സഹിക്കാനാവാത്ത തലവേദന മൂലം കിടക്കയിലേയ്ക്ക് വീണതുമാത്രമേ ഇംഗ്ലണ്ടിലെ ഒല്‍ഥാമിലെ പതിനെട്ടുകാരിയായ എബണി സ്റ്റീവന്‍സണ് ഓര്‍മ്മയുള്ളൂ. അതിയായ തലവേദനകാരണം ബോധം മറഞ്ഞ് ആശുപത്രിയിലെത്തിച്ച യുവതി നാലുദിവസങ്ങള്‍ക്കു ശേഷം അറിയുന്നത് താനൊരു അമ്മയായ വാര്‍ത്തയാണ്. പെട്ടെന്നൊരു ദിവസം അമ്മയായത് അറിഞ്ഞതിന്റെ ആഹ്ലാദത്തിലാണിപ്പോള്‍ എബണി.

ഇരട്ടഗര്‍ഭപാത്രം ഉണ്ടാവുന്ന യൂട്ട്രസ് ടിഡെല്‍ഫിസ് എന്ന അവസ്ഥയായിരുന്നു എബണിക്ക്. അന്നു രാത്രി തുടര്‍ച്ചയായി തലചുറ്റലും ബോധക്ഷയവുമൊക്കെ ഉണ്ടായതോടെ എബണിയുടെ അമ്മ എമര്‍ജന്‍സി നമ്പര്‍ വിളിച്ച് ആശുപത്രിയില്‍ എത്തിക്കുകയായിരുന്നു. ആശുപത്രിയില്‍ എത്തിയപ്പോഴാണ് എബണിയുടെ ഒരു ഗര്‍ഭപാത്രത്തില്‍ കുഞ്ഞ് വളരുന്നുണ്ടെന്ന വിവരം ആശുപത്രി അധികൃതര്‍ അറിയിച്ചത്. ഉടന്‍ തന്നെ സര്‍ജറി ആവശ്യമാണെന്നും അറിയിച്ചു. കോമയില്‍ ആയിരിക്കുമ്പോള്‍ എബണിക്ക് രക്തസമ്മര്‍ദവും വര്‍ധിച്ചതോടെയാണ് ഡോക്ടര്‍മാര്‍ അടിയന്തര ശസ്ത്രക്രിയയ്ക്ക് വിധേയയാക്കാന്‍ തീരുമാനിച്ചത്.

തനിക്കു സുഖമില്ലെന്നു തോന്നിയപ്പോള്‍ ബെഡില്‍ കിടന്നതു മാത്രമേ എബണിക്ക് ഓര്‍മയുള്ളു, പിന്നീടവള്‍ എഴുന്നേല്‍ക്കുമ്പോള്‍ പൂര്‍ണ ആരോഗ്യവതിയായ ഒരു പെണ്‍കുഞ്ഞും കൂടെയുണ്ട്. ആദ്യമൊക്കെ ആശുപത്രി അധികൃതര്‍ക്ക് അബദ്ധം പറ്റിയതാകുമെന്നാണ് എബണി ചിന്തിച്ചിരുന്നത്. കാരണം ആര്‍ത്തവം മുറതെറ്റാതെ വന്നിരുന്നു. ഗര്‍ഭത്തിന്റേതായ അവശതകളോ എന്തിനധികം വലിയ വയറുപോലും ഇല്ലായിരുന്നുവെന്ന് എബണി ബിബിസിക്കു നല്‍കിയ അഭിമുഖത്തില്‍ പറയുന്നു.

രണ്ടു ഗര്‍ഭപാത്രം ഉണ്ടായിരുന്നതിനാല്‍ കുഞ്ഞു വളര്‍ന്നു കൊണ്ടിരുന്ന ഗര്‍ഭപാത്രത്തില്‍ നിന്നുള്ള ആര്‍ത്തവം മാത്രമേ നിലച്ചിരുന്നുള്ളൂ. മറ്റേ ഗര്‍ഭപാത്രത്തില്‍ നിന്നും ക്രമം തെറ്റാതെ ആര്‍ത്തവം ഉണ്ടാകുമായിരുന്നു.

കുഞ്ഞു വളര്‍ന്നു കൊണ്ടിരുന്ന ഗര്‍ഭപാത്രം നട്ടെല്ലിനു പുറകുഭാഗത്തായിരുന്നതിനാല്‍ വയറും വലുതായില്ല. അമ്മ ആകണമെന്നാഗ്രഹിച്ചുകൊണ്ടായിരുന്നില്ല ആ കൗമാരക്കാരി ജീവിച്ചിരുന്നതെന്നതിനാല്‍ കുഞ്ഞിന്റെ പിതാവിനെ കുറിച്ചുള്ള വിവരങ്ങള്‍ പരസ്യമാക്കിയിട്ടില്ല.