2017-ലെ കേരള ബജറ്റിനെ പ്രവാസികള്‍ വളരെ സന്തോഷത്തോടെയാണ് സ്വീകരിച്ചത്. മുഖ്യമന്ത്രിയായശേഷം പിണറായി വിജയന്‍ ദുബായില്‍ നടത്തിയ പ്രസംഗത്തോട് ഏറെക്കുറെ നീതിപുലര്‍ത്തുന്ന ബജറ്റാണ് ധനമന്ത്രി ഡോ. തോമസ് ഐസക് ഇന്നലെ നിയമസഭയില്‍ അവതരിപ്പിച്ചത്. പ്രവാസികള്‍ക്ക് പിണറായി നല്‍കിയ വാക്ക് മാറില്ലെന്ന് അവര്‍ വിശ്വസിക്കുന്നു. സര്‍ക്കാര്‍ നിക്ഷേപങ്ങളില്‍ പ്രവാസികള്‍ക്കു നേരിട്ടു പങ്കാളികളാകാം എന്നതാണ് ഇതില്‍ പ്രധാനം. പ്രവാസി ചിട്ടി എന്ന നൂതന ആശയം സാധാരണക്കാരുടെ ഉള്‍പ്പെടെ നിക്ഷേപങ്ങള്‍ക്കു സുരക്ഷയേകും. 20 ലക്ഷത്തോളം മലയാളികള്‍ യുഎഇയില്‍ ഉണ്ടെന്നാണ് അനൗദ്യോഗിക കണക്കുകള്‍. അതിനാല്‍ ചുരുങ്ങിയത് ഒരുലക്ഷം പേരെയെങ്കിലും ചിട്ടിയില്‍ പങ്കാളികളാക്കാം.

പ്രവാസി ക്ഷേമപെന്‍ഷന്‍ 500 രൂപയില്‍ നിന്നു 2000 ആക്കിയതും പ്രവാസി പുനരധിവാസത്തിനും മറ്റുമായി 18 കോടി രൂപ അനുവദിച്ചതും ആശാവഹമാണെന്ന് ഐബിഎംസി ഗ്രൂപ്പ് എംഡിയും സിഇഒയുമായ പി.കെ.സജിത്കുമാര്‍ പറഞ്ഞു. തീരദേശ-മലയോര ഹൈവേകള്‍ക്കുള്ള 10,000 കോടിരൂപയുടെ കിഫ്ബി ഫണ്ട് കെഎസ്എഫ്ഇയുടെ പ്രവാസി ചിട്ടി ബോണ്ട് വഴി സമാഹരിക്കാനാണു തീരുമാനം. കിഫ്ബി ഫണ്ടിലും ബോണ്ടിലും നേരിട്ടു പങ്കാളികളാകാം. കിഫ്ബി ഫണ്ട് കേരളത്തെ സംബന്ധിച്ചിടത്തോളം നിര്‍ണായകവും പ്രവാസി നിക്ഷേപത്തിനുള്ള അംഗീകാരവുമാണ്. പ്രവാസികള്‍ നാടിന്റെ നട്ടെല്ലു തന്നെയാണെന്ന പ്രഖ്യാപനം കൂടിയാണിത്. പ്രവാസികളുടെ ഓണ്‍ലൈന്‍ ഡേറ്റാബേസ് തയാറാക്കുമെന്ന ബജറ്റ് പ്രഖ്യാപനവും മറുനാടന്‍ മലയാളികള്‍ക്കുള്ള അംഗീകാരമാണ്. ലോകമാകെയുള്ള മലയാളികളുടെ ഏകീകരണത്തിനും വിവരങ്ങള്‍ സംബന്ധിച്ച സമഗ്രതയ്ക്കും ഇതു സഹായകമാകും.

ഡോ. തോമസ് ഐസക് അവതരിപ്പിച്ചത് സാധാരണക്കാരനായ പ്രവാസിയുടെ ക്ഷേമം ഉറപ്പാക്കുന്ന ബജറ്റാണെന്ന് പ്രവാസി ബന്ധു വെല്‍ഫെയര്‍ ട്രസ്റ്റ് ചെയര്‍മാന്‍ കെ.വി.ഷംസുദീന്‍ പറഞ്ഞു. പ്രവാസി ചിട്ടി, കിഫ്ബി തുടങ്ങിയ പ്രഖ്യാപനങ്ങള്‍ അടിസ്ഥാന സൗകര്യ വികസനത്തിനും പ്രവാസികളുടെ ക്ഷേമത്തിനും ഗുണകരമാകും. പ്രവാസികളുടെ പങ്കാളിത്തത്തോടെ 25,000 കോടി രൂപ അടിസ്ഥാനസൗകര്യ വികസനമേഖലയില്‍ ഉപയോഗപ്പെടുത്താനുള്ള തീരുമാനം കേരളത്തില്‍ വികസന മുന്നേറ്റത്തിനു വഴിയൊരുക്കുമെന്നു പ്രതീക്ഷിക്കാമെന്നും പറഞ്ഞു. കാലങ്ങളായി അവഗണിക്കപ്പെട്ടു കിടന്ന പ്രവാസികളുടെ പ്രശ്‌നങ്ങള്‍ പൂര്‍ണമായും ഉള്‍ക്കൊണ്ടുള്ള പദ്ധതികളാണു പ്രഖ്യാപിച്ചത്. പ്രവാസി പെന്‍ഷന്‍ വര്‍ധന, നോര്‍ക്ക പദ്ധതി, പുനരധിവാസം, ക്ഷേമനിധി തുടങ്ങിയവ ഗുണപരമായ വലിയ മാറ്റമുണ്ടാക്കുമെന്നാണ് വിലയിരുത്തല്‍.