പഴയതലമുറയുടെ രുചികള്‍ പരീക്ഷിക്കാനുള്ള നല്ല അവസരമാണ് ലോക്ഡൗണ്‍ സമയത്തുള്ള ഈ വീട്ടിലിരുപ്പ്.

നാട്ടിലെ ആഞ്ഞിലിമരങ്ങളില്‍ കായകളുടെ (ആനിക്കവിള) സമയമാണിപ്പോള്‍. പഴുത്ത കായകളുടെ പരിപ്പു വറുത്താല്‍ അതിനു കശുവണ്ടിപരിപ്പിനോടു കിടപിടിക്കുന്ന രുചിയാണെന്നാണ് നാട്ടുവിശേഷം.

ആഞ്ഞിലി മരങ്ങളില്‍ നിന്നു മൂത്തു പഴുപ്പെത്തിയ കായകള്‍ അടര്‍ന്നു നിലത്തു വീഴുന്നതോടെ ഉള്ളിലെ ചുളകളും ചിതറിത്തെറിക്കും.

ചുളകളുടെ മാംസളഭാഗം നീക്കിയാല്‍ കായ് മാത്രമായി ലഭിക്കും. ഇത് കഴുകി ഉണക്കിയാണു വറുക്കുന്നത്. മണ്‍ചട്ടിയാണു വറുക്കുന്നതിനു യോജിച്ചത്.

പുറം തൊലി കരിയുന്ന ഘട്ടമെത്തിയാല്‍ അടുപ്പില്‍ നിന്ന് ഇറക്കാം. ചൂടു കുറയുന്നതോടെ സിമന്റ് പ്രതലത്തില്‍ വിരിച്ചു കൈപ്പത്തി കൊണ്ടു അമര്‍ത്തി തിരുമ്മിയാല്‍ പരിപ്പു മാത്രമായി തെളിയും. വൈകുന്നേരങ്ങളിലെ ചായക്കൊപ്പവും ഉപയോഗിക്കാമത്രേ.