വിദേശികളുടെ ചികിത്സാ നിരക്ക് വര്‍ധന സംബന്ധിച്ച് ഉടന്‍ തീരുമാനമുണ്ടാകും. ഇതുമായി ബന്ധപ്പെട്ട ഫയലില്‍ ആരോഗ്യമന്ത്രി ഡോ.ജമാല്‍ അല്‍ ഹര്‍ബി ഒപ്പുവയ്ക്കുന്നതോടെ ഈ തീരുമാനം പ്രാബല്യത്തില്‍ വരും. ഫെബ്രുവരിയില്‍ നടപ്പിലാക്കാനിരുന്ന നിരക്ക് വര്‍ധന അന്തിമ തീരുമാനം എടുക്കുന്നതിന് വേണ്ടി നീട്ടിവയ്ക്കുകയായിരുന്നു. വര്‍ധന ഏര്‍പ്പെടുത്തുന്നത് സംബന്ധിച്ച് എംപിമാര്‍ക്കിടയില്‍ ഇപ്പോഴും ഭിന്നാഭിപ്രായം തുടരുന്നുണ്ട്.

വിദേശികള്‍ക്ക് വളരെ കുറഞ്ഞ നിരക്കിലാണ് ചികിത്സാ സംവിധാനം ഉപയോഗപ്പെടുത്തുന്നത് എന്നാണ് ഈ തീരുമാനത്തെ അനുകൂലിക്കുന്നവരുടെ വാദം. എന്നാല്‍ ഈ തീരുമാനം രാജ്യത്തെ മുഴുവന്‍ ജനങ്ങളെയും പ്രതികൂലമായി ബാധിക്കുമെന്നാണ് മറുവിഭാഗം പറയുന്നത്. മൂന്നാമതൊരു വിഭാഗത്തിന്റെ ആവശ്യം അറബ് വംശജരെ ഈ വര്‍ധനവില്‍ നിന്ന് ഒഴിവാക്കണമെന്നതാണ്. 

മറ്റു ഗള്‍ഫ് രാജ്യങ്ങളെ അപേക്ഷിച്ച് മെച്ചപ്പെട്ട ജീവിതസൗകര്യങ്ങളാണ് വിദേശികള്‍ക്ക് കുവൈറ്റില്‍ നല്‍കുന്നത് എന്നാണ് അധികൃതരുടെ അഭിപ്രായം. വര്‍ധന നടപ്പാക്കിയാല്‍ നടപ്പു സാമ്പത്തിക വര്‍ഷം സര്‍ക്കാറിന് ലഭിക്കുക 33 ലക്ഷം ദിനാറാണ്. ചികിത്സാ സൗകര്യം ഒരുക്കാന്‍ സര്‍ക്കാര്‍ ചെലവ് അതിന്റെ എത്രയോ ഇരട്ടിയാണെന്നും അധികൃതര്‍ പറയുന്നു.