ഊട്ടി സസ്യോദ്യാനത്തിന്റെ അലങ്കാരമായിരുന്ന കുരങ്ങന്‍കേറാ മരത്തിന് തീപിടിച്ചു. തിങ്കളാഴ്ച വൈകുന്നേരം 5.30 ഓടേയാണ് 150 വര്‍ഷം പഴക്കമുള്ള മരത്തിന് തീപിടിച്ചത്. കുരങ്ങന്‍കേറാ മരമെന്ന പേര് ലഭിച്ചത് കുരങ്ങുകള്‍ കയറാന്‍ മടിക്കുന്ന മരമായതിനാലാണ്.

അഗ്‌നിശമനസേനയെത്തി തീകെടുത്തി. വൈകുന്നേരം ചാറ്റല്‍മഴയുണ്ടായിട്ടും തീപിടിക്കാനുള്ള കാരണം വ്യക്തമല്ല. മിന്നലാകാം കാരണമെന്ന് അഗ്‌നിശമനവകുപ്പ് പറഞ്ഞു. ഉദ്യാനം മാനേജര്‍  ശ്രീവിദ്യ സംഭവസ്ഥലത്തെത്തി സ്ഥിതിഗതി നിയന്ത്രിച്ചു. പുല്‍ത്തകിടിയിലും ഈ മരത്തിന്റെ ചുവട്ടിലും സഞ്ചാരികള്‍ കൂടുതലായി ഇരിക്കുക പതിവാണ്. എന്നാല്‍, തിങ്കളാഴ്ച സഞ്ചാരികള്‍ കുറവായത് കൂടുതല്‍ അപകടമൊഴിവാക്കി.

പല ഉദ്യാനങ്ങളിലെയും അലങ്കാരമരമാണ് കുരങ്ങന്‍കേറാ മരം. ആരങ്കരിയ ആരങ്കരിയാ എന്നതാണ് മരത്തിന്റെ ശാസ്ത്രനാമം. ഇതിന്റെ ഇലകള്‍ സൂചിപോലെ കൂര്‍ത്ത് നില്‍ക്കുന്നതിനാലാണ് കുരങ്ങന്മാര്‍ അകലം പാലിക്കുന്നത്. ചിലിയാണ് മരത്തിന്റെ ജന്മദേശം. ഉദ്യാനനിര്‍മാണത്തിനിടെ 1860-കളില്‍ ബ്രിട്ടീഷുകാരാണ് ഈ മരം നട്ടുവളര്‍ത്തിയത്.