പ്രളയദുരിതം തകര്‍ത്ത പാണ്ടനാട്ടിലെ വീടിന്റെ മുകളില്‍നിന്നു നാവികസേന രക്ഷിച്ച കിരിയാന്‍മഠത്തില്‍ രശ്മി പ്രളയത്തില്‍ അകപ്പെട്ട ദിനങ്ങളെ കുറിച്ച് അനുസ്മരിക്കുന്നു. രശ്മിയോടൊപ്പം 11 മാസം പ്രായമായ മകന്‍ ദര്‍ശനും മാതാപിതാക്കളും ഉണ്ടായിരുന്നു.

15-ാം തീയതി തിങ്കളാഴ്ചരാവിലെ വീടിനുള്ളിലേക്കു വെള്ളം കയറിത്തുടങ്ങിയപ്പോള്‍ അടുത്ത വീടിന്റെ ഒന്നാംനിലയിലേക്ക് അച്ഛന്‍ രാധാകൃഷ്ണപിള്ളയ്ക്കും അമ്മ സുഷമയ്ക്കുമൊപ്പം മാറിയതാണ് രശ്മിയും മകനും. ഭര്‍ത്താവ് അജിത്ത് വിദേശത്താണ്. 14 കുടുംബങ്ങളില്‍ നിന്നായി 58 പേരാണ് കെട്ടിടത്തിന്റെ ഒന്നാംനിലയിലുണ്ടായിരുന്നത്. പത്തുപേര്‍ കുട്ടികള്‍.

മൂന്നാം ദിവസമായപ്പോഴേക്കും രണ്ടാം നിലയിലേക്കും വെള്ളം ഇരച്ചെത്തിത്തുടങ്ങിയിരുന്നു. അവിടുള്ളവരെല്ലാവരും മുങ്ങിപ്പോകുമെന്ന് ഉറപ്പായി. മോന് 11 മാസമേ ആയിട്ടുള്ളൂ. അവനെ ഒരു പാത്രത്തില്‍ ഇരുത്തി വെള്ളത്തിലേക്ക് ഇറക്കിവിടാമെന്നു തോന്നി. അവനെങ്കിലും രക്ഷപ്പെടട്ടെ എന്നായിരുന്നു അപ്പോഴത്തെ വിചാരം, രശ്മി പറഞ്ഞപ്പോള്‍, പറയുന്നത് തന്റെ കാര്യമാണെന്ന് തിരിച്ചറിഞ്ഞ മട്ടില്‍ പുഞ്ചിരി തൂകുകയായിരുന്നു രശ്മിയുടെ ഒക്കത്തിരുന്ന് കുഞ്ഞുദര്‍ശന്‍.

'രക്ഷതേടി ഒരുപാടു നമ്പരുകളില്‍ വിളിച്ചു. ഒരു ഫലവുമുണ്ടായില്ല. ഫോണിന്റെ ബാറ്ററി ചാര്‍ജും തീര്‍ന്നു. ഒഴുക്കു കൂടിയപ്പോള്‍ ഇതുവഴി വള്ളമോ ബോട്ടോ രക്ഷിക്കാനെത്തുമെന്ന പ്രതീക്ഷ ഇല്ലാതായി'. രശ്മി പറയുന്നു. ശനിയാഴ്ച പുലര്‍ച്ചെയാണ് നാവികസേന നദിയിലൂടെയെത്തി ഇവരെ രക്ഷപ്പെടുത്തിയത്.

രക്ഷപ്പെട്ടവര്‍ എവിടെയെന്നറിയാതെ പരക്കം പായുകയായിരുന്നു ബന്ധുക്കള്‍. ഒടുവില്‍ പരുമല പള്ളിയോടു ചേര്‍ന്ന ക്യാംപിലെത്തി അന്വേഷിച്ചപ്പോഴാണ് ബന്ധുക്കള്‍ക്ക് ഇവരെ കണ്ടെത്താനായത്.