പോര്‍ച്ചുഗലിന്റെ വടക്കുഭാഗത്തായി രണ്ട് ഗ്രാമങ്ങളെ ബന്ധിപ്പിച്ച് നിര്‍മിച്ചിട്ടുള്ള ഒരു പാലമുണ്ട്. കാടുകളാല്‍ മൂടപ്പെട്ട രണ്ടു മലനിരകള്‍ക്കിടയില്‍ ഈ യൂറോപ്യന്‍ രാജ്യത്തില്‍ റബഗാവോ നദിക്ക് കുറുകെയുള്ള ഈ പാലത്തിന് നൂറ്റാണ്ടുകള്‍ പഴക്കമുണ്ട്. ഈ പാലത്തിന്റെ നിര്‍മാണത്തെപ്പറ്റി ഈ പ്രദേശവാസികളുടെ ഇടയില്‍ ഭീതി ജനിപ്പിക്കുന്ന ഒരു കഥ പ്രചാരത്തിലുണ്ട്.

ആ കഥ ഇങ്ങനെയാണ്. ഇവിടത്തെ മലനിരയില്‍ താമസിച്ചിരുന്ന ആളുകളെ കൊള്ളയടിച്ച് കഴിഞ്ഞിരുന്ന ഒരു മോഷ്ടാവുണ്ടായിരുന്നു. ഒരിക്കല്‍ നാട്ടുകാരെല്ലാവരുംകൂടി ഇയാളെ പിടികൂടി. എന്നാല്‍ അവരുടെ ഇടയില്‍നിന്ന് രക്ഷപ്പെട്ട് ഓടിയ ആ മോഷ്ടാവ് റബഗാവോ നദിയുടെ തീരത്തെത്തി. ഈ നദി കടക്കാതെ തനിക്ക് രക്ഷയില്ലെന്ന് മോഷ്ടാവിന് മനസിലായി.

ഈശ്വരനില്‍ വിശ്വാസമില്ലാതിരുന്ന ആ കള്ളന്‍ പിശാചിനെ വിളിച്ചാണ് പ്രാര്‍ഥിച്ചത്. ഉടന്‍ തന്നെ കള്ളന്റെ മുമ്പില്‍ പ്രത്യക്ഷപ്പെട്ട പിശാച് അവന് എന്താണ് വേണ്ടതെന്ന് ചോദിച്ചു. നദി കടക്കാന്‍ ഒരു പാലം പണിതുതരണമെന്ന് കള്ളന്‍ ആവശ്യപ്പെട്ടു. പാലം പണിതുകൊടുത്ത പിശാച് പക്ഷെ പാലം കടക്കുമ്പോള്‍ തിരിഞ്ഞു നോക്കാന്‍ പാടില്ലെന്ന് കള്ളനോട് പറഞ്ഞു.

പിശാച് പറഞ്ഞതുപോലെ കള്ളന്‍ പാലം കടന്നു. കള്ളന്‍ പാലം കടന്നതോടെ പിശാച് പണിത പാലം അപ്രത്യക്ഷമായി. ഇതിനുള്ള പ്രത്യുപകാരമായി മരിക്കുമ്പോള്‍ തന്റെ ആത്മാവിനെ പിശാചിന് നല്‍കാമെന്ന് കള്ളന്‍ പറഞ്ഞു. നാളുകള്‍ കടന്നു പോയി. തന്റെ അവസാന നാളുകളില്‍ കള്ളന് മാനസാന്തരമുണ്ടായി. തന്റെആത്മാവിനെ രക്ഷിക്കണമെന്ന് ആവശ്യപ്പെട്ട് കള്ളന്‍ ഒരു പുരോഹിതന്റെ അടുത്തെത്തി.

കള്ളന്റെ കഥ കേട്ട പുരോഹിതന്‍ അയാളെ രക്ഷിക്കാനായി ആ പാലമുണ്ടായ സ്ഥലത്തുചെന്നു. എന്നിട്ട് കള്ളന്‍ പ്രാര്‍ഥിച്ചതുപോലെ പ്രാര്‍ഥിച്ച് പിശാചിനെ വരുത്തി. പുരോഹിതന് നദി കടക്കുന്നതിനായി പിശാച് പാലം ഉണ്ടാക്കി. അപ്പോള്‍ പുരോഹിതന്‍ തന്റെ കൈയിലിരുന്ന വിശുദ്ധ വെള്ളം തളിച്ച് പിശാചിനെ നശിപ്പിച്ചു. അങ്ങനെയാണത്രെ ഈ പാലം ഉണ്ടായത്. ഈ നാട്ടിലുള്ളവര്‍ ഇപ്പോഴും ഈ പാലം കടക്കുമ്പോള്‍ തിരിഞ്ഞു നോക്കാറില്ല.

കല്ലുകൊണ്ടുള്ള ഈ പാലത്തിന് മറ്റു ചില പ്രത്യേകതകളും കല്‍പ്പിച്ചു കിട്ടിയിട്ടുണ്ട്. മക്കളില്ലാത്ത ദമ്പതികള്‍ ഈ പാലത്തില്‍നിന്ന് പ്രാര്‍ഥിച്ചാല്‍ അവര്‍ക്ക് മക്കളെ ലഭിക്കുമെന്ന ഒരു വിശ്വാസം പ്രദേശവാസികള്‍ക്കിടയിലുണ്ട്.