ഡെന്വര് മൃഗശാലയുടെ സ്വന്തം ക്യൂട്ട് 'ടോങ്ക്സ്'
ജീവശാസ്ത്രത്തെ സംബന്ധിച്ച് ഏറെ സന്തോഷം പകരുന്ന ഒരു വാര്ത്ത ഇക്കഴിഞ്ഞ ഓഗസ്റ്റ് എട്ടിന് അമേരിക്കയിലെ ഡെന്വര് മൃഗശാലയില് നിന്നെത്തി. യുഎസില് മാത്രം ഇക്കഴിഞ്ഞ ഓഗസ്റ്റ് എട്ടു വരെ ആകെ 23 അയ് അയ്കളേ ഉണ്ടായിരുന്നുള്ളൂ. യുഎസിലെ കാടുകളില് ഇവയെ കാണാന് പോലും കിട്ടുന്നില്ല. ടോങ്ക്സ് എന്നു പേരിട്ട ഒരു സുന്ദരി 'അയ് അയ്' കൂടി ജനിച്ച വിവരം കഴിഞ്ഞ ദിവസമാണ് ഔദ്യോഗികമായി മൃഗശാല അധികൃതര് പുറത്തുവിട്ടത്.
ചില ആഫ്രിക്കന് രാജ്യങ്ങളിലുള്ളവര്ക്ക് ഇപ്പോഴും ഈ കുഞ്ഞന് ജീവിയെ കണ്ടുകൂടാ. പിശാചിന്റെ കൂടെയെത്തുന്ന ദുഃശ്ശകുനത്തിന്റെ അടയാളമായാണ് അവര് 'അയ് അയ്' എന്ന ജീവിയെ കാണുന്നത്.
മഡഗാസ്കറാണ് അയ് അയ്കളുടെ ജന്മദേശം. വംശനാശഭീഷണിയുള്ള ജീവികളുടേതായി ഐയുസിഎന് പുറത്തിറക്കിയ റെഡ് ലിസ്റ്റിലെ മുന്നിരയിലാണ് ഇതിന്റെ സ്ഥാനം. കാടുകളിലെ മരങ്ങളിലാണ് മുഴുവന് സമയവും ജീവിതം. ലെമൂറുകളുടെ വിഭാഗത്തില്പ്പെട്ട ഇവ 20 വര്ഷം വരെ ജീവിക്കും. എന്നാല് ഭാരം അരക്കിലോഗ്രാം തികച്ചില്ല, ഏകദേശം 450 ഗ്രാം വരും പൂര്ണ വളര്ച്ചയെത്തിയ അയ് അയിന്റെ ഭാരം. പക്ഷേ െ്രെപമറ്റ് വിഭാഗത്തിലെ രാത്രിഞ്ചരന്മാരില് ഏറ്റവും വലുതാണ് അയ് അയ്കള്. ചുണ്ടെലികളെപ്പോലെ ഇവയുടെ മുന്പല്ലും എന്നും വളര്ന്നു കൊണ്ടേയിരിക്കുമെന്ന പ്രത്യേകതയുമുണ്ട്.
മരത്തില് നിന്നിറങ്ങാതെ ജീവിക്കാനാകും വിധമാണ് ശരീരപ്രകൃതി. രാത്രി മാത്രമേ പുറത്തിറങ്ങാറുള്ളൂ. ദേഹം മുഴുവന് കറുത്ത രോമമാണ്. രണ്ടു കയ്യിലുമാകട്ടെ നീളന് വിരലുകളുമുണ്ട്. വവ്വാലുകളുടേതിനു സമാനമായ വിരലുകളാണവ. അതുപയോഗിച്ചു മരത്തൊലികളില് പിടിച്ചു കയറിയാണ് ഇരപിടിത്തം. നടുവിലെ നീളന് വിരലുകൊണ്ടു മരത്തിലെ പൊത്തുകളില് നിന്നു പ്രാണികളെയും മറ്റും പിടികൂടിയാണ് ഭക്ഷണമാക്കുക പതിവ്. 
