ലോക് ഡൗണിലെ വേറിട്ട കാഴ്ചകള്, കാട്ടാനകള് നാട്ടില്... റെയില്വേ ട്രാക്കില് മയിലുകള്!
ട്രെയിന് സര്വീസുകള് നിലച്ചപ്പോള് വാളയാര് വനമേഖലയിലൂടെ കടന്നുപോകുന്ന റെയില്വേ ട്രാക്ക്, വന്യജീവികളുടെ ഇടത്താവളമായി. വാളയാര് റെയില്വേ ട്രാക്കിലൂടെ പീലി നിവര്ത്തി കടന്നുപോകുന്ന ആണ്മയിലും അതിനെ പിന്തുടരുന്ന പെണ്മയിലുകളും. മാനും മ്ലാവും മയിലും മുയലും തുടങ്ങി കാട്ടാനകള് വരെ ട്രാക്കിലൂടെ യാത്ര ചെയ്യുന്നത് ലോക് ഡൗണ് സമയത്തെ വേറിട്ട കാഴ്ചയാണെന്ന് റെയില്വേ ട്രാക്ക്മാന്മാര് പറയുന്നു.
കുളത്തൂപ്പുഴയിലാകട്ടെ കോവിഡ് 19 രോഗഭീതിയെ തുടര്ന്ന് ജനങ്ങള് വീടുകളില് ഒതുങ്ങുമ്പോള് കാടുവിട്ടു പുറത്തിറങ്ങി വിലസുന്നത് വാനരക്കൂട്ടം. കാടുവിട്ടു വനാതിര്ത്തികളില് തമ്പടിച്ചു കാട്ടാനകളും കാട്ടുപോത്തും. കാട്ടുപന്നികളുടെ വിളയാട്ടം വേറെയും. വീടുകളിലും പരിസരങ്ങളിലും ഭീതി പരത്തി വാനരക്കൂട്ടം വിലസുന്നു. ആട്ടിയോടിക്കാന് ശ്രമിച്ചാല് ആക്രമിക്കാന് ഒരുങ്ങുന്ന ഇവയുടെ ഭീഷണി കൂട്ടത്തോടെ അടുക്കള വരെയെത്തുന്നു.
കാട്ടാനകള് വനാതിര്ത്തികളിലെ കല്ലടയാറിന്റെ തീരങ്ങളില് തമ്പടിച്ചിരിക്കയാണ്. വനാന്തര്ഭാഗങ്ങളില് ജലക്ഷാമം രൂക്ഷമായതാണ് കാരണം. കുളത്തൂപ്പുഴ പട്ടണത്തിന് ഒരു കിലോമീറ്റര് അകലത്തല്ലാതെ വനത്തിലാണു കാട്ടുപോത്തിന്റെ സാന്നിധ്യം. വനാതിര്ത്തിയിലെ കല്ലടയാറ്റില് ധാരാളം വെള്ളം കെട്ടിനില്ക്കുന്ന ഭാഗത്തായാണു കാട്ടുപോത്തിന്റെ താവളം.
നാട്ടിന്പുറത്തെത്തി ചക്കയും മാങ്ങയും പേരയ്ക്കയും ഒക്കെ അകത്താക്കുകയാണു വാനരക്കൂട്ടം. കാട്ടിലെ ഭക്ഷ്യദൗര്ലഭ്യത്തിനു പരിഹാരമായി വനംവകുപ്പ് ഫലവൃക്ഷങ്ങള് നട്ടുവളര്ത്തിയെങ്കിലും പ്രയോജനപ്പെടുന്നില്ല. മരച്ചീനി ഉള്പ്പെടുന്ന കിഴങ്ങുകള് മണ്ണില് കുത്തി മലര്ത്തിയാണു പന്നികളുടെ വിളയാട്ടം. അര്ധരാത്രി കൂട്ടത്തോടെ നിരയായി എത്തുന്ന പന്നികള് വ്യാപക കൃഷിനാശം വരുത്തിയാണു തിരികെ കാടുകയറുക.
https://www.facebook.com/Malayalivartha
