണ് മന്ത്രാലയം ലക്ഷ്യമിടുന്നത്.
https://www.facebook.com/Malayalivartha
