ട്വന്റി20 ലോകകപ്പിലെ സൂപ്പര്‍ എട്ട് റൗണ്ടില്‍ ആദ്യ മത്സരത്തില്‍ തന്നെ ഇന്ത്യയെ തോല്‍പ്പിച്ച് ദക്ഷിണാഫ്രിക്ക. 76 റണ്‍സിന്റെ വമ്പന്‍ തോല്‍വിയാണ് അഹമ്മദാബാദ് നരേന്ദ്ര മോദി സ്‌റ്റേഡിയത്തില്‍ ഇന്ത്യ വഴങ്ങിയത്. 188 റണ്‍സ് വിജയലക്ഷ്യം പിന്തുടര്‍ന്ന ഇന്ത്യ 18.5 ഓവറില്‍ 111 റണ്‍സെടുത്തു പുറത്തായി. 37 പന്തില്‍ 42 റണ്‍സടിച്ച ശിവം ദുബെ മാത്രമാണ് ഇന്ത്യന്‍ നിരയില്‍ തിളങ്ങിയത്. ഹാര്‍ദിക് പാണ്ഡ്യ (18), സൂര്യകുമാര്‍ യാദവ് (18), അഭിഷേക് ശര്‍മ (15) എന്നിവരാണ് ഇന്ത്യയുടെ മറ്റ് പ്രധാന സ്‌കോറര്‍മാര്‍.

ടോസ് നേടി ബാറ്റിങ്ങിനിറങ്ങിയ ദക്ഷിണാഫ്രിക്ക 20 ഓവറില്‍ ഏഴു വിക്കറ്റ് നഷ്ടത്തില്‍ 187 റണ്‍സെടുത്തു. അര്‍ധ സെഞ്ചറി നേടിയ ഡേവിഡ് മില്ലറാണ് ദക്ഷിണാഫ്രിക്കയുടെ ടോപ് സ്‌കോറര്‍. 35 പന്തുകള്‍ നേരിട്ട മില്ലര്‍ മൂന്ന് സിക്‌സും ഏഴു ഫോറുകളുമുള്‍പ്പടെ 63 റണ്‍സടിച്ചു പുറത്തായി. ഡെവാള്‍ഡ് ബ്രെവിസ് (29 പന്തില്‍ 45), ട്രിസ്റ്റന്‍ സ്റ്റബ്‌സ് (24 പന്തില്‍ 44) എന്നിവരാണു ദക്ഷിണാഫ്രിക്കയുടെ മറ്റു പ്രധാന സ്‌കോറര്‍മാര്‍.

തുടര്‍ച്ചയായി നാലു വിജയങ്ങളുമായെത്തിയ ഇന്ത്യന്‍ ബാറ്റിങ് നിരയെ ഒന്നുമല്ലാതാക്കുന്ന പ്രകടനമാണ് ദക്ഷിണാഫ്രിക്ക പുറത്തെടുത്തത്. ദക്ഷിണാഫ്രിക്കന്‍ ബോളര്‍മാര്‍ക്കു മുന്നില്‍ ഇന്ത്യയുടെ മുന്‍നിര ബാറ്റര്‍മാര്‍ തകര്‍ന്നത് മത്സരത്തില്‍ തിരിച്ചടിയായി. പ്രതീക്ഷിച്ചപോലെ തന്നെ ഇന്ത്യന്‍ ടോപ് ഓര്‍ഡറിനെ ലക്ഷ്യമിട്ട് സ്പിന്നര്‍ എയ്ഡന്‍ മാര്‍ക്രമാണ് ദക്ഷിണാഫ്രിക്കയുടെ ആദ്യ ഓവര്‍ എറിഞ്ഞത്. മാര്‍ക്രം ഒരുക്കിയ കുരുക്കില്‍ നാലാം പന്തില്‍ ഇഷാന്‍ കിഷന്‍ വീണു. റയാന്‍ റിക്കിള്‍ട്ടനിന്റെ ക്യാച്ചില്‍ ഇന്ത്യന്‍ ഓപ്പണിങ് സഖ്യം പൊളിഞ്ഞു. തിലക് വര്‍മയും വന്നപോലെ മടങ്ങി. ലോകകപ്പിലെ ആദ്യ റണ്‍ സ്‌കോര്‍ ചെയ്യാനായെങ്കിലും പതിവു വമ്പനടികള്‍ പുറത്തെടുക്കാന്‍ അഭിഷേകിനു സാധിച്ചില്ല. ഒരു സിക്‌സും രണ്ട് ഫോറുകളും ബൗണ്ടറി കടത്തിയെങ്കിലും മാര്‍കോ യാന്‍സന്റെ പന്തില്‍ കോര്‍ബിന്‍ ബോഷ് ക്യാച്ചെടുത്ത് പുറത്താക്കി. ആദ്യ ആറോവറുകളില്‍ 31 റണ്‍സാണ് ഇന്ത്യ നേടിയത്. വാഷിങ്ടന്‍ സുന്ദറും (11), സൂര്യകുമാര്‍ യാദവും (18) പ്രതിരോധിച്ചുനില്‍ക്കാന്‍ ശ്രമിച്ചെങ്കിലും കോര്‍ബിന്‍ ബോഷിന്റെ പന്തുകളില്‍ ഇരുവരും വീണു. ഇതോടെ അഞ്ചിന് 51 റണ്‍സെന്ന നിലയിലായി ഇന്ത്യ.

ഇന്ത്യയുടെ ലോവര്‍ മിഡില്‍ ഓര്‍ഡറിനെ തകര്‍ത്തെറിഞ്ഞത് ഇന്ത്യന്‍ വംശജനായ സ്പിന്നര്‍ കേശവ് മഹാരാജായിരുന്നു. മഹാരാജിന്റെ 15–ാം ഓവറിലെ ആദ്യ പന്തില്‍ ഹാര്‍ദിക് പാണ്ഡ്യയും മൂന്നാം പന്തില്‍ റിങ്കു സിങ്ങും (പൂജ്യം), ആറാം പന്തില്‍ അര്‍ഷ്ദീപ് സിങ്ങും മടങ്ങി. ഇതോടെ എട്ടു വിക്കറ്റ് നഷ്ടത്തില്‍ 88 റണ്‍സെന്ന ദയനീയാവസ്ഥയിലേക്ക് ഇന്ത്യ വീണു. തുടര്‍ച്ചയായി ബൗണ്ടറികള്‍ കണ്ടെത്തിയ ശിവം ദുബെയാണ് സ്‌കോര്‍ 100 കടത്തിയത്. എന്നാല്‍ മാര്‍കോ യാന്‍സന്‍ എറിഞ്ഞ 19–ാം ഓവറില്‍ ബൗണ്ടറിക്കു ശ്രമിച്ച ദുബെയെ ലുങ്കി എന്‍ഗിഡി പിടിച്ചെടുത്തു. ഇതോടെ ഇന്ത്യയുടെ പോരാട്ടം 111 ല്‍ അവസാനിച്ചു. ദക്ഷിണാഫ്രിക്കയ്ക്കായി പേസര്‍ മാര്‍കോയാന്‍സന്‍ നാലും സ്പിന്നര്‍ കേശവ് മഹാരാജ് മൂന്നും വിക്കറ്റുകള്‍ വീഴ്ത്തി. കോര്‍ബിന്‍ ബോഷ് രണ്ടു വിക്കറ്റുകള്‍ സ്വന്തമാക്കി.