'ലാന്റ് മാര്‍ക്ക്' ഖത്തറില്‍ നടത്തിയ കുട്ടികള്‍ക്കായുള്ള ചിത്രരചന മല്‍സരത്തില്‍ മലയാളിയായ താമരയ്ക്കാണ് ഒന്നാം സ്ഥാനം. മലയാളികളായ രാംജിത്തന്റെയും രാധികയുടെയും ഏക മകളായ താമര രാജഗിരി പബ്ലിക് സ്‌കൂള്‍ രണ്ടാം ക്ലാസ് വിദ്യാര്‍ഥിനിയാണ്. താമര പഠനത്തിലും ഏറെ മുന്നിലാണ്. ഒളിമ്പ്യാഡ് നടത്തിയ പൊതു വിജ്ഞാന,കായിക ക്വിസില്‍ ഈ മിടുക്കിക്ക് സമ്മാനം ലഭിച്ചിരുന്നു.

ഇതിന് മുമ്പും നിരവധി ചിത്രരചന പുരസ്‌കാരങ്ങള്‍ നേടിയിട്ടുള്ള താമര വളരെ കുട്ടിയിലെ ചിത്രരചന തുടങ്ങിയതാണ്. ഖത്തര്‍ ചാരിറ്റിയുടെ നേതൃത്വത്തില്‍ നടന്ന പുകവലിക്കെതിരായ ബോധവല്‍ക്കരണ ചിത്ര രചന മല്‍സരം, എഫ്.സി.സി നടത്തിയ കുട്ടികളുടെ ചിത്രരചന മല്‍സരം എന്നിവയിലെല്ലാം താമര നേട്ടങ്ങള്‍ക്ക് അര്‍ഹയായിട്ടുണ്ട്.