ഓടിത്തേഞ്ഞ ടയറുകൊണ്ട് എന്താണ് ഉപയോഗമെന്നു ചോദിച്ചാല്‍...അതുകൊണ്ട് എന്ത് ഉപയോഗം എന്നൊരു മറുചോദ്യമാവും ഉത്തരം.

എന്നുമാത്രമല്ല ടയറില്‍ വെള്ളം കെട്ടിക്കിടന്ന് പരിസ്ഥിതി മലീമസമാകും എന്നുകൂടി പറയാന്‍ പലര്‍ക്കും കഴിയുകയും ചെയ്യും.

എന്നാല്‍ ഓടിത്തേഞ്ഞ ടയര്‍, കോട്ടയം കല്ലറയിലെ വിനുനിവാസില്‍ വിജയന് തന്റെ കരവിരുതും കലാചാതുരിയും പ്രകടിപ്പിക്കാനുള്ള ഉപാധിയാണ്!

 കരകൗശല വിദ്യയില്‍ പുതിയ പരീക്ഷണം നടത്തി വിജയവിസ്മയം തീര്‍ക്കുകയാണ് വിജയന്‍. കാഴ്ചയ്ക്ക് ഏഴഴകുള്ള പൂച്ചട്ടികളാണ് ഈ 54-കാരന്‍ പഴകിത്തേഞ്ഞ ടയറുകളില്‍നിന്ന് രൂപപ്പെടുത്തിയെടുക്കുന്നത്. ഒരു വര്‍ഷം മുന്‍പാണ് ഇങ്ങനെയൊരു ആശയം തന്റെ മനസില്‍ തോന്നിയതെന്ന് വിജയന്‍ പറയുന്നു. തുടര്‍ന്ന് മനസിലുള്ള പൂച്ചട്ടി ടയറിലൊരുക്കുന്നതിനുളള ശ്രമമാരംഭിക്കുകയായിരുന്നു.

കാറിന്റേയും മറ്റുവാഹനങ്ങളുടെയുമൊക്കെ ടയറുകളില്‍ തീര്‍ത്ത പൂച്ചട്ടികള്‍ വിജയന്റെ വീട്ടുമുറ്റത്തുണ്ട്. 150 രൂപയ്ക്കും 200 രൂപയ്ക്കുമാണ് ഇവ വില്‍പ്പനയ്ക്കുവച്ചിരിക്കുന്നത്. ഏറെനാള്‍ കേടുകൂടാതിരിക്കും എന്നതിനൊപ്പം ചെടികളില്‍ കാര്യമായി ചൂടേല്‍ക്കാതിരിക്കുമെന്നതും ടയര്‍ പൂച്ചട്ടികളുടെ മേന്മയാണെന്ന് വിജയന്‍ പറയുന്നു.

ചെത്തുളികൊണ്ട് ചെത്തിമിനുക്കിയെടുത്താണ് ഇവ നിര്‍മിക്കുന്നത്. രണ്ടു പാളികളായി ചെത്തിയെടുത്ത് ചെറിയ സ്‌ക്രൂകള്‍ ഉപയോഗിച്ച് ബന്ധിക്കുന്നതോടെ ടയര്‍പൂച്ചട്ടി തയ്യാര്‍. മനസിലുള്ള ഡിസൈന്‍ ടയറില്‍ കൊത്തിയെടുക്കുന്നത് ഏറെ ശ്രമകരമാണെന്നു വിജയന്‍ പറയുന്നു. വളരെയധികം ശ്രദ്ധിച്ചില്ലെങ്കില്‍ കൈക്കു പരിക്കേല്‍ക്കാനുള്ള സാധ്യതയുണ്ടത്രേ.

ഏകദേശം മൂന്നു മണിക്കൂര്‍ ചെലവിട്ടാണ് ഒരു ടയര്‍ച്ചെടിച്ചട്ടി നിര്‍മിക്കുക. ആവശ്യക്കാര്‍ക്ക് ടയര്‍ചട്ടികള്‍ പെയിന്റടിച്ചും വിജയന്‍ നല്‍കാറുണ്ട്. പൂച്ചട്ടികള്‍ക്കു പുറമേ അലങ്കാര മത്സ്യം വളര്‍ത്തുന്നതിനുള്ള ചട്ടികളും വിജയന്‍ ടയറുപയോഗിച്ച് നിര്‍മിക്കുന്നുണ്ട്. അല്പംപോലും ചോര്‍ച്ചയുണ്ടാകാത്തരീതിയിലാണ് ഇതിന്റെ നിര്‍മാണം. ചിരട്ടകള്‍ ഉപയോഗിച്ച് നിര്‍മിച്ച അലങ്കാര വസ്തുക്കളും വിനുനിവാസിലെത്തുന്നവര്‍ക്കു കാണാനാകും.