ലോകത്തിലെ ഏറ്റവും വ്യത്യസ്തമായ രൂപത്തിലുള്ള ജീവികളുടെ പട്ടികയിലാണ് അയ് അയ്കളുടെ സ്ഥാനം. പേരും അങ്ങനെത്തന്നെ. ഇത്തരത്തിലൊരു വിചിത്രമായ പേര് ഇവയ്ക്കെങ്ങനെയായിരിക്കും ലഭിച്ചിട്ടുണ്ടാവുക? നേരത്തേ ഇവയ്ക്ക് 'നീണ്ട വിരലുകളുള്ള ലെമൂര്' എന്നായിരുന്നു പേര്. എന്നാല് ഒരിക്കല് ഇവയുടെ ചിത്രം വരച്ച് വിവരങ്ങള് രേഖപ്പെടുത്തുന്നതിനിടെ പ്രത്യേകതകള് തിരിച്ചറിഞ്ഞ ഫ്രഞ്ച് പ്രകൃതിശാസ്ത്രജ്ഞന് പിയറി സൊണെറാറ്റ് ആശ്ചര്യസൂചകമായി അയ് അയ് എന്നു പറഞ്ഞതായാണ് ഒരു കഥ. മഡഗാസ്കറില് നിന്നാണ് മറ്റൊരു കഥ. അവിടെയുള്ളവര്ക്ക് ഈ ജീവിയുടെ പേരു പോലും പറയാന് പേടിയായിരുന്നു. ദ്വീപിലെത്തിയവര് ഈ ജീവിയുടെ പേരു ചോദിച്ചപ്പോള് അവര് 'ഹേയ് ഹേയ്' എന്നു പറഞ്ഞു. മലഗാസി ഭാഷയില് 'എനിക്കറിയില്ല' എന്നായിരുന്നു അതിന് അര്ഥം. ആ പേരാണ് പിന്നീട് അയ് അയ് ആയി രൂപാന്തരം പ്രാപിച്ചതെന്നും പറയുന്നു.
ഒരു പ്രസവത്തില് ഒരു കുഞ്ഞു മാത്രമേ അയ് അയ്കള്ക്കുണ്ടാകൂ. കുഞ്ഞ് ജനിച്ച് രണ്ടു വര്ഷം കഴിയുമ്പോള് അമ്മ അതിനെ ഉപേക്ഷിക്കും. ഡെന്വറില് പക്ഷേ പ്രസവിച്ചതിനു ശേഷം അമ്മ ബെല്ലാട്രിക്സ് ടോങ്ക്സിനെ തിരിഞ്ഞു നോക്കിയില്ല. ഒടുവില് മൃഗശാല അധികൃതരാണ് കുഞ്ഞിനെ പരിചരിക്കാന് പരിശീലനം നല്കിയത്. ജനിച്ചപ്പോള് ഏതാനും ഔണ്സ് ഭാരമുണ്ടായിരുന്ന ടോങ്ക്സ് ഇപ്പോള് 'തടിവച്ചു' വരുന്നുണ്ട്. അമ്മയ്ക്കും അച്ഛന് സ്മിയാഗൊളിനുമൊപ്പം മൃഗശാലയിലെ എമറാള്ഡ് ഫോറസ്റ്റിലാണിപ്പോള് ടോങ്ക്സ്. എല്ലാ കാര്യങ്ങളും നോക്കി അധികൃതരുമുണ്ട്. ഇപ്പോള് കാഴ്ചയില് ചിറകില്ലാത്ത വവ്വാലിനെപ്പോലെയാണ്. പക്ഷേ ഏതാനും മാസങ്ങള്ക്കകം ടോങ്ക്സിന്റെ മുഖത്തുള്പ്പെടെ രോമം വരും. അതിനു ശേഷം മാത്രമേ സന്ദര്ശകര്ക്കും ഇതിനെ കാണാനാകൂ. അതുവരെ പുള്ളിക്കാരി ഡെന്വറിലെ വിവിഐപി!!
https://www.facebook.com/Malayalivartha
