ഡാര്‍വിന്റെ പരിണാമ സിദ്ധാന്തത്തിലേക്കുള്ള നിര്‍ണ്ണായക വഴിത്തിരിവു നല്‍കിയ ദ്വീപാണ് ഗലപ്പാഗോസ് ദ്വീപ്. പസഫിക്കിലെ ഈ ഒറ്റപ്പെട്ട ദ്വീപിന്റെ പ്രത്യേകതകളാണ് പരിണാമത്തെക്കുറിച്ചുള്ള പഠനത്തിനു ഡാര്‍വിനെ സഹായിച്ചത്.

പുറമെയുള്ള ജീവിവര്‍ഗ്ഗങ്ങളില്‍ നിന്ന് ഒറ്റപ്പെട്ടുള്ള ഈ ദ്വീപിലെ ജീവികളുടെ ജീവിതരീതിയാണ് ഡാര്‍വിന്റെ പരിണാമ പഠനം എളുപ്പമാക്കിയതും. ഏതായാലും പതിറ്റാണ്ടുകള്‍ക്കു ശേഷം ഒരിക്കല്‍ കൂടി ഗലപ്പാഗോസ് ദ്വീപ് പരിണാമത്തിന്റെ പേരില്‍ ഗവേഷകരുടെ ശ്രദ്ധയാകര്‍ഷിച്ചിരിക്കുകയാണ്.

ഡാര്‍വിന്റെ കുരുവികള്‍ എന്നറിയപ്പെടുന്ന കുരുവികളിലാണ് രണ്ടു തലമുറ കൊണ്ടു പുതിയ ജീവിവര്‍ഗ്ഗം ഉടലെടുത്തതായി ഗവേഷകര്‍ കണ്ടെത്തിയത്. 36 വര്‍ഷം കൊണ്ടാണ് ഇവയില്‍ നിന്നു പുതിയ കുരുവി വര്‍ഗ്ഗമുണ്ടായത്.

ദ്വീപിലെ ഒറ്റപ്പെട്ട ജീവിതമാണ് ഇവയില്‍ ജനിതകപരമായ മാറ്റം ഉണ്ടാക്കിയതും അത് പുതിയ ജീവിവര്‍ഗത്തിന്റെ ഉദ്ഭവത്തിലേക്കു നയിച്ചതും. ഒരു ജീവിവര്‍ഗത്തില്‍ ഏറ്റവും വേഗത്തിലുണ്ടാക്കുന്ന പരിണാമമാണ് ഈ കുരുവി വര്‍ഗങ്ങളില്‍ രേഖപ്പെടുത്തിയത്.

ഉപ്‌സാലാ സര്‍വ്വകലാശാലയിലെ ഗവേഷകരാണ് ഈ കണ്ടെത്തല്‍ നടത്തിയത്. നാല്‍പ്പതു വര്‍ഷം മുന്‍പു ജനിച്ച പക്ഷിക്കുഞ്ഞുങ്ങള്‍ ഒറ്റപ്പെട്ടതോടെയാണ് പുതിയ ജീവിവര്‍ഗത്തിന്റെ പരിണാമത്തിലേക്കു നയിച്ചത്. ഗലപ്പാഗോ ദ്വീപ സമൂഹത്തിന്റെ ഭാഗമായ എസ്പിയാനോ ദ്വീപിലാണ് ഈ കുരുവിക്കുഞ്ഞുങ്ങള്‍ ഒറ്റപ്പെട്ടത്.

ഇതോടെ ഇവയ്ക്കു പുറമെ നിന്നുള്ള കുരുവികളുമായി ഇണ ചേരാന്‍ സാധിക്കാതെ വന്നു. തുടര്‍ന്നാണ് ഇവയ്ക്കിടയിലെ കുരുവികള്‍ തമ്മില്‍ ഇണ ചേര്‍ന്നതും പുറമേ നിന്നുള്ള കുരുവികളില്‍ നിന്നു വ്യത്യസ്തമായ കുരുവി വര്‍ഗ്ഗം രൂപപ്പെട്ടതും.

വലിപ്പത്തിലും ഇണയെ വിളിക്കാനുണ്ടാക്കുന്ന ശബ്ദത്തിലുമെല്ലാം പുതിയ ഗണത്തില്‍ പെട്ട പക്ഷികളില്‍ മറ്റു കുരുവികളില്‍ നിന്നു നേരിയ വ്യത്യാസങ്ങള്‍ കാണാം. ഒപ്പം ഇണ ചേരുന്ന സമയത്തിലും ഇവയ്ക്കു വ്യത്യാസമുണ്ട്.

മനുഷ്യരുടെ ഉല്‍പ്പത്തിയെക്കുറിച്ചുള്ള ഐതീഹ്യങ്ങള്‍ക്കും ഊഹാപോഹങ്ങള്‍ക്കും അന്ത്യം വരുത്തി ശാസ്ത്രീയമായി വിശദീകരണം നല്‍കിയ ഗവേഷകനാണ് ചാള്‍സ് ഡാര്‍വിന്‍. അദ്ദേഹത്തെ ഈ കണ്ടെത്തലിലേക്കു നയിച്ച ഗലപ്പാഗോ ദ്വീപില്‍ നിന്നുതന്നെ വീണ്ടും പരിണാമത്തെ കുറിച്ചുള്ള പുതിയ കണ്ടത്തലുകള്‍ ഉണ്ടാകുന്നുവെന്നതും ശ്രദ്ധേയമാണ്.