ദക്ഷിണാഫ്രിക്കയുടെ തലസ്ഥാനമായ പ്രിട്ടോറിയയിലെ സംരക്ഷണകേന്ദ്രത്തിലെ രണ്ടു സിംഹക്കുട്ടികളിലാണ് ലോകത്തിന്റെ ശ്രദ്ധ മുഴുവനും. ഇവിടത്തെ സിംഹ സംരക്ഷണകേന്ദ്രം കഴിഞ്ഞ ദിവസമാണ് ഈ സിംഹക്കുട്ടികളെ ലോകത്തിനു മുമ്പില്‍ അവതരിപ്പിച്ചത്. കാഴ്ചയില്‍ മറ്റു സിംഹക്കുട്ടികളേപ്പോലെതന്നെയെങ്കിലും ഇവരുടെ ജനനത്തിലാണ് പ്രത്യേകത.

ലോകത്തില്‍ ആദ്യമായി കൃത്രിമ ഗര്‍ഭധാരണത്തിലൂടെ ജന്മംകൊണ്ട സിംഹക്കുട്ടികളാണിവയെന്ന് യൂണിവേഴ്‌സിറ്റി ഓഫ് പ്രിട്ടോറിയ അവകാശപ്പെട്ടു. ആഫ്രിക്കന്‍ പെണ്‍സിംഹങ്ങളുടെ പ്രത്യുത്പാദനസംവിധാനത്തെക്കുറിച്ച് ഗവേഷണം നടത്തുന്ന യൂണിവേഴ്‌സിറ്റിയാണിത്. ഓഗസ്റ്റ് 25-നാണ് സിംഹക്കുട്ടികളുടെ ജനനം. 18 മാസത്തെ ഗവേഷണത്തിനുശേഷമാണ് പദ്ധതി വിജയകരമായതെന്ന് ഗവേഷക സംഘത്തിന്റെ മേധാവി ആന്‍ഡ്രി ഗാന്‍സ്വിഡ് പറഞ്ഞു.

ശ്രമം വിജയകരമായതോടെ മാര്‍ജാര വംശത്തില്‍ വംശനാശഭീഷണിയുള്ളവയ്ക്ക് കൃത്രിമ ഗര്‍ഭധാരണം സാധ്യമാക്കാന്‍ കഴിയുമെന്നാണ് പ്രതീക്ഷ. 26 ആഫ്രിക്കന്‍ രാജ്യങ്ങളില്‍ നിന്ന് സിംഹങ്ങള്‍ തുടച്ചുനീക്കപ്പെട്ടതായാണ് കണക്കുകള്‍. രണ്ടു പതിറ്റാണ്ടുകള്‍കൊണ്ട് എണ്ണത്തില്‍ 43 ശതമാനം കുറവുമുണ്ടായിട്ടുണ്ട്. ഇന്റര്‍നാഷണല്‍ യൂണിയന്‍ ഫോര്‍ കണ്‍സര്‍ വേഷന്‍ ഓഫ് നേച്ചറിന്റെ (ഐഎന്‍ സിഎന്‍ ) കണക്കുകള്‍ പ്രകാരം ഇനി 20,000 എണ്ണം മാത്രമേ അവശേഷിക്കുന്നുള്ളൂ. ഇതില്‍ ആഫ്രിക്കന്‍ സിംഹങ്ങള്‍ വംശനാശ സാധ്യതാപട്ടികയിലാണ്.