കുവൈത്തിലെ കോവിഡ് പ്രതിരോധ പ്രവര്‍ത്തനങ്ങളില്‍ പങ്കുചേരുന്നതിനായി ഇന്ത്യയില്‍ നിന്നുള്ള പ്രത്യേക മെഡിക്കല്‍ സംഘം കുവൈത്തിലെത്തി. കോവിഡ് പരിശോധന, ചികിത്സ തുടങ്ങിയ മേഖലകളില്‍ ഇവര്‍ കുവൈത്ത് ആരോഗ്യവകുപ്പിനെ സഹായിക്കും. കുവൈത്ത് സര്‍ക്കാരിന്റെ അഭ്യര്‍ഥന പ്രകാരമാണ് ഇന്ത്യ 15 അംഗ സംഘത്തെ അയച്ചത്. ഇന്ത്യന്‍ ഡോക്ടര്‍മാരുടേയും ആരോഗ്യ പ്രവര്‍ത്തകരുടേയും സംഘം കുവൈത്തിലെ കൊറോണ പ്രതിരോധ പ്രവര്‍ത്തനങ്ങളെ പിന്തുണയ്ക്കുമെന്നും കേന്ദ്ര വിദേശകാര്യ മന്ത്രി എസ്. ജയശങ്കര്‍ അറിയിച്ചു. ഇന്ത്യന്‍ സംഘത്തിന്റെ ചിത്രം മന്ത്രി ട്വിറ്ററിലൂടെ പങ്കുവയ്ക്കുകയും ചെയ്തിട്ടുണ്ട്. കൂടാതെ, ഇന്ത്യന്‍ പ്രധാനമന്ത്രി നരേന്ദ്ര മോദിയും കുവൈത്ത് പ്രധാനമന്ത്രി സബാ അല്‍ ഖാലിദ് അല്‍ സബായും തമ്മില്‍ ടെലിഫോണിലൂടെ നടന്ന ചര്‍ച്ചകളെ തുടര്‍ന്നാണ് എയര്‍ഫോഴ്‌സ് വിമാനത്തില്‍ സംഘമെത്തിയത്. ഇരു രാജ്യങ്ങളും തമ്മില്‍ വളരെയടുത്ത സൗഹൃദബന്ധമാണുള്ളതെന്ന് അദ്ദേഹം വ്യക്തമാക്കി.

ഇന്ത്യയില്‍ നിന്നുള്ള പ്രത്യേക വിമാനത്തിലാണ് റാപിഡ് റെസ്‌പോണ്‍സ് ടീം കുവൈത്തിലെത്തിയത്. രണ്ടാഴ്ചയോളം ഇവര്‍ കുവൈത്തില്‍ സേവനത്തിലുണ്ടാവുമെന്നും പ്രസ്താവന വിശദീകരിക്കുന്നു. ദിവസങ്ങള്‍ക്ക് മുന്‍പ് ഇന്ത്യന്‍ പ്രധാനമന്ത്രിയും കുവൈത്ത് പ്രധാനമന്ത്രിയും ഫോണിലൂടെ ചര്‍ച്ച നടത്തുകയും കോവിഡ് പ്രതിരോധ പ്രവര്‍ത്തനങ്ങളില്‍ പരസ്പരം സഹകരിക്കുമെന്ന് ഉറപ്പ് നല്‍കുകയും ചെയ്തിരുന്നു.

കോവിഡ് പ്രതിരോധത്തില്‍ പ്രവര്‍ത്തിക്കാനായി ഇതുപോലുള്ള നിരവധി വൈദ്യസംഘങ്ങളെ ഇന്ത്യ തയ്യാറാക്കിയിട്ടുണ്ട്. സഹായം ആവശ്യമുള്ള സൗഹൃദരാഷ്ട്രങ്ങളിലേക്ക് ഈ സംഘങ്ങളെ അയച്ചുകൊണ്ട് പിന്തുണ അറിയിക്കാനാണ് ഇന്ത്യയുടെ തീരുമാനം. അതേസമയം, കുവൈത്തില്‍ ഇതുവരെ 1154 പേര്‍ക്കാണ് കൊറോണ വൈറസ് ബാധ സ്ഥിരീകരിച്ചത്. ഇതില്‍ 634 പേര്‍ ഇന്ത്യക്കാരാണ്.

