പ്രവാസി തൊഴിലാളികളുടെ അവകാശങ്ങള്‍ ലംഘിക്കപ്പെട്ടാല്‍ ഉടന്‍ റിപ്പോര്‍ട്ട് ചെയ്യണമെന്ന് തൊഴില്‍ മന്ത്രാലയം
പ്രവാസി തൊഴിലാളികളുടെ തൊഴില്‍ നിയമപ്രകാരമുളള അവകാശങ്ങള്‍ ഏതെങ്കിലും തരത്തില്‍ ലംഘിക്കപ്പെട്ടാല്‍ ഉടന്‍ റിപ്പോര്‍ട്ട് ചെയ്യണമെന്നാണ് തൊഴില്‍ മന്ത്രാലയത്തിന്റെ നിര്‍ദേശം. പുതിയ തൊഴില്‍ നിയമ പ്രകാരം അവകാശങ്ങളേയും ചുമതലകളേയും കുറിച്ച് തൊഴിലാളികള്‍ക്കിടയില്‍ ബോധവത്കരണം നടത്തുക എന്നതാണ് ലക്ഷ്യം. ഇതിനായി ഭരണനിര്‍വഹണ വികസന തൊഴില്‍ സാമൂഹിക മന്ത്രാലയത്തിലെ ലേബര്‍ റിലേഷന്‍ വകുപ്പ് ഓണ്‍ലൈന്‍ ബോധവത്കരണ കാമ്പയിനും തുടക്കമിട്ടിട്ടുണ്ട്. തൊഴില്‍ സംബന്ധമായ പരാതികള്‍ തൊഴിലാളികള്‍ക്ക് ഓണ്‍ലൈന്‍ വഴിയോ അല്ലെങ്കില്‍ മന്ത്രാലയത്തിന്റെ ആസ്ഥാനത്തോ വ്യവസായ മേഖലയിലെ സ്ട്രീറ്റ് നമ്പര്‍ 13 ലെ ശാഖയിലോ നേരിട്ട് നല്‍കാം.
പരാതി നല്‍കുന്നതിനായി പ്രത്യേക അപേക്ഷാ ഫോമാണുള്ളത്. അപേക്ഷ പൂരിപ്പിച്ച് ഒപ്പിട്ട് ഖത്തര്‍ ഐ.ഡിയുടെ പകര്‍പ്പും ചേര്‍ത്ത് മന്ത്രാലയത്തിലെ ഉദ്യോഗസ്ഥ ഓഫീസില്‍ നല്‍കണം. ഓണ്‍ലൈന്‍ വഴിയാണ് പരാതി നല്‍കുന്നതെങ്കില്‍ ലേബര്‍ റിലേഷന്‍ വകുപ്പ് കമ്പനിയുടെ പ്രതിനിധിക്ക് മന്ത്രാലയം ഓഫീസില്‍ ഹാജരാകാന്‍ സന്ദേശം അയക്കും. സന്ദേശത്തിന്റെ പകര്‍പ്പ് പരാതിക്കാരനും അയക്കും. മന്ത്രാലയത്തിന്റെ പരിധിയിലുളള പരാതിയാകണം നല്‍കേണ്ടത്. തൊഴിലാളിയുടേയും തൊഴിലുടമയുടേയും സാന്നിധ്യത്തിലാണ് പരാതി ചര്‍ച്ച ചെയ്യുന്നത്. ചര്‍ച്ചയില്‍ ഒത്തുതീര്‍പ്പായില്ലെങ്കില്‍ കൂടുതല്‍ അന്വേഷണത്തിനായി കോമ്പീറ്റന്റ് കോര്‍ട്ടിലേക്ക് കൈമാറും. തൊഴിലുടമകള്‍ മന്ത്രാലയം അംഗീകരിച്ച കരാറിന്റെ പകര്‍പ്പ് നിര്‍ബന്ധമായും തൊഴിലാളികള്‍ക്ക് നല്‍കിയിരിക്കണം.
തൊഴിലാളികള്‍ ജോലിയില്‍ ആത്മാര്‍ത്ഥത കാണിക്കണമെന്നും വാണിജ്യ രഹസ്യങ്ങള്‍ പരസ്യമാക്കരുതെന്നും രാജ്യത്തെ ആചാരങ്ങളും നിയമങ്ങളും ബഹുമാനിക്കണമെന്നും മന്ത്രാലയം നിര്‍ദേശിച്ചു. തൊഴിലുടമയുടെ അനുമതിയില്ലാതെ മറ്റ് കമ്പനികളില്‍ ജോലി ചെയ്യരുതെന്നും മന്ത്രാലയം നിര്‍ദേശിച്ചു. തൊഴിലാളികള്‍ക്ക് പരാതി സമര്‍പ്പിക്കാനായി സര്‍ക്കാര്‍ സേവന സമുച്ചയങ്ങളില്‍ പതിനൊന്ന് സ്വയം പ്രവര്‍ത്തന മെഷീനുകള്‍ സ്ഥാപിച്ചിട്ടുണ്ട്.
തൊഴില്‍ നിയമ പ്രകാരം തൊഴിലാളികള്‍ക്ക് പ്രതിവര്‍ഷം മുഴുവന്‍ ശമ്പളത്തോടു കൂടി രണ്ടാഴ്ച രോഗാവധിക്ക് അര്‍ഹതയുണ്ട്. അവധി നീട്ടിയാല്‍ നാലാഴ്ച വരെ പകുതി ശമ്പളം ലഭിക്കും. രോഗാവധി ആറ് ആഴ്ചയിലധികം നീട്ടേണ്ടി വന്നാല്‍ തിരികെ ജോലിയില്‍ പ്രവേശിക്കുകയോ രാജി വെക്കുകയോ അല്ലെങ്കില്‍ ആരോഗ്യാവസ്ഥയുടെ അടിസ്ഥാനത്തില്‍ ജോലിയില്‍ നിന്ന് പിരിച്ചുവിടുകയോ ചെയ്യുന്നത് വരെ ശമ്പളമുണ്ടാകുകയില്ല. അംഗീകൃത ഡോക്ടറിന്റെയും തൊഴിലുടമയുടേയും അംഗീകാരവും രോഗാവധിക്ക് ആവശ്യമാണ്.
https://www.facebook.com/Malayalivartha
