ഡോ. സുശ്രുതിന് സാഹെബ്രാവോ നടക്കുന്നത് കാണാനാവും!
നാഗ്പൂരിലെ ചന്ദ്രപൂര് ജില്ലയിലെ ഗോണ്ട്മൊഹാഡി ഗ്രാമത്തില് ഒളിവേട്ടക്കാരൊരുക്കിയ കെണിയില് വീണാണ് സാഹെബ്രാവോ എന്ന കടുവയ്ക്ക് അവന്റെ ഇടതു മുന്കാല്പാദം നഷ്ടപ്പെട്ടത്. 2012-ലാണ് സംഭവം. ആദ്യം ചെറിയ മുറിവാണുണ്ടായിരുന്നതെങ്കിലും പിന്നീടു മുറിവു പഴുത്തതോടെ ആ ഭാഗം ശസ്ത്രക്രിയയിലൂടെ മുറിച്ചുമാറ്റേണ്ടിവന്നു. ഇതേത്തുടര്ന്ന് നാഗ്പൂരിലെ ഗോരെവാഡ മൃഗശാലയിലെ വൈല്ഡ്ലൈഫ് റെസ്ക്യൂ സെന്ററിലാണ് സാഹെബ്രാവോയുടെ താമസം.
നാഗ്പൂരില് നിന്നുള്ള ഓര്ത്തോപീഡിക് സര്ജനായ ഡോ. സുശ്രുത് ബാബുല്ക്കര് 2016-ല് സാഹെബ്രാവോയെ ദത്തെടുത്തിരുന്നു. അന്നുമുതല് സാഹെബ്രാവോയ്ക്ക് കൃത്രിമക്കാല് വയ്ക്കുന്നതിന്റെ സാങ്കേതിക- ശാസ്ത്രീയ വശങ്ങളെക്കുറിച്ചുള്ള അന്വേഷണത്തിലായിരുന്നു ഡോ. സുശ്രുത്. വിദേശരാജ്യങ്ങളിലേക്കും നീണ്ട ആ അന്വേഷണം എത്തിനിന്നത് യുകെയിലെ ലീഡ്സ് സര്വകലാശാലയിലാണ്. നാലാഴ്ചയ്ക്കുള്ളില് സാഹെബ്രാവോക്ക് അവന്റെ പുതിയ കാലുകിട്ടും. നാഗ്പൂരില് തന്നെയാണ് കൃത്രിമക്കാല് നിര്മിക്കുന്നത്. സാഹെബ്രാവോ പഴയതുപോലെ നടക്കുന്നത് കാണാനാണ് താന് ആഗ്രഹിക്കുന്നതെന്ന് ഡോ. സുശ്രുത് പറയുന്നു.
ഇന്ത്യയിലെ ഡോക്ടര്മാര്ക്ക് ശസ്ത്രക്രിയയുമായി ബന്ധപ്പെട്ട് ആവശ്യമായ സഹായങ്ങള് ചെയ്യുന്നതും ചികിത്സയില് മേല്നോട്ടം വഹിക്കുന്നതും യുകെയില് നിന്നുള്ള സര്ജനും അസ്ഥി പുനരുജ്ജീവന വിദഗ്ധനുമായ പ്രഫ. ഗിന്നോഡിസാണ്. അവസാനഘട്ട ശസ്ത്രക്രിയയ്ക്ക് താന് നേരിട്ടെത്തുമെന്നും അദ്ദേഹം പറഞ്ഞു. 2014-ലെ സ്ഥിതിയില് നിന്ന് 30 ശതമാനം വര്ധനയാണ് ഇപ്പോള് കടുവകളുടെ എണ്ണത്തിലുള്ളത് എന്നു കേന്ദ്ര സര്ക്കാരിന്റെ കണക്കുകള് പറയുമ്പോഴും ഇത്തരത്തിലുള്ള കെണികളും അനധികൃത വേട്ടയുമെല്ലാം കടുവകളുടെ ജീവന് ഭീഷണിയായി തുടരുന്നു.
https://www.facebook.com/Malayalivartha