1070 യാത്രക്കാര്‍ക്ക് സഞ്ചരിക്കാവുന്ന ക്രിസ്റ്റല്‍ സെറിനിറ്റി എന്ന ആഡംബര യാത്രാക്കപ്പലില്‍ 655 ക്രൂ അംഗങ്ങളാണുള്ളത്. പക്ഷേ ഈ 655 പേരേക്കാള്‍ കൂടുതല്‍ സമയം ആ കപ്പലില്‍ ചെലവിട്ടത് മറ്റൊരാളാണ്. 86 കാരിയായ ലീ വാച്ച്‌സ്‌റ്‌റെല്ലര്‍ എന്ന വിധവയാണത്.

കഴിഞ്ഞ 7 വര്‍ഷമായി ആ കപ്പലിനോടൊപ്പം ലോകം ചുറ്റുകയാണ് മമ്മാ ലീ എന്ന് വിളിപ്പേരുള്ള വാച്ച് സ്റ്റെല്ലര്‍. അതിനൊരു കാരണവുമുണ്ട്. ബാങ്കറായിരുന്ന അവരുടെ ഭര്‍ത്താവ് മേസണാണ് അവരെ ആദ്യമായി കപ്പല്‍ യാത്രയ്ക്ക് കൊണ്ടു പോയത്.

50 വര്‍ഷം നീണ്ട ദാമ്പത്യത്തിനിടയില്‍ കപ്പലിലെ ഉല്ലാസ യാത്രകള്‍ അവര്‍ക്കൊരു പതിവായിരുന്നു. 89 തവണ ഭര്‍ത്താവിനൊപ്പം കപ്പലില്‍ ലോക സഞ്ചാരം നടത്തിയിട്ടുണ്ട് മമ്മാ ലീ. എന്നാല്‍ 1997 ല്‍ മേസണ്‍ കാന്‍സര്‍ ബാധിച്ചു മരിയ്ക്കുന്നതിനുമുമ്പ് അവസാനമായി അവരോട് പറഞ്ഞത് കപ്പല്‍ യാത്രകള്‍ നിര്‍ത്തരുതെന്നാണത്രേ!

 പിന്നെ അധികമൊന്നും ലീ ആലോചിച്ചില്ല. ഫ്‌ളോറിഡയിലെ ആഢംബര ഭവനം വിറ്റിട്ട് ക്രിസ്റ്റല്‍ സെറിനിറ്റി കപ്പലില്‍ സ്ഥിര താമസമാക്കി. ഏകദേശം 108000 പൗണ്ടാണ് പ്രതിവര്‍ഷം ഇതിനായി അവര്‍ ചെലവഴിക്കുന്നത് ഏതാണ്ട് ഒരു കോടി നാല്‍പ്പത്തിനാലായിരത്തോളം ഇന്ത്യന്‍ രൂപ.

 കഴിഞ്ഞ 7 വര്‍ഷം കൊണ്ട് നൂറോളം രാജ്യങ്ങളില്‍ ഇറങ്ങിയെന്ന കണക്കും സൂക്ഷിക്കുന്നുണ്ട്. 15 ഓളം തവണ ലോകമാകെ ചുറ്റി കറങ്ങി കഴിഞ്ഞുവെത്രേ. കപ്പല്‍ തീരങ്ങളില്‍ അടുക്കുമ്പോള്‍ ഇറങ്ങി കാണാനൊന്നും ഇപ്പോള്‍ തോന്നാറില്ല. കാരണം എല്ലാം കണ്ടു കഴിഞ്ഞ സ്ഥലങ്ങളാണ്. എങ്കിലും ഈസ്റ്റാന്‍ബൂളിലെ ഗ്രാന്‍ഡ് ബസാറില്‍ പോകാനുള്ള ആഗ്രഹം മാത്രം തീര്‍ന്നിട്ടില്ലെന്നും പറയുന്നു മമ്മാ ലീ.

ദിവസവും തന്റെ മൂന്നു മക്കളോടും 7 കൊച്ചുമക്കളോടും ഇന്റര്‍നെറ്റിലൂടെ ബന്ധപ്പെടാറുള്ളതു കൊണ്ട് സന്തോഷഭരിതമായി ജീവിതം മുന്നോട്ടു പോകുന്നുവെന്നാണ് ലീയുടെ അഭിപ്രായം. പക്ഷേ 7 വര്‍ഷത്തെ കപ്പല്‍ ജീവിതം കൊണ്ട് 25 പൗണ്ട് തൂക്കം വര്‍ദ്ധിച്ചിട്ടുണ്ടന്നെതൊഴിച്ചാല്‍ മറ്റൊരു കുഴപ്പവുമില്ലെന്ന് അവരുടെ സാക്ഷ്യം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha