ഇക്കഴിഞ്ഞ സെപ്റ്റംബര്‍ 17-ന് ഒഡീഷയിലെ ഭദ്രക് പട്ടണത്തിനടുത്തുള്ള സതൗനി ബസാറിലെ പരീദാകുടുംബം, തങ്ങളുടെ വളര്‍ത്തുനായ പതിവില്ലാതെ രാത്രിയില്‍ നിര്‍ത്താതെ കുരയ്ക്കുന്നത് കേട്ടാണ് എന്താണെന്നറിയാന്‍ ഇറങ്ങിനോക്കിയത്.

അവരുടെ വീടിന്റെ കോണിപ്പടിയുടെ താഴെയായി അവരുടെ വളര്‍ത്തുനായ ഏഴ് കുഞ്ഞുങ്ങളെ പ്രസവിച്ചിട്ട് രണ്ടു ദിവസം ആയതേ ഉണ്ടായിരുന്നുള്ളൂ. രാത്രി വൈകി ഈ ഭാഗത്തുനിന്നു നിര്‍ത്താതെയുള്ള കുരകേട്ടെത്തിയ വീട്ടുകാര്‍ കണ്ടത് നേര്‍ക്കുനേരെ ചീറിനില്‍ക്കുന്ന മൂര്‍ഖന്‍ പാമ്പിനെയും തങ്ങളുടെ വളര്‍ത്തുപട്ടിയെയുമാണ്. പട്ടിയുടെ രണ്ട് കുഞ്ഞുങ്ങള്‍ ഇതിനകം പാമ്പിന്റെ കടിയേറ്റ് ചത്തു കഴിഞ്ഞിരുന്നു.

കുഞ്ഞുങ്ങളെ രക്ഷിക്കാന്‍ ഉറക്കെ കുരച്ചെങ്കിലും പിന്‍മാറാന്‍ പാമ്പ് തയാറായില്ല. പിന്നീട് കുഞ്ഞുങ്ങളില്‍ നിന്നും പാമ്പിന്റെ ശ്രദ്ധ തന്റെ നേര്‍ക്ക് തിരിക്കാന്‍ പട്ടി ശ്രമിച്ചുകൊണ്ടേയിരുന്നു. പക്ഷേ അതൊന്നും ഫലം കണ്ടില്ല. നാട്ടുകാര്‍ പാമ്പിനെ പിടിക്കാന്‍ ശ്രമം നടത്തിയെങ്കിലും സാധിച്ചില്ല. പിന്നീട് ഇവര്‍ സഹായത്തിനായി വനം വകുപ്പ് അധികൃതരെ വിവരം അറിയിച്ചു.

ഉദ്യോഗസ്ഥര്‍ എത്തുംവരെ പാമ്പിനും കുഞ്ഞുങ്ങള്‍ക്കും ഇടയില്‍ ഈ അമ്മ നിലകൊണ്ടു. ഇതിനിടയില്‍ രണ്ട് കുഞ്ഞുങ്ങള്‍ക്കു കൂടി പാമ്പ് കടിയേറ്റു. പാമ്പിനു നേരെ കുരച്ചും ചാടിയും പട്ടി പിടിച്ചുനിന്നു. ഒടുവില്‍ വനം വകുപ്പ് അധികൃതരെത്തി പാമ്പിനെ കെണിയിലാക്കി. പക്ഷേ അപ്പോഴേക്കും നാലു കുഞ്ഞുങ്ങള്‍ പാമ്പ് കടിയേറ്റ് ചത്തിരുന്നു. കുഞ്ഞുങ്ങള്‍ക്കായി ആ അമ്മ നടത്തിയ പോരാട്ടം സമൂഹമാധ്യമങ്ങളില്‍ കണ്ണീരില്‍ കുതിര്‍ന്ന കയ്യടി നേടുകയാണ്.