സൗദിയിൽ​ അനധികൃതമായി കഴിയുന്ന വിദേശികള്‍ക്ക്​ സാമ്പത്തിക പിഴയും ജയില്‍ ശിക്ഷയും പുനഃപ്രവേശ വിലക്കുമില്ലാതെ മടങ്ങാന്‍ സൗദി ആഭ്യന്തര മന്ത്രാലയം പ്രഖ്യാപിച്ച പൊതുമാപ്പ്​ ഒരു മാസം കൂടി ഉപയോഗപ്പെടുത്താമെന്ന്​ ഇന്ത്യന്‍ എംബസി. സെപ്​റ്റംബര്‍ 16 മുതല്‍ ഒരു മാസത്തേക്കാണ്​ വീണ്ടും അവസരം. എംബസി വെല്‍ഫെയര്‍ കോണ്‍സുലര്‍ അനില്‍ നൊട്ട്യാലാണ്​ ഇക്കാര്യം അറിയിച്ചത്​. ബുധനാഴ്​ച അംബാസഡര്‍ അഹമ്മദ്​ ജാവേദ്​ സൗദി തൊഴില്‍കാര്യ സഹമന്ത്രി അദ്​നാന്‍ അബ്​ദുല്ല അല്‍നു​െഎമിനുമായി കൂടിക്കാഴ്​ച നടത്തിയിരുന്നു. രാജ്യത്തുള്ള ഇന്ത്യന്‍ തൊഴിലാളികളുമായി ബന്ധപ്പെട്ട വിവിധ വിഷയങ്ങള്‍ കൂടിക്കാഴ്​ചയില്‍ ചര്‍ച്ച ചെയ്​തിരുന്നു.

ഇൗ വര്‍ഷം മാര്‍ച്ച്‌​ 29നാണ്​ ആദ്യ പൊതുമാപ്പ്​ പ്രഖ്യാപിച്ചത്. ജൂണ്‍ 24 വരെയായിരുന്നു മൂന്നുമാസ കാലാവധി. അതവസാനിച്ചശേഷം വീണ്ടും ഒരുമാസം കൂടി നീട്ടിയിരുന്നു. നേരത്തെ പ്രഖ്യാപിച്ച നാലുമാസത്തെ പൊതുമാപ്പ്​ കാലയളവില്‍ ആറുലക്ഷത്തോളം ആളുകള്‍ ആനുകൂല്യം ഉപയോഗപ്പെടുത്തി നാടുപിടിച്ചിരുന്നു. അതില്‍ ഏതാണ്ട്​ അരലക്ഷം ഇന്ത്യാക്കാരും അവസരം പ്രയോജനപ്പെടുത്തി.