പെരുമ്പാവൂര്‍ : നാട്ടില്‍ നിന്നും കൊടുത്തുവിട്ട പൊതിയില്‍ കഞ്ചാവ് കണ്ടെത്തിയതിനെ തുടര്‍ന്ന് ജയിലില്‍ അടച്ച മലയാളിക്ക് ഒടുവില്‍ മോചനം. പെരുമ്പാവൂര്‍ സൗത്ത് വല്ലം പറക്കുന്നന്‍ പി.എസ്. കബീര്‍ (47) ആണ് കുവൈത്തിലേക്ക് പോകുമ്പോള്‍ ബന്ധു കൊടുത്തുവിട്ട കഞ്ചാവുപൊതി പിടിക്കപ്പെട്ടതിനെ തുടര്‍ന്ന് ജയിലില്‍ അടയ്ക്കപ്പെട്ടത്.
പതിനാലു മാസത്തോളം ജയില്‍ശിക്ഷ അനുഭവിച്ച കബീറിനെ ഒടുവില്‍ നിരപരാധിയാണെന്നു ബോധ്യമായതിനെത്തുടര്‍ന്ന് വിട്ടയക്കുകയായിരുന്നു. ജയില്‍ മോചിതനായ കബീര്‍ വെള്ളിയാഴ്ച നാട്ടില്‍ തിരിച്ചെത്തി. കുവൈത്തില്‍ ടാക്‌സി ഡ്രൈവറായിരുന്ന കബീര്‍ 2015ല്‍ അവധിക്ക് നാട്ടിലെതത്തിയ ശേഷം തിരികെ പോകുമ്പോഴാണ് ചതിയില്‍പ്പെട്ടത്.

കുവൈത്തില്‍ ഒപ്പമുണ്ടായിരുന്ന അല്‍ത്താഫ് എന്നയാള്‍ക്കു കൊടുക്കാന്‍ ബന്ധു കൊടുത്തുവിട്ട ഉണക്കയിറച്ചി പൊതിയില്‍ ആണ് കഞ്ചാവുണ്ടായിരുന്നത്. 2015 നവംബര്‍ 22ന് കുവൈത്ത് വിമാനത്താവളത്തിലെ പരിശോധനയില്‍ ആണ് കബീര്‍ കഞ്ചാവുമായി പിടിക്കപ്പെട്ടത്. ചെമ്പറക്കി സ്വദേശിയായ അല്‍ത്താഫ് എന്നയാളാണ് കുവൈത്തില്‍ വെച്ച് ഇറച്ചി കബീറില്‍നിന്നു വാങ്ങുമെന്ന് അറിയിച്ചിരുന്നത്. എന്നാല്‍, കബീര്‍ പിടിയിലായത് അറിഞ്ഞ അല്‍ത്താഫ് അവിടെനിന്നു മുങ്ങി നാട്ടിലെത്തി.
എന്നാല്‍ തന്റെ നിരപരാധിത്വം തെളിയിക്കാന്‍ കഴിയാതിരുന്നതിനെത്തുടര്‍ന്ന് കബീര്‍ ജയിലിലാവുകയായിരുന്നു. 15 വര്‍ഷം തടവും 10,000 ദിനാര്‍ പിഴയുമാണ് കുവൈത്ത് കോടതി കബീറിനു വിധിച്ചത്. വിവരമറിഞ്ഞ കബീറിന്റെ ഭാര്യ പെരുമ്പാവൂരില്‍ നല്‍കിയ പരാതിയെത്തുടര്‍ന്ന് പോലീസ് നടത്തിയ അന്വേഷണത്തില്‍ കബീര്‍ നിരപരാധിയാണെന്നു തെളിയുകയും യഥാര്‍ത്ഥ പ്രതികളെ പിടികൂടുകയും ചെയ്തിരുന്നു.

അല്‍ത്താഫിനെയും ഇറച്ചി കൊടുത്തുവിട്ട റിനീഷിനെയുമാണ് പോലീസ് അറസ്റ്റ് ചെയ്തത്. കേരള പോലീസിന്റെ അന്വേഷണ റിപ്പോര്‍ട്ട് സഹിതം ഇന്ത്യന്‍ എംബസി നടത്തിയ ഇടപെടലുകളെത്തുടര്‍ന്നാണ് 14 മാസത്തെ ജയില്‍വാസത്തിനു ശേഷം കബീറിനു മോചനം ലഭിച്ചത്. മയക്കുമരുന്നു കടത്താന്‍ ശ്രമിച്ചുവെന്നാരോപിച്ച് കുവൈത്ത് പോലീസ് അതിക്രൂരമായി തന്നെ മര്‍ദിച്ചുവെന്നു തിരിച്ചെത്തിയ കബീര്‍ പറഞ്ഞു.

മൂന്നു കോടതികളില്‍ അപ്പീല്‍ നല്‍കിയ ശേഷമാണു നിരപരാധിത്വം തെളിയിക്കാനായത്. അന്നത്തെ മുഖ്യമന്ത്രി ഉമ്മന്‍ ചാണ്ടി, മുന്‍മന്ത്രി കെ.സി. ജോസഫ് എന്നിവരുടെ ഇടപെടലുകളും മോചനം എളുപ്പമാകാന്‍ കരണമായതായി കബീര്‍ ചൂണ്ടിക്കാട്ടി.