ജി.സി.സിയില്‍ പ്രവാസികളുടെ ഏറ്റവും ഇഷ്ടപ്പെട്ട ഇടം യു.എ.ഇയാണെന്ന് സര്‍വേ ഫലങ്ങള്‍ വ്യക്തമാക്കുന്നു. യു.എ.ഇയിലെ 88 ശതമാനം പ്രവാസികളും ഇവിടെ തുടരാന്‍ ആഗ്രഹിക്കുന്നവരാണ്. 2012ല്‍ 83 ശതമാനം പേരാണ് യു.എ.ഇയില്‍ തുടരാന്‍ ആഗ്രഹിച്ചത്. ജി.സി.സിയിലെ ഏറ്റവും ഇഷ്ടപ്പെട്ട തൊഴിലിടമായും യു.എ.ഇ തെരഞ്ഞെടുക്കപ്പെട്ടു.
ജോലി ചെയ്യാന്‍ ഏറ്റവും കൂടുതല്‍ പേര്‍ ഇഷ്ടപ്പെടുന്നത് ദുബൈ, അബൂദബി നഗരങ്ങളാണെന്നും ഓണ്‍ലൈന്‍ റിക്രൂട്ട്മെന്‍റ് കമ്പനി ‘ഗള്‍ഫ് ടാലന്‍റ്’ നടത്തിയ സര്‍വേ പറയുന്നു.
സാമ്പത്തിക മാന്ദ്യത്തില്‍ നിന്ന് ദുബൈ കരകയറിയതും വേള്‍ഡ് എക്സ്പോ ലഭിച്ചതും പ്രവാസികളുടെ ആത്മവിശ്വാസം വര്‍ധിപ്പിച്ചിട്ടുമുണ്ട്. 2012നെ അപേക്ഷിച്ച് ഒരേ രാജ്യത്ത് തന്നെ തുടരാന്‍ ആഗ്രഹിച്ച പ്രവാസികളുടെ എണ്ണം കൂടിയ ഏക രാജ്യവും യു.എ.ഇയാണ്. കുവൈത്തില്‍ 60 ശതമാനം പ്രവാസികളും രാജ്യത്ത് തുടരാന്‍ ആഗ്രഹിക്കുന്നവരാണ്. 2012ല്‍ ഇത് 64 ശതമാനമായിരുന്നു. ബഹ്റൈനില്‍ 49 ശതമാനവും ഒമാനില്‍ 47 ശതമാനവും അവിടെ തന്നെ തുടരാന്‍ ആഗ്രഹമുള്ളവരാണ്.
2012നെ അപേക്ഷിച്ച് ബഹ്റൈനില്‍ ഒരു ശതമാനവും ഒമാന്‍ രണ്ട് ശതമാനവും പുറകോട്ട് പോയി. സൗദിയില്‍ തുടരാന്‍ ആഗ്രഹിക്കുന്ന പ്രവാസികളുടെ എണ്ണത്തില്‍ നാല് ശതമാനവും ഖത്തറില്‍ അഞ്ച് ശതമാനവും കുറവാണ് ഉണ്ടായത്. സൗദിയില്‍ 45 ശതമാനവും ഖത്തറില്‍ 43 ശതമാനവും പ്രവാസികളാണ് തുടരാന്‍ ആഗ്രഹിക്കുന്നത്.