ലോകത്തിന് കഥയറിയാതെ... അല്ദി നോവല് അദിലാങ് കടലില് ഒഴുകി നടന്നത് 49 ദിവസം!
അല്ദി നോവല് അദിലാങ് എന്ന പതിനെട്ടുകാരന് സമയവും കാലവുമറിയാതെ, എന്നെങ്കിലും കര കാണാന് കഴിയുമോ എന്നുപോലുമറിയാതെ വിദൂരവും ഏകാന്തവുമായ കടലില് കഴിഞ്ഞത് 49 ദിവസം.
ഇന്തൊനീഷ്യയിലെ സുലാവേസി ദ്വീപിനടുത്ത് തീരത്തു കെട്ടിയിട്ട 'മീന് വഞ്ചി' കാറ്റില് അഴിഞ്ഞ് അല്ദിയെയും കൊണ്ട് കടലിലൂടെ ഒഴുകിയത് 2500 കിലോമീറ്ററാണ്. പാനമയില്നിന്നുള്ള കപ്പല് ഈ ചെറുവഞ്ചി കണ്ടെത്തി യുവാവിനെ രക്ഷിച്ചത് ഏഴാഴ്ചയ്ക്കു ശേഷം ശാന്തസമുദ്രത്തിലെ ഗുവാം ദ്വീപിനു സമീപത്തുനിന്നാണ്.
ഓസ്കര് പുരസ്കാരം നേടിയ 'ലൈഫ് ഓഫ് പൈ' എന്ന ഹോളിവുഡ് സിനിമയെ അനുസ്മരിപ്പിക്കുന്ന അദ്ഭുത കഥയാണ് അല്ദിന്റേത്. ഇന്തൊനീഷ്യക്കാര് റോംപോങ് എന്ന് വിളിക്കുന്ന 'മീന്കെണി വഞ്ചിയില്' വിളക്കുകള് തെളിക്കുന്ന ജോലിയായിരുന്നു അല്ദിക്ക്. ദിവസങ്ങളോളം ഒറ്റയ്ക്കു താമസം. ആഴ്ചയിലൊരിക്കല് മുതലാളി ഭക്ഷണവും വെള്ളവും ഇന്ധനവും എത്തിക്കും. ജൂലൈയിലെ ഒരു ദിവസം, കരയിലേക്കു വലിച്ചുകെട്ടിയ കയറുപൊട്ടി വഞ്ചി ആഴക്കടലിലേക്കു നീങ്ങി.
ദിവസങ്ങള്കൊണ്ടു ഭക്ഷണം തീര്ന്നു. മീന്പിടിച്ചു വേവിച്ച് വിശപ്പടക്കി. ഏതാനും ദിവസം കഴിഞ്ഞപ്പോള് പാചകവാതകം തീര്ന്നു. അതോടെ അല്ദി, വഞ്ചിയുടെ തടികൊണ്ടുള്ള വേലിപോലുള്ള ഭാഗം വെട്ടിയെടുത്ത് കത്തിച്ചു പാചകം ചെയ്തു. കടല്ത്തിരയില് വസ്ത്രത്തില് വന്നുവീഴുന്ന വെള്ളം പിഴിഞ്ഞെടുത്താണു കുടിച്ചിരുന്നത്.
10 കപ്പലുകള് ഇതിനിടെ സമീപത്തുകൂടി പോയെങ്കിലും ആരും കണ്ടില്ല, രക്ഷിച്ചില്ല. ഒടുവില് ഓഗസ്റ്റ് 31-ന് പാനമ കപ്പല് രക്ഷപ്പെടുത്തി ജപ്പാനിലെത്തിച്ചു. അവിടെനിന്ന് എട്ടിന് നാട്ടിലെത്തി.
https://www.facebook.com/Malayalivartha