ഓസ്‌ട്രേലിയയിലെ ക്യൂന്‍സ്‌ലന്‍ഡിലുള്ള റെയിന്‍ബോ ബീച്ച് ടൂറിസ്റ്റ് കേന്ദ്രമെന്ന നിലയില്‍ പ്രശസ്തമാണ് . എന്നാല്‍ ഇവിടെയിപ്പോള്‍ ബീച്ചിന്റെ ഒരു പ്രത്യേക ഭാഗത്തേക്കു പോകരുത് എന്ന് സഞ്ചാരികള്‍ക്ക് അധികൃതര്‍ മുന്നറിയിപ്പു നല്‍കിയിരിക്കുകയാണ്. അതിനു സമീപം വാഹനങ്ങള്‍ പാര്‍ക്കു ചെയ്യുകയോ ടെന്റ് കെട്ടി താമസിക്കുകയോ ചെയ്യരുത്. അതിനു കാരണവുമുണ്ട്.

ഏതാനും ദിവസം മുന്‍പാണ് ബീച്ചിന്റെ തീരം ഇടിഞ്ഞ് ഇവിടെ അഗാധ ഗര്‍ത്തം രൂപപ്പെട്ടത്. ഏതാനും വര്‍ഷത്തിനിടെ ഇതു മൂന്നാം തവണയാണ് റെയിന്‍ബോ ബീച്ചില്‍ തീരമിടിയുന്നത്. ഇത്തവണ പക്ഷേ ഇന്നേവരെയില്ലാത്ത ആഴത്തിലാണ് ഗര്‍ത്തം രൂപപ്പെട്ടത്.

ഇക്കഴിഞ്ഞ സെപ്റ്റംബര്‍ 23-ന് റെയിന്‍ബോ ബീച്ചിനു മുകളിലൂടെ സമീപത്തെ ഒരു ഹെലികോപ്റ്റര്‍ സര്‍വീസ് കമ്പനി പട്രോളിങ് നടത്തിയിരുന്നു. അത് സ്ഥിരം ചെയ്യുന്നതുമാണ്. എന്നാല്‍ തൊട്ടടുത്ത ദിവസം ഒരു പ്രദേശവാസിയാണ് തീരം ഇടിഞ്ഞതായുള്ള വിവരം അറിയിക്കുന്നത്.

ഹെലികോപ്റ്റര്‍ വഴി നിരീക്ഷണം നടത്തിയപ്പോഴാകട്ടെ ആകാശത്തു നിന്ന് ആ ഞെട്ടിക്കുന്ന കാഴ്ചയും കണ്ടു. ബീച്ചിനോടു ചേര്‍ന്ന് വൃത്താകൃതിയില്‍ കൂറ്റന്‍ ഗര്‍ത്തത്തിന്റെ 'നീലനിഴല്‍'! രാത്രിയില്‍ ആരും അവിടെ ക്യാംപ് ചെയ്യാതിരുന്നതു കൊണ്ടു മാത്രമാണ് ജീവാപായം ഉണ്ടാകാത്തത്.

ബീച്ചിനു താഴെയുള്ള പാറക്കെട്ടുകള്‍ ദുര്‍ബലമായി, മണ്ണിടിഞ്ഞ് രൂപപ്പെട്ടതാണ് ഇതെന്നായിരുന്നു ആദ്യം കരുതിയിരുന്നത്. എന്നാല്‍ പിന്നീടാണു തെളിഞ്ഞത്, ഇത് കടലിലെ അടിയൊഴുക്കിന്റെ ഫലമായുണ്ടായതാണെന്ന്.

അടിയൊഴുക്ക് ശക്തമായതോടെ ബീച്ചിനോടു ചേര്‍ന്നു താഴെയുള്ള മണല്‍ കൂട്ടത്തോടെ ഒലിച്ചു പോയി. അതോടെ കരയിടിഞ്ഞ് ഗര്‍ത്തം രൂപപ്പെടുകയും ചെയ്തു. 'നിയര്‍ഷോര്‍ ലാന്‍ഡ്‌സ്‌ലിപ്പ്' എന്നായിരുന്നു ഈ പ്രതിഭാസത്തിന്റെ പേര്.

ഇതുവഴി രൂപപ്പെട്ട ഗര്‍ത്തത്തിന് ഏകദേശം 650 അടി വീതിയുണ്ട്. ആഴമാകട്ടെ ഏകദേശം 25 അടിയും. അതായത്, ഒത്ത ഉയരമുള്ള നാലു പേര്‍ ഒന്നിനു മുകളില്‍ ഒന്നായി കയറി നിന്നാലുള്ളത്ര ആഴത്തിലാണ് ഗര്‍ത്തം!