അതേസമയം, യുഎഇ അടക്കമുള്ള ഇതര ഗള്‍ഫ് രാജ്യങ്ങളില്‍ നിന്നും മലേഷ്യ, സിംഗപ്പൂര്‍, യൂറോപ്പ് തുടങ്ങിയ ലോകത്തിന്റെ വിവിധ കോണുകളില്‍ നിന്നുമുള്ള വിദ്യാര്‍ഥികളടക്കമുള്ള ഇന്ത്യന്‍ പ്രവാസികള്‍ തങ്ങളെ എന്നാണ് ഇവിടെ നിന്ന് രക്ഷിക്കുകയെന്ന് മറുട്വീറ്റ് ചെയ്തിട്ടുണ്ട്. രോഗം, ഭീതി, താമസം, ഭക്ഷണം തുടങ്ങിയ കാര്യങ്ങള്‍ തങ്ങളെ അലട്ടുകയാണെന്നും എത്രയും പെട്ടെന്ന് ഇന്ത്യയിലേയ്ക്ക് തിരിച്ചു കൊണ്ടുപോകണമെന്നുമാണ് മിക്കവരുടെയും ആവശ്യം. ഈ മാസം 14 വരെ വിമാനങ്ങള്‍ റദ്ദാക്കിയിട്ടുണ്ടെന്നും അതുവരെ കാത്തിരിക്കണമെന്നും ഇന്ത്യന്‍ എംബസികളുമായി ബന്ധപ്പെടണമെന്നും മന്ത്രി ട്വിറ്ററിലൂടെ പ്രതികരിച്ചു. ഇന്ത്യയിലേയ്ക്ക് കോവിഡ് 19 എത്തിയത് വിദേശത്ത് നിന്നാണെന്ന കാര്യം മന്ത്രിയെ ഓര്‍മിപ്പിക്കാനും ചിലര്‍ മറന്നില്ല.

അതിനിടെ, കോവിഡ് രോഗികളല്ലാത്ത ഇന്ത്യക്കാരെ നാട്ടിലെത്തിക്കാമെന്ന് യുഎഇ അംബാസഡര്‍ മുഹമ്മദ് അല്‍ ബന്ന പറരഞ്ഞു. എമിേററ്റ്‌സ് വിമാനങ്ങള്‍ ഇതിനായി ഉപയോഗിക്കാം. ഗള്‍ഫ് രാജ്യങ്ങളില്‍ തൊഴില്‍ ചെയ്യുന്ന പ്രവാസികളെ നാട്ടിലെത്തിക്കാന്‍ സൗകര്യം ഒരുക്കണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയന്‍ പ്രധാനമന്ത്രിക്ക് കത്തയച്ചിരുന്നു. ഇതിന് പിന്നാലെയാണ് സഹായവാഗ്ദാനം. എല്ലാ വിദേശ സര്‍ക്കാരുകളുമായി സംസാരിച്ചു. അവരുടെ പൗരന്മാരെ കൊണ്ടുപോകുന്നതിന് പ്രശ്‌നമില്ല. ഇവിടെ നിന്നും പോകുന്നതിന് മുന്‍പ് കോവിഡ് പരിശോധന നടത്തും. പോസറ്റീവായി ഫലം വരുന്നവരെ യുഎഇയില്‍ തന്നെ നിര്‍ത്തി ആവശ്യമായ ചികില്‍സ നല്‍കും. മറ്റുള്ളവര്‍ക്ക് സ്വദേശത്തേക്ക് പോകാം. ഇതുമായി ബന്ധപ്പെട്ട് എല്ലാ എംബസികള്‍ക്കും വിവരം നല്‍കിയിട്ടുണ്ടെന്നും അദ്ദേഹം വ്യക്തമാക്കി.