സൗദിയിൽ നാല്​ മാസം പ്രായമായ കുഞ്ഞിന്റെ പാസ്​പോർട്ടിൽ എക്​സിറ്റ്​ വിസയടിക്കാതെ വിമാനത്താവളത്തിലെത്തിയ കുടുംബത്തിന് വിമാനത്താവള അധികൃതർ യാത്ര നിഷേധിച്ചു. അറാറിലെ ഗവൺമന്റെ​ ആശുപത്രിയിൽ സ്​റ്റാഫ് നഴ്​സായ കോട്ടയം സ്വദേശിനി തമ്പാന്‍ ആഷിലിയും കുടുംബത്തിനുമാണ് ഇങ്ങനെയൊരു സംഭവത്തെ അഭിമുഖീകരിക്കേണ്ടി വന്നത്.

കുഞ്ഞി​​ന്റെ എക്​സിറ്റ്​ വിസ റിയാദ്​ വിമാനത്താവളത്തിലെ എമിഗ്രേഷനിൽ കിട്ടുമെന്ന് തെറ്റിദ്ധരിച്ചാണ് ഇവർ വിമാനത്താവളത്തിൽ ഏത്തിയത്. ഒടുവിൽ റിയാദിലെ മലയാളി സാമൂഹിക പ്രവർത്തകർ ഇടപെട്ട്​ റിയാദിലെ തർഹീലിൽ (നാടുകടത്തൽ കേന്ദ്രം) നിന്ന്​ എക്​സിറ്റ്​ വിസ നേടി കുടുംബ​ത്തിന്​ നാട്ടിലേക്ക്​ വഴിയൊരുക്കുകയായിരുന്നു.

വ്യാഴാഴ്​ചയാണ്​ സംഭവം. വെള്ളിയാഴ്​ച കുടുംബം നാട്ടിലെത്തി. വർഷങ്ങളായി അറാറിൽ ജോലി ചെയ്യുന്ന ആഷ്​ലി ഏഴ്​ മാസമായപ്പോൾ പ്രസവാവധി വാങ്ങി നാട്ടിൽ പോകുന്നതിനുള്ള ഒരുക്കത്തിനിടയിൽ കലശലായ വയർവേദനയെ തുടർന്ന് ജോലി ചെയ്യുന്ന ആശുപത്രിയിൽ തന്നെ അഡ്​മിറ്റാവുകയും സിസേറിയനിലൂടെ കുഞ്ഞിനെ പുറത്തെടുക്കുകയും ചെയ്തു. പുറത്തെടുത്ത കുട്ടിയെ രണ്ട്​ മാസം തീവ്രപരിചരണ വിഭാഗത്തിലാക്കി ചികിത്സ നടത്തി. കുട്ടിക്ക് നാലുമാസം പ്രായമായതോടെ എല്ലാവരും കൂടി നാട്ടിലേക്ക്​ മടങ്ങാൻ തീരുമാനിച്ചപ്പോഴാണ് ഈ ദുരനുഭവം ഉണ്ടായത്.

ആഷ്​ലിക്ക്​ റീഎൻട്രി വിസ നൽകിയെങ്കിലും കുട്ടിക്കുള്ള എക്​സിറ്റ്​ വിസ റിയാദ്​ എയർപ്പോർട്ടിലെ എമിഗ്രേഷനിൽ ലഭിക്കുമെന്നാണ്​ ബന്ധപ്പെട്ട ഉദ്യോഗസ്​ഥൻ പറഞ്ഞതനുസരിച്ച് റിയാദിലെത്തിയ കുടുംബം ബോർഡിങ്​ പാസും വാങ്ങി എമിഗ്രേഷനിലെത്തിയപ്പോഴാണ്​ യാത്ര തടസപ്പെട്ടത്​. റിയാദ്​ ജവാസാത്തിനെ സമീപിച്ച്​ എക്​സിറ്റ്​ വിസ നേടാനായിരുന്നു​ കിട്ടിയ നിർദേശം. രണ്ട്​ ദിവസത്തിനുള്ളിൽ ഭർത്താവി​ന്റെയും മാതാവിന്റെയും സന്ദർശക വിസയുടെ കാലാവധി കഴിയുമെന്നതിനാൽ കുടുംബം ആശങ്കയിലായി.

ഇവരുടെ ഈ സാഹചര്യം അറിഞ്ഞ ചാരിറ്റി ഒാഫ്​ പ്രവാസി മലയാളി എന്ന സംഘടനയുടെ പ്രവർത്തകൻ റിഷി ലത്തീഫ്​ കുടുംബത്തെ ത​ന്റെ വാഹനത്തിൽ കയറ്റി റിയാദിലെ ത​ന്റെ വീട്ടിലേക്ക്​ കൊണ്ടുവരികയും പി.എം.എഫ്​ ഭാരവാഹി ജയൻ കൊടുങ്ങല്ലൂരി​ന്റെ കൂടി സഹായത്തോടെ ജവാസാത്തിനെ സമീപിക്കുകയും ചെയ്​തു. എന്നാൽ മലസിലെ തർഹീലിൽ പോകാനായിരുന്നു അവിടെ നിന്നുള്ള നിർദേശം. തുടർന്ന്​ തർഹീലിലെത്തി എക്​സിറ്റ്​ നടപടിക്രമങ്ങൾ പൂർത്തിയാക്കി. സന്ദർശക വിസയുടെ കാലാവധി അവസാനിക്കുന്നതിന്​ ഏതാനും മണിക്കൂറുകൾക്ക്​ മുമ്പ്​ വീണ്ടും വിമാന ടിക്കറ്റ്​ ശരിയാക്കി വെള്ളിയാഴ്​ച നാട്ടി​ലേക്ക്​ തിരിക്കുകയായിരുന്നു .