'സൂര്യ' തന്റെ ആദ്യഡ്യൂട്ടിയ്ക്ക് ധോണിയിലെത്തി!
മുത്തങ്ങ ആനപ്പന്തിയിലെ സീനിയര്താരം 'സൂര്യ' മുതുമലയിലെ കുങ്കി പരിശീലനത്തിനുശേഷം തിരിച്ചെത്തിയ ശേഷമുള്ള തന്റെ ആദ്യ ദൗത്യത്തിനിറങ്ങുന്നു. സൂര്യയുടെ ആദ്യ ഡ്യൂട്ടി പാലക്കാട് ജില്ലയിലെ ഒലവക്കോട് റെയ്ഞ്ചിന് കീഴിലുള്ള ധോണി വനമേഖലയിലെ ശല്യക്കാരായ കാട്ടാനകളെ തുരത്തിയോടിക്കലാണ് .
ചെറുപ്രായത്തിലേ മുത്തങ്ങപ്പന്തിയിലെത്തിയിരുന്നെങ്കിലും സൂര്യ എന്ന കൊമ്പനാനയെ ഇണക്കിയെടുത്ത് കുങ്കിയാനയാക്കാന് കഴിഞ്ഞിരുന്നില്ല. അടുത്തിടെ മുതുമലയിലെ കുങ്കി പരിശീലനത്തിനുശേഷം സൂര്യ അനുസരണയുള്ള ആനയായി. ഇതോടെയാണ് വനംവകുപ്പിന്റെ കാട്ടാനശല്യ പ്രതിരോധ പ്രവര്ത്തനങ്ങള്ക്കായി സൂര്യയെ നിയോഗിക്കാന് തീരുമാനിച്ചത്.
ധോണി വനത്തില്നിന്ന് ആനകള് കൂട്ടമായി ജനവാസകേന്ദ്രങ്ങളിലിറങ്ങി പ്രശ്നങ്ങള് സൃഷ്ടിക്കുന്നത് തടയുന്നതിനായി കുങ്കി പട്രോളിങ് ഉള്പ്പെടെയുള്ള പ്രവര്ത്തനങ്ങള് നടത്താനാണ് സൂര്യ മുന്നിലുണ്ടാവുക. സൂര്യയ്ക്കൊപ്പം കോന്നി സുരേന്ദ്രനെയും പാലക്കാട്ടേക്ക് കൊണ്ടുപോകാനായി തീരുമാനിച്ചിരുന്നെങ്കിലും മദപ്പാടിന്റെ ലക്ഷണങ്ങളുള്ളതിനാല് പിന്നീട് തീരുമാനം മാറ്റുകയായിരുന്നു.
തിങ്കളാഴ്ച വൈകീട്ടോടെ എലിഫന്റ് സ്ക്വാഡ് അസി. വൈല്ഡ് ലൈഫ് വാര്ഡന് എ.എസ്. ആശോക്, അസി. ഫോറസ്റ്റ് വെറ്ററിനറി ഓഫീസര് ഡോ. അരുണ് സഖറിയ എന്നിവരുടെ നേതൃത്വത്തിലുള്ള സംഘം സൂര്യയെ പാലക്കാട്ടേക്ക് കൊണ്ടുപോയി.
https://www.facebook.com/Malayalivartha