ബഹ്‌റൈനില്‍ കഴിഞ്ഞ നാലുമാസമായി ശമ്പളം ലഭിക്കാത്ത തൊഴിലാളികള്‍ ദൈനംദിന ചെലവുകള്‍ക്കുപോലും പണമില്ലാതെ നരകിക്കുന്നു. ബഹ്‌റൈനിലെ പ്രശസ്തമായ ഒരു കണ്‍സ്ട്രക്ഷന്‍ കമ്പനിയിലെ തൊഴിലാളികളാണ് ഇത്തരത്തില്‍ നരകയാതന അനുഭവിക്കുന്നത്. കഴിഞ്ഞദിവസം ഈ സ്ഥാപനത്തിലെ 160 തൊഴിലാളികള്‍ തൊഴില്‍മന്ത്രാലയത്തിലേക്ക് പ്രതിഷേധപ്രകടനം നടത്തുകയും മന്ത്രാലയത്തില്‍ പരാതിനല്‍കുകയും ചെയ്തിരുന്നു. മുടങ്ങിപ്പോയ ശമ്പളം എങ്ങനെയെങ്കിലും ലഭ്യമാക്കി നാട്ടിലയ്ക്കണമെന്നാണ് ഈ തൊഴിലാളികളുടെ ആവശ്യം. ഇന്ത്യ, പാകിസ്താന്‍, ബംഗഌദേശ് രാജ്യങ്ങളില്‍നിന്നുള്ള തൊഴിലാളികളാണേറെയും.

കരാറെടുത്ത് നിര്‍മാണം പൂര്‍ത്തിയാക്കിയ നിരവധി പ്രോജക്ടുകളുടെ പണം ഇനിയും ലഭിക്കാനുണ്ടെന്നും അതുമൂലം മാത്രമാണ് ശമ്പളം നല്‍കാനാവാത്തതെന്നുമാണ് കമ്പനി അധികൃതര്‍ പറയുന്നത്. ഇത്തരത്തില്‍ ലക്ഷക്കണക്കിന് ദിനാര്‍ മുടങ്ങികിടക്കുകയാണ്. ഈ തുക പിരിഞ്ഞുകിട്ടുന്ന മുറയ്ക്ക് ശമ്പളം നല്‍കാമെന്നാണ് കമ്പനി അധികൃതര്‍ പറയുന്നത്. ഒരു നേരത്തെ ആഹാരത്തിന് പോലും തൊഴിലാളികള്‍ ബുദ്ധിമുട്ടുന്നതറഞ്ഞ് നിരവധിപേര്‍ സഹായത്തിന് എത്തിയിട്ടുണ്ട്. ബഹ്‌റൈനിലെ പല സ്ഥാപനങ്ങളിലും ശമ്പളം ലഭിക്കാതെ നിരപധി തൊഴിലാളികള്‍ ഇത്തരത്തില്‍ നരകയാതന അനുഭവിക്കുകയാണ്. 

ഏതാനുംമാസങ്ങളായി വിലക്കയറ്റത്തില്‍ നട്ടംതിരിയുകയാണ് ഇന്ത്യക്കാരടക്കമുള്ള പതിനായിരക്കണക്കിന് വിദേശത്തൊഴിലാളികള്‍. നിത്യോപയോഗ സാധനങ്ങള്‍ക്ക് വിലവര്‍ധിച്ചതിനുമേല്‍ ഫഌറ്റുകളുടെ വാടകയും കുതിച്ചുയര്‍ന്നപ്പോള്‍ ഇടത്തരം ശമ്പളം വാങ്ങുന്നവര്‍ പോലും നാട്ടിലേക്കുള്ള തിരിച്ചുപോക്കിനെക്കുറിച്ചാലോചിക്കുകയാണ്. മലയാളികളടക്കമുള്ള നിരവധിപേര്‍ കുടുംബത്തെ നാട്ടിലയക്കുന്നു.ഇടത്തരക്കാരും താഴ്ന്നവരുമാനക്കാരുമാണ് ഏറെ ബുദ്ധിമുട്ടുന്നത്.