ഒമാനില്‍ മലയാളി സ്ത്രീ തട്ടിപ്പിന് ഇരയായി
ലോട്ടറി തട്ടിപ്പിന് ഇരയാകുന്ന മലയാളികളുടെ എണ്ണം കൂടിവരുന്നു. മുന്നറിയിപ്പുകള്‍ നല്‍കിയിട്ടും ടെലിഫോണ്‍വഴിയുളള ലോട്ടറി തട്ടിപ്പിന് ഇരയായത് കൊല്ലം സ്വദേശിനിയായ ക്‌ളീനിങ് ജീവനക്കാരിയാണ്. 500 റിയാലാണ് ഇവര്‍ക്ക് നഷ്ടമായത്. കഴിഞ്ഞ 25 വര്‍ഷമായി ഒമാനില്‍ ക്‌ളീനിങ് ജോലി ചെയ്യ്കയാണിവര്‍. ആദ്യമായിട്ടാണ് ഇങ്ങനൊരു തട്ടിപ്പിന് ഇരയായത് എന്നാണ് ഇവര്‍ പറയുന്നത്.
ഒമാന്‍ടെലില്‍നിന്നാണെന്ന് പരിചയപ്പെടുത്തികൊണ്ട് കഴിഞ്ഞ ഞായറാഴ്ച ഉച്ചക്ക് 11 മണിയോടെയാണ് ഇവര്‍ക്ക് ഫോണ്‍ വന്നത്. അറബി അറിയില്ല എന്ന് പറഞ്ഞതിനാല്‍ ഇംഗ്ലീഷിലാണ് ഫോണില്‍ സംസാരിച്ചത്. സംശയത്തിന് ഇടനല്‍കാതെ അവരുടെ പേരി വിളിച്ചാണ് സംസാരിച്ചത്. 20,000 റിയാല്‍ ലോട്ടറി അടിച്ചിരിക്കുകയാണെന്നും പണം ലഭിക്കണമെങ്കില്‍ ബാങ്ക അക്കൗണ്ട് നല്‍കണമെന്നും അവശ്യപ്പെട്ടു. ഇതേതുടര്‍ന്ന് എച്ച്.എസ്.ബി.സി ബാങ്കിലെ സ്വന്തം അക്കൗണ്ട് നമ്പര്‍ നല്‍കി. എന്നാല്‍, താങ്കളുടെ അക്കൗണ്ടില്‍ മതിയായ പണമില്ലെന്നും മിനിമം ബാലന്‍സില്ലാതെ പണം കൈമാറാന്‍ കഴിയില്ലെന്നും തട്ടിപ്പുകാര്‍ പറഞ്ഞു
500 റിയാലെങ്കിലും ബാലന്‍സ് വേണമെന്നും അതിനാല്‍ ഉടന്‍ അത്രയും പണം ബാങ്ക് മസ്‌കത്തിന്റെ അക്കൗണ്ട് നമ്പര്‍ നല്‍കി അതിലിടാന്‍ നിര്‍ദേശിച്ചു. 240 റിയാല്‍ മാത്രമാണ് ഉള്ളതെന്ന് പറഞ്ഞപ്പോള്‍ അത് അക്കൗണ്ടിലിടാന്‍ പറഞ്ഞു. ഇത് ചെയ്ത ശേഷവും പ്രൈസ് മണി ട്രാന്‍സ്ഫറാക്കാന്‍ കഴിയാതെ ബുദ്ധിമുട്ടുകയാണെന്നും അതിനാല്‍ 250 റിയാല്‍ കൂടി ആരില്‍നിന്നെങ്കിലും കടം വാങ്ങിയാണെങ്കിലും ഉടന്‍ നിക്ഷേപിക്കണമെന്നും വീണ്ടും വീണ്ടും ആവശ്യപ്പെട്ടു. അതോടെ, ഒരു സുഹൃത്തില്‍ നിന്ന് 260 റിയാല്‍ കൂടി കടം വാങ്ങി അക്കൗണ്ടില്‍ നിക്ഷേപിച്ചു.
ലോട്ടറി നല്‍കുന്നത് നാലു കമ്പനികളാണെന്നും സൗദി മൊബൈല്‍ കമ്പനിയുടെ തുക കൂടി കിട്ടണമെങ്കില്‍ 150 റിയാല്‍ കൂടി ഇടണമെന്നുമായിരുന്നു അടുത്ത ആവശ്യം. അപ്പോള്‍ എനിക്ക് ലോട്ടറി വേണ്ടെന്നും പൊലീസില്‍ പരാതി നല്‍കുമെന്നും പറഞ്ഞപ്പോള്‍ ഉടന്‍ ബാങ്കില്‍ പോവാനും പണം അക്കൗണ്ടില്‍ എത്തുമെന്നും പറഞ്ഞു. അങ്ങനെ ബാങ്കില്‍ പോയി മണിക്കൂറുകള്‍ കാത്തിരുന്നെങ്കിലും പണം വന്നില്ല. ഏറെ കഴിഞ്ഞശേഷം വീണ്ടും വിളിച്ച് 10 റിയാലിന്റെ ഉരീദു കാര്‍ഡ് നമ്പര്‍ അയച്ചുതന്നാല്‍ പണം കിട്ടുമെന്ന് പറഞ്ഞതനുസരിച്ച് അതും അയച്ചുകൊടുത്തു. എന്നാല്‍, പിന്നീട് ടെലിഫോണ്‍ ഓഫ് ആവുകയായിരുന്നു. തട്ടിപ്പാണെന്ന് മനസ്സിലായതോടെ പബ്‌ളിക് പ്രോസിക്യുഷന് പരാതി നല്‍കുകയും കോടതിയില്‍ കേസ് ഫയല്‍ ചെയ്യുകയും ചെയ്തു. പോലീസ് കേസ് അന്വേഷിച്ചുവരികയാണ്.
https://www.facebook.com/Malayalivartha
