തടി കൂടിയതിനാല് സീലിന് ഡയറ്റിംഗും വ്യായാമവും നിര്ദേശിച്ചു!
ഒരു റെസ്ക്യൂ സാഞ്ചുറിയിലെ സീലിന് തടി കൂടിയതിനാല് അതിന് പുതിയ ഭക്ഷണക്രമവും വ്യായാമവും നിര്ദേശിച്ചു. കഴിഞ്ഞ ഏപ്രിലില് ഒരു വനത്തിനടുത്ത് നിന്നാണ് ഈ സീലിനെ പിടിച്ചത്. ഇപ്പോള് രണ്ടു വയസുള്ള അതിനു ജിങ്സ് എന്നാണ് പേരിട്ടിരിക്കുന്നത്. എന്നാല് വനത്തിലുള്ള വലിയ അരുവിയിലേക്ക് അതിനെ തിരികെ വിടാന് കഴിയാതെ വന്നു. അതിന് വയറിന് ചില അസുഖങ്ങള് ഉണ്ടായത് കൊണ്ടാണ് അതിനെ തിരികെ വിടാതിരുന്നത്.
മറ്റു ചില സീല് കുഞ്ഞുങ്ങളോടൊപ്പം പ്രത്യേക കൂട്ടിലാണ് ജിങ്സിനെ പാര്പ്പിച്ചിരുന്നത്. സാഞ്ചുറിയിലെ കീപ്പര്മാര് അവയ്ക്കായി മീന് കുഞ്ഞുങ്ങളെ ഭക്ഷണമായി ഇട്ടു കൊടുക്കുമ്പോള് ഒപ്പമുള്ള മറ്റു സീല് കുഞ്ഞുങ്ങള് കഴിക്കുന്നതിനേക്കാള് കൂടുതല് ഭക്ഷണം ഈ സീല് കുഞ്ഞു കഴിക്കാറുണ്ടായിരുന്നു. പിന്നെ ഉച്ച ഭക്ഷണം കഴിച്ചതിനു ശേഷവും തീരത്തു കയറി വെയില് കാഞ്ഞു വെറുതെ കിടക്കുകയായിരുന്നു അതിന്റെ ശീലം.
ചുരുക്കത്തില് തീറ്റയും ഉറക്കവും മാത്രമായി ജീവിത ചര്യ. അങ്ങനെ ജിങ്സിന്റെ ശരീര ഭാരം അമിതമായി വര്ധിക്കാന് തുടങ്ങി. രണ്ടു വയസു പ്രായമുള്ള ഒരു സീലിന് ഉണ്ടായിരിക്കേണ്ട ഭാരത്തെക്കാള് 18 കിലോയോളം ഭാരക്കൂടുതല് ആണ് ജിങ്ക്സിന് ഉള്ളത് എന്ന് മനസ്സിലാക്കിയതോടെയാണ് ഇത് ഇങ്ങനെ പോയാല് ശരിയാവില്ല എന്ന് അധികൃതര് തീരുമാനിച്ചത്.
കോണ്വാലില് ഉള്ള ഗ്വീക് സീല് സാഞ്ചുറി അധികൃതര് ജിങ്സിനെ സ്ലിം ബ്യൂട്ടി ആക്കാനുള്ള നടപടികള് ആരംഭിച്ചു. അതിനായി അതിനു നല്കിക്കൊണ്ടിരുന്ന മല്സ്യ ഭക്ഷണത്തിന്റെ അളവ് കുറച്ചു. കൂടാതെ വെള്ളത്തില് പൊങ്ങി കിടക്കുന്ന കളിപ്പാട്ടങ്ങള് അവള്ക്ക് ഇട്ടു കൊടുത്തു. ആ കളിപ്പാട്ടങ്ങള് കൈയ്യെത്തി പിടിക്കാനായി ശ്രമം നടത്തുമ്പോള് കൂടുതല് നീന്തേണ്ടി വരുമല്ലോ. അപ്രകാരം അവളുടെ ശരീര ഭാരം കുറയുമെന്നാണ് കണക്കു കൂട്ടുന്നത്.
മുമ്പ് ചെയ്തിരുന്നതില് നിന്നും വ്യത്യസ്തമായി എല്ലാവര്ക്കും കൂടിയുള്ള മല്സ്യം ഒന്നിച്ച് പൂളിലേക്ക് ഇട്ടു കൊടുക്കാതായി. പകരം എല്ലാ സീല്കുഞ്ഞുങ്ങളില് നിന്നും അല്പം മാറി ദൂരത്തായി അല്പാല്പമായി മത്സ്യത്തെ ഇട്ടു കൊടുക്കാന് തുടങ്ങി. ചുരുക്കത്തില് ഭക്ഷണം വേണമെങ്കില് മറ്റു സീല്കുഞ്ഞുങ്ങള് നീന്തി ഭക്ഷണത്തിന് അടുത്തെത്തുന്നതിന് മുന്പ് എത്തുന്നവര്ക്കേ ഭക്ഷണം കിട്ടുകയുള്ളൂ എന്ന നില വന്നു. ഇപ്രകാരം മത്സരം വളര്ത്തിയപ്പോള് എല്ലാ സീലുകളും മത്സരിച്ചു നീന്താന് തുടങ്ങി. അതോടൊപ്പം ജിങ്സും മത്സരിക്കാന് തുടങ്ങി. എന്ന് മാത്രമല്ല മത്സരിച്ചു ജയിക്കുന്നതില് അവള്ക്ക് പ്രത്യേക സന്തോഷം ഉണ്ടെന്നും സെന്ററിലെ എന്റിച്ച്മെന്റ് മേധാവി ആയ നതാലി പറഞ്ഞു.
https://www.facebook.com/Malayalivartha
