വിവാഹത്തിനു മുമ്പ് ജനിച്ച കുഞ്ഞിനെ ദത്തു നല്കി; 50 വര്ഷത്തിനു ശേഷം ദമ്പതികള് മകനുമായി ഒന്നിച്ചു
സൗത്ത് ലണ്ടനിലെ ക്രോയ്ഡണിലെ കാരോളിന് 14 വയസ്സുള്ളപ്പോഴാണ് അവളുടെ സഹോദരനോടൊപ്പം ബാന്ഡിലുള്ള 14കാരനായ കെനിനെ പരിചയപ്പെട്ടത്. പതിനെട്ടാം വയസ്സില് അവര് ഡേറ്റിംഗ് തുടങ്ങി. അഞ്ചുമാസം കഴിഞ്ഞപ്പോള് തന്നെ താന് ഗര്ഭിണിയാണെന്ന് തിരിച്ചറിഞ്ഞ കാരോള് ഞെട്ടിപ്പോയി. മാതാപിതാക്കളെ ഇതെങ്ങനെ അറിയിക്കും. ആര്ക്കിടെക്റ്റ് ആകാന് ഇറങ്ങി തിരിച്ച് ഒന്നുമാകാത്ത നിലയിലാണ് കെന്. എങ്കിലും ഈ വിവരം അവളുടെ അച്ഛനമ്മമാരെ അറിയിക്കുവാന് കെന് ഒപ്പം വരാമെന്ന് അവന് പറഞ്ഞു. ആ വിവരം അവരെ അറിയിച്ച ദിവസത്തെ കുറിച്ച് അവള്ക്ക് ഇന്നും നല്ല ഓര്മ്മയുണ്ട്. കെന്നിനെ അവര് തള്ളി പുറത്താക്കി. കാരോളിനെ മുറിയിലേക്കു പൂട്ടുകയും ചെയ്തു. ഇനി ജീവിതത്തില് ഒരിക്കലും അവനെ നീ കാണില്ല എന്ന് ഭീഷണിപ്പെടുത്തുകയും ചെയ്തു.
ഏതായാലും ഓഡിയോ ടൈപ്പിസ്റ്റ് ആയി ജോലി നോക്കുകയായിരുന്ന കരോളിനെ അച്ഛനമ്മമാര് ജോലിയ്ക്കയച്ചു. അവള്ക്ക് രഹസ്യമായി പ്രസവം നടത്താനുള്ള ഒരു വീടും സഹായിയേയും അമ്മ ഏര്പ്പാടു ചെയ്തു. ഇതിനിടെ ആരുമറിയാതെ കെനും കാരോളും കണ്ടു മുട്ടുന്നുണ്ടായിരുന്നു. ഒളിച്ചോടുന്നതിനെകുറിച്ച് ആലോചിച്ചുവെങ്കിലും കെന്നിന്റെ കൈവശം കാശൊന്നുമില്ലാതിരുന്നതിനാല് ആ ആശയം ഉപേക്ഷിച്ചു. കുഞ്ഞിനെ പ്രസവിച്ചു രണ്ടു പേരും ചേര്ന്ന് വളര്ത്തണമെന്ന് അതിയായ് ആഗ്രഹിച്ചുവെങ്കിലും കെന്നിന്റെ സാമ്പത്തിക സ്ഥിതി എല്ലാത്തിനും വഴിമുടക്കിയായി.
21 വയസ്സില് താഴെയുള്ളവര് വിവാഹം കഴിക്കണമെങ്കില് മാതാപിതാക്കളുടെ അനുമതി നേടണമെന്ന യുകെയിലെ നിയമത്തിനു മുന്നില് അവരുടെ എല്ലാ വഴികളും അടഞ്ഞു. എന്നാല് കൈകളില് എന്ഗേജ്മെന്റ് മോതിരമോ വിവാഹമോതിരമോ ഇല്ലാതെ വലിപ്പം വയ്ക്കുന്ന വയറുമായി ജോലി സ്ഥലത്ത് കാണപ്പെട്ടാല് ചോദ്യങ്ങളുണ്ടാകുമെന്നതിനാല് കെന് ഒരു മോതിരം അവള്ക്കു സമ്മാനിച്ചു. പക്ഷേ വീട്ടില് നിന്നാരെങ്കിലും കാണാന് വരുന്ന ദിവസം അവള് അത് ഊരി മാറ്റും. കെന്നുമായി ബന്ധം തുടരുന്ന കാര്യം വീട്ടുകാരറിഞ്ഞിരുന്നില്ല. മോതിരം ഊരി മാറ്റാന് മറന്ന ഒരു ദിവസം എല്ലാം വീട്ടിലറിഞ്ഞു. അന്ന് വീട്ടുകാര് തീര്ത്തു പറഞ്ഞു. ബന്ധുക്കളും നാട്ടുകാരുമറിയാതെ പ്രസവിച്ചിട്ട് കുഞ്ഞിനെ നന്നായി വളര്ത്താന് ശേഷിയുള്ള ആര്ക്കെങ്കിലും ദത്തെടുക്കലിന് നല്കാന് സമ്മതിക്കുകയാണെങ്കില് ജോലിയും കാശുമൊന്നുമില്ലാത്ത കെന്നുമായുള്ള വിവാഹത്തിന് അനുമതി നല്കാമെന്ന്!
