വാഴക്കുളം കാവന പുളിക്കായത്ത് കടവിലുള്ള പെരുമാങ്കാവ് ഭഗവതി ക്ഷേത്രത്തില്‍ രണ്ടുവര്‍ഷത്തിലേറെയായി പൂജാവിധികള്‍ നടത്തിവരുന്നത് സരസ്വതി അന്തര്‍ജനമാണ്. പുരുഷ മേല്‍ക്കോയ്മയുള്ള ഈ മേഖലയിലേക്ക് കടന്നുവരാന്‍ ഇടയാക്കിയത് ഭര്‍ത്താവ് കേശവന്‍ നമ്പൂതിരിയുടെ നിര്യാണമാണ്.

ഇരളിയൂര്‍ മന കുടുംബത്തിന്റ പരദേവതയായ പെരുമാങ്കാവിലമ്മയ്ക്ക് 40 വര്‍ഷമായി പൂജ ചെയ്തുവന്ന ഭര്‍ത്താവ് മരിച്ചതിനെ തുടര്‍ന്ന് പൂജാവിധികള്‍ ഏറ്റെടുത്തു നടത്താനുള്ള നിയോഗം ഇവരില്‍ എത്തിച്ചേരുകയായിരുന്നു.

ഒരു സ്ത്രീ അമ്പലത്തില്‍ പൂജ ചെയ്തു തുടങ്ങിയപ്പോള്‍ ആദ്യമൊക്കെ ചിലര്‍ നെറ്റി ചുളിച്ചെങ്കിലും അടുത്തിടെ ഉണ്ടായ മഹാപ്രളയത്തിലും ക്ഷേത്രത്തെ തഴുകിയൊഴുകുന്ന തൊടുപുഴയാര്‍ പെരുമാങ്കാവിലമ്മയുടെ സന്നിധിയില്‍ പ്രവേശിക്കാത്തത് ഈ അമ്മയുടെ ഐശ്വര്യം കൊണ്ടാണെന്ന് നാട്ടുകാര്‍ പറയുന്നു.

പൂജാവിധികളിലും ഭാഗവത പ്രഭാഷണത്തിലും മറ്റും നിപുണരായ അനില്‍, അരുണ്‍ കുമാര്‍, അമ്പിളി എന്നിവരാണ് മക്കള്‍. കേശവന്‍ നമ്പൂതിരി സരസ്വതി ദമ്പതികളുടെ മൂത്ത പുത്രന്‍ അനില്‍ കാലങ്ങളായി മറ്റു പല ക്ഷേത്രങ്ങളിലും പൂജാരിയാണ്. അരുണ്‍ കുമാര്‍ (അരുണന്‍ ) അധ്യാപകനും അറിയപ്പെടുന്ന ഭാഗവത പ്രഭാഷകനുമാണ്.

ദിനവും പുലര്‍ച്ചേ നട തുറന്ന് അഭിഷേകം, മലര്‍ നിവേദ്യം, തുടര്‍ന്ന് തിടപ്പള്ളിയില്‍ പായസം, നിവേദ്യം തയാറാക്കല്‍ ഭക്തര്‍ക്ക് പുഷ്പാഞ്ജലിയും വഴിപാടുകളും എല്ലാം സരസ്വതി അന്തര്‍ജനത്തിന് ഉപാസനയാണ്. പെരുമാങ്കാവിലെ ദീപാരാധന തൊഴാന്‍ മണ്ഡലകാലത്താണ് ഭക്തര്‍ കൂടുതല്‍ എത്തുന്നത്. കുംഭമാസത്തില്‍ കാര്‍ത്തിക വിളക്കിനും ഭക്തര്‍ ധാരാളം വരുന്നു.