രാജസ്ഥാനില്‍ നിന്നെത്തിച്ച ഒട്ടകത്തിനു പെരുമ്പാവൂരിന് അടുത്ത് തണ്ടേക്കാട് സുഖപ്രസവം. അല്‍ അസ്ഹര്‍ ഇംഗ്ലിഷ് മീഡിയം സ്‌കൂളിനു സമീപം താമസിക്കുന്ന പറമ്പിള്ളിക്കുടി സിദ്ധിഖ് വാങ്ങിയ ബുറാഖ് എന്ന ഒട്ടകമാണ് ആണ്‍കുഞ്ഞിനു ജന്മം നല്‍കിയത്.

കേരളത്തില്‍ ഒട്ടകപ്രസവം നടക്കുന്നതു രണ്ടാം തവണയാണെന്നു സിദ്ധിഖ് പറഞ്ഞു. ഒരു വര്‍ഷം മുന്‍പ് വയനാട് മാനന്തവാടിയിലായിരുന്നു ആദ്യ പ്രസവം.

പാലക്കാട്ടെ റജിസ്‌റ്റേര്‍ഡ് ക്ലബ് ഉടമ ഗൗതം വഴി കഴിഞ്ഞ മാര്‍ച്ചിലാണ് ഒട്ടകത്തെ വാങ്ങിയത്. ഒന്‍പതു മാസം ഗര്‍ഭിണിയായിരുന്നു അന്ന്. 14 മാസത്തെ ഗര്‍ഭകാലത്തിനു ശേഷം ഇക്കഴിഞ്ഞ 19-നായിരുന്നു പ്രസവം. അമ്മയും കുഞ്ഞും പുതിയ അന്തരീക്ഷവുമായി ഇണങ്ങി.

തള്ളയെ രാജസ്ഥാനിലേക്കു തന്നെ തിരികെ നല്‍കി കുഞ്ഞിനെ തണ്ടേക്കാട് വളര്‍ത്താനാണു തീരുമാനമെന്നു സിദ്ധിഖ് പറഞ്ഞു. ഏഴു വയസ്സുള്ള ബുറാഖിനെ ഒന്നര ലക്ഷം രൂപയ്ക്കാണു വാങ്ങിയത്.

തവിടും കടലത്തൊണ്ടും ഇലകളുമാണു ഭക്ഷണം. 15 ആടുകളെ പരിചരിക്കുന്നതു പോലെയാണ് ഒരു ഒട്ടകത്തിന്റെ പരിചരണമെന്നു സിദ്ധിഖ് പറഞ്ഞു. കുതിരകളെ വാങ്ങി മറിച്ചു വില്‍പനയുള്ള ഇദ്ദേഹം കൗതുകത്തിനാണ് ഒട്ടകത്തെ വാങ്ങിയത്. മൂന്നു വയസ്സുള്ള കുതിരയുമുണ്ട്.

പെരുമ്പാവൂര്‍ മേഖലയില്‍ സവാരിക്കും വില്‍പനയ്ക്കുമായി കുതിരയെ ആദ്യമെത്തിച്ചവരില്‍ ഒരാളാണ് സിദ്ധിഖ്. പോഞ്ഞാശേരി താജ് മൈദ കമ്പനിയില്‍ വെഹിക്കിള്‍ മാനേജരായ ഇദ്ദേഹത്തെ മൃഗപരിപാലനത്തില്‍ സഹായിക്കുന്നത് കുടുംബാംഗങ്ങളാണ്.