ഇടുക്കിയില്‍ ബാള്‍സം വസന്തം
ഇടുക്കിയില്‍ കുമളി-മൂന്നാര്‍ സംസ്ഥാന പാതയില്‍ നെടുങ്കണ്ടം മുതല്‍ ഗ്യാപ്പ് റോഡ് വരെ ഇപ്പോള്‍ ബാള്‍സം വസന്തമാണ്. വിവിധ നിറത്തിലും രൂപത്തിലുമുള്ള ബാള്‍സം പൂക്കള്‍ കാണാന്‍ ഒട്ടേറെ സഞ്ചാരികളുമെത്തുന്നുണ്ട്.
ലോകത്തിലെമ്പാടുമായി ഇന്‍പേഷ്യന്‍സ് വര്‍ഗത്തില്‍പെട്ട 900-ല്‍ അധികം ബാള്‍സങ്ങള്‍ ആണുള്ളത്. അവയില്‍ ചിലതുമാത്രമാണ് പൂന്തോട്ടങ്ങളില്‍ നട്ടുവളര്‍ത്തുന്ന ബാള്‍സങ്ങള്‍. ഇടുക്കിയുടെ ഹൈറേഞ്ച് മേഖലയില്‍ ഇപ്പോള്‍ എത്തിയാല്‍ മറ്റുള്ളവയില്‍ ചിലതിനെ കാണാനാവും. നീര്‍ച്ചാലുകള്‍ ഒഴുകുന്ന പാറക്കെട്ടുകള്‍ക്കരികിലും, വഴിയോരത്തുമെല്ലാം ബാള്‍സം വസന്തം കാണാം.
മണ്ണില്‍ ജലാംശവും , തണുപ്പു കൂടിയ അന്തരീക്ഷവും ബാള്‍സങ്ങള്‍ക്ക് അനുയോജ്യമായ കാലാവസ്ഥയാണ്. ഇവയെല്ലാം ഒത്തിണങ്ങിയ ഇടുക്കിയിലെ മലനിരകള്‍ ഇവയുടെ പറുദീസയാണ്. പശ്ചിമഘട്ടങ്ങളില്‍ മാത്രം കണ്ടു വരുന്നത് 90 ഇനം ബാള്‍സങ്ങളാണ്. ഇടുക്കിയുടെ ഹൈറേഞ്ചില്‍ മാത്രം 56 ഇനങ്ങള്‍ കണ്ടെത്തിയിട്ടുണ്ട്.
ബാള്‍സം ചെടിയുടെ വിത്തുമുളയ്ക്കുന്നത് മുതല്‍ വളര്‍ച്ചയും, പൂവിടലും,പരാഗണവും , കായ് പിടുത്തവും , വിത്തു വിതരണവുമെല്ലാം ഭൂപ്രകൃതിയുടെ സന്തുലനാവസ്ഥ ഉണ്ടെങ്കിലേ സാധ്യമാകു. പ്രകൃതിയുടെ സന്തുലിതാവസ്ഥക്ക് കോട്ടംതട്ടിയാല്‍ ഈ ബാള്‍സങ്ങളുടെ കൂട്ട വംശനാശമായിരിക്കും ഫലം.
https://www.facebook.com/Malayalivartha