21 വയസ്സെത്തും മുമ്പ് വിവാഹം കഴിക്കണമെങ്കില് അച്ഛനമ്മമാരുടെ അനുവാദം ഉണ്ടായാലേ പറ്റൂ. കുഞ്ഞിന്റെ പിതൃത്വം ഏറ്റെടുക്കാനാളില്ലാതെ വീര്ത്തു വരുന്ന വയറുമായി എത്ര നാള് കഴിയാനാകും. മാതാപിതാക്കളെ ധിക്കരിച്ച് കെന്നിന് ഒപ്പം ഇറങ്ങിപ്പോയി വിവാഹം കഴിക്കാതെ ഒന്നിച്ചു ജീവിക്കാമെന്നു വിചാരിച്ചാലും ചെലവു നടത്താന് എന്തു ചെയ്യും. എന്നിങ്ങനെയുള്ള പല കാര്യങ്ങളെ കുറിച്ച് ചിന്തിച്ചു നോക്കിയപ്പോള് മാതാപിതാക്കളുടെ വ്യവസ്ഥകള്ക്കു വഴങ്ങുകയല്ലാതെ ആ പതിനെട്ടാം വയസ്സില് മറ്റൊന്നും ചെയ്യാന് പറ്റില്ലെന്ന് അവള്ക്കു മനസിലായി.
1965 ജനുവരിയില് പ്രസവിച്ച മകന് കെവിന് എന്നു പേരിട്ടു. ആറാഴ്ച അവനോടൊപ്പം കഴിയാന് മാതാപിതാക്കള് അവളെ അനുവദിച്ചു. തുടര്ന്ന് വെസ്റ്റ് സസക്സിലെ ഒരു കുടുംബത്തിന് അവനെ നല്കി എന്നു മാത്രമേ അവള്ക്കറിയൂ. 1966 സെപ്റ്റംബറില് കെന്നിനെ തന്നെ വിവാഹം കഴിച്ചു. നാലു കുഞ്ഞുങ്ങള് കൂടിയുണ്ടായി. ഓരോ തവണ ഗര്ഭിണി ആകുമ്പോഴും കാരോള് തന്റെ ആദ്യ കുഞ്ഞിനെകുറിച്ചോര്ത്തു കൊണ്ടിരുന്നു.
കുഞ്ഞുങ്ങള്ക്ക് പ്രായപൂര്ത്തിയായപ്പോള് അവര്ക്ക് ഒരു മൂത്ത സഹോദരനുണ്ടെന്ന് അവരെ അറിയിച്ചു. അവനെ കണ്ടു പിടിക്കാന് ശ്രമം നടത്തിയെങ്കിലും അത്തരത്തിലൊരു കുഞ്ഞ് അവള്ക്കുണ്ടെന്ന് തെളിയിക്കുന്ന ജനനസര്ട്ടിഫിക്കറ്റ് ഒന്നും കൈയ്യിലില്ലാതിരുന്നത് പ്രശ്നം കൂടുതല് സങ്കീര്ണ്ണമാക്കി. എങ്കിലും അവന്റെ എല്ലാ പിറന്നാള് ദിനങ്ങളിലും, കാണാതായവരെ കണ്ടെത്തുന്നതിനുള്ള വെബ്സൈറ്റില് അവര് അവന് പിറന്നാള് സന്ദേശങ്ങള് പോസ്റ്റ് ചെയ്തു കൊണ്ടിരുന്നു.
എന്നാല് മൂന്നു വര്ഷങ്ങള്ക്കു മുമ്പ് നിയമങ്ങള് മാറിയതു മൂലം കരോളിന് അവന്റെ ജനനസര്ട്ടിഫിക്കറ്റ് സംഘടിപ്പിക്കാന് കഴിഞ്ഞു. തുടര്ന്ന് പ്രാദേശിക കൗണ്സില് തന്നെ ലിവര്പൂളില് നിന്നും ഡേവിഡ് ജോണ്സ് എന്ന് വിളിക്കുന്ന കെവിനെ കണ്ടെത്തി. നല്ല നിലയില് വളര്ത്തപ്പെട്ട കെവിന് 5 വയസ്സുള്ളപ്പോള് ദത്തെടുക്കപ്പെട്ടതാണ് അവന് എന്ന വിവരം അവനോട് പറഞ്ഞിരുന്നു. ജന്മം നല്കിയ മാതാപിതാക്കളെ കണ്ടെത്താന് ശ്രമം നടത്താന് ആഗ്രഹിക്കുന്നുണ്ടെങ്കില് അതിനു ശ്രമിക്കാമെന്നും വളര്ത്തച്ഛനും അമ്മയും പറഞ്ഞിരുന്നുവെങ്കിലും അവരോട് ചെയ്യുന്ന അനീതിയാവില്ലേ എന്നോര്ത്ത് കെവിന് അതിനു ശ്രമിച്ചില്ല. ഇപ്പോള് 50 കാരനായ കെവിന്റെ വളര്ത്തച്ഛനും അമ്മയും 20 വര്ഷങ്ങള്ക്കു മുമ്പ് മരിച്ചെങ്കിലും സ്വന്തം അച്ഛനമ്മമാരെ തിരയാന് കെവിന് മടിച്ചു. അവര് പുറത്തറിയിക്കാന് ആഗ്രഹിക്കാത്ത ഭൂതകാലത്തിന്റെ സന്തതിയാണ് താനെങ്കിലോ എന്നു വിചാരിച്ചത്രേ. ഏതായാലും വിവാഹിതനായ കെവിന്റെ മൂന്നു മക്കളും കൂടിച്ചേര്ന്നപ്പോള് കുടുംബം പൂര്ണമായെന്ന സന്തോഷത്തിലാണ് കരോളും കെന്നും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha