തന്റെ നടത്തം കേരളത്തിനു വേണ്ടി ആക്കിയ മലയാളി സഞ്ചാരി
ലോകത്തിന്റെ നെറുകയായ കര്ദുംഗ്ല പാസും മനസിലിട്ട് സഞ്ചാരം തുടങ്ങിയ തലശ്ശേരിക്കാരനാണ് പര്വേസ് ഇലാഹി. ഇന്ത്യയുടെ അറ്റത്തേക്കുള്ള യാത്രയുടെ നാല്പ്പതാം ദിവസമാണ് കേരളത്തെ കശക്കിയെറിഞ്ഞ പ്രളയത്തേപ്പറ്റി പര് വേസ് അറിയുന്നത്. പെട്ടെന്ന് പഞ്ചാബിലൂടെ പുരോഗമിച്ചുകൊണ്ടിരുന്ന യാത്രയ്ക്ക് പുതിയ അര്ത്ഥതലങ്ങള് കൈവന്നു. പര്വേസിന്റെ ഫേസ്ബുക്കില് നിന്നുള്ള ഒരംശം.
ഒരു ദിനം കൊണ്ട് ലോകത്തിന്റെ നെറുകയായ കര്ദുംഗ്ല നടന്നു കയറാമെങ്കില് എന്ത് കൊണ്ട് എനിക്ക് പഞ്ചാബിലൂടെ എന്റെ കേരളത്തിനായി നടന്നു കൂടാ? എന്ന ചിന്തയായി പിന്നീട്. ''നീണ്ട 29 കിലോമീറ്ററുകളാണ് ഇന്ന് പഞ്ചാബിലൂടെ നടന്നത്. വൈകീട്ട് 4 മണി തൊട്ടു 7 മണി വരെ അമൃത്സറിലൂടെ ഞാന് നടന്നു. കടകളിലും, ഹോട്ടലുകളിലും, ആളുകള് കൂടിയ തെരുവകളിലും കയറി ഇറങ്ങി കാര്യങ്ങള് വിവരിച്ചു. പലരും തുറിച്ചു നോക്കുന്നുണ്ടായിരുന്നു. പക്ഷേ ആ തുറിച്ചു നോക്കലുകള് ഒരു നിമിഷം പോലും എന്നേ തളര്ത്തിയില്ല. കാരണം ഹൃദയത്തെ കോര്ത്തു വലിക്കും വിധം ഒരായിരം നിസ്സഹായമായ കണ്ണുകള് കണ്ടിട്ടാണ് ഞാന് ഇറങ്ങിയതും.'' പര്വേസ് ഫെയ്സ്ബുക്കില് കുറിച്ചു.
പഞ്ചാബികള്ക്ക് കേരളത്തോടുള്ള സ്നേഹം പറയാതിരിക്കാന് വയ്യെന്നാണ് പര്വേസ് കുറിക്കുന്നത്. ''പലരും പണത്തുട്ടുകള് നീട്ടി. ഒപ്പം അവരുടെ പ്രാര്ത്ഥന എന്നും ഉണ്ടെന്നും പറഞ്ഞു. പക്ഷേ വളരെ ചുരുക്കം ചിലര് പരിഹസിച്ചു ചിരിച്ചു കൊണ്ട് നീങ്ങുന്നതും കണ്ടു. ഇന്ന് ആദ്യമായി ഒരുപാടു നാണയത്തുട്ടുകള് എനിക്ക് കിട്ടി. കൈകളിലേക്ക് വരുന്ന ചെറിയ നാണയത്തുട്ടുകള് മൂല്യം കൊണ്ട് ചെറുതാണെങ്കിലും അത് കൈയിലേക്ക് ഏറ്റുവാങ്ങുമ്പോള്, അറിയാതെ ഓര്ത്തു പോയി... എത്ര പേര് ഇതു പോലെ ദിനം പ്രതി എനിക്ക് മുന്നില് കൈ നീട്ടിയിട്ടുണ്ട്.. പലര്ക്കും ഒന്നും നല്കാതെ നമ്മള് ആട്ടി ഓടിച്ചിട്ടില്ലേ??
റോഹിന്ഗ്യന് ക്യാമ്പുകളിലും മുംബൈയുടെ ചുവന്ന തെരുവിലും കൊല്ക്കത്തയുടെ സോനാഗച്ചിയിലും ഇതുപോലെ യാചിച്ച എത്ര മുഖങ്ങള് കണ്ടിട്ടുണ്ട്. ഇന്ന് ഞാന് അറിയുന്നു. ചെറിയ നാണയ തുട്ടുകള് സമ്മാനിച്ച വലിയ സന്തോഷത്തിന്റെ മൂല്യം. 3 മണിക്കൂര് കൊണ്ട് 1482/ രൂപയാണ് കിട്ടിയത്. ഈ മൂന്നു ദിനം കൊണ്ട് കിട്ടിയ മുഴുവന് തുക കൊണ്ട് (ഓണ്ലൈന് ട്രാന്സ്ഫര് അടക്കം )ഒരു കാര്യം കൂടി ചെയ്തു തീര്ക്കാന് സാധിച്ചു. വിവിധ ക്യാമ്പുകളിലേക്കായി 2000-ത്തോളം സാനിറ്ററി നാപ്ക്കിന്സ് ഇന്നും നാളെയുമായി പഞ്ചാബില് നിന്നും എത്തും. ക്യാമ്പുകളില് കഴിയുന്ന സ്ത്രീകളുടെ ആര്ത്തവ കാലത്തെ ദുരിതങ്ങള് റോഹിന്ഗ്യന് ക്യാമ്പുകളില് നിന്നും കൊല്ക്കത്തയിലെ ചുവന്ന തെരുവില് നിന്നും ഒരുപാട് കേട്ടതാണ്. തീര്ത്തും പ്രാചീന രീതികള് ഉപയോഗിച്ച് അവര് ആര്ത്തവ കാലത്തെ വേദന കടിച്ചമര്ത്തുന്നതും കണ്ടിട്ടുണ്ട്
കളിമണ്ണും ചാരവുമൊക്കെ ഉപയോഗിച്ച് അവര് രക്തം തടയുമ്പോള് പലപ്പോഴും ഓര്ത്തിട്ടുണ്ട്, നമ്മുടെ കേരളത്തിലെ സ്ത്രീകള് എത്ര ഭാഗ്യവതികളാണെന്ന്. പക്ഷേ കാലം ചിലപ്പോള് പാഠങ്ങള് നല്കും. ഒരു ജീവിത കാലം ഓര്ക്കാന് മാത്രമുള്ള പാഠങ്ങള്. ഇതൊരു തുടക്കം മാത്രമാണ്..മുന്നേറ്റത്തിന്റെ, അതിജീവനത്തിന്റെ, ഉയിര്ത്തെഴുന്നേല്പ്പിന്റെ തുടക്കം...!'' എന്നു പറഞ്ഞ് പര്വേസ് തന്റെ യാത്രയുടെ നാല്പ്പതാം ദിവസത്തേക്കുറിച്ചുള്ള കുറിപ്പ് അവസാനിപ്പിക്കുന്നു.
https://www.facebook.com/Malayalivartha