ഒന്നാംക്ലാസുകാരി ദേവനന്ദയുടെ മരണത്തിനു പിന്നിലെ ദുരൂഹത നീക്കാനുള്ള അന്വേഷണം ആരംഭിച്ച്‌ പൊലീസ്. ഇതിന്റെ ഭാഗമായി പോസ്റ്റ്മാര്‍ട്ടം ചെയ്ത ഫോറന്‍സിക്ക് വിദഗ്ധര്‍ ഇളവൂരിലെത്തി പരിശോധന നടത്തും. ശാസ്ത്രീയ തെളിവുകളുടെ അടിസ്ഥാനത്തില്‍ അന്വേഷണം മുന്നോട്ട് കൊണ്ടുപോകാനാണ് പൊലീസിന്റെ തീരുമാനം. ഇതിനിടെ ദേവനന്ദയുടെ വീടിന്റെ വാതിലില്‍ നിന്നും മൃതദേഹം കണ്ടെത്തിയതുവരെയുള്ള ദൂരവും പുഴയുടെ ആഴവും പോലീസ് അളന്നു തിട്ടപ്പെടുത്തി. നെടുമ്ബന പഞ്ചായത്തിലെ ആറാം വാര്‍ഡിലെ ഇളവൂര്‍ കിഴക്കേക്കര വട്ടമണ്ണടി കടവിലേക്കുള്ള വഴിയും ഇത്തിക്കരയാറിന്റെ വിവിധ ഭാഗങ്ങളുമാണ് പൊലീസ് അളന്നത്. ദേവനന്ദയുടെ വീട്ടില്‍ നിന്നും കുളിക്കടവിലേക്ക് 75 മീറ്ററാണ് ദൂരം. പടവിന് 18 പടികളുണ്ട്. വീട്ടില്‍ നിന്ന് ബണ്ടിലേക്ക് 220 മീറ്റര്‍ ദൂരവും. ബണ്ട് പാലത്തിന് 13.5 മീറ്റര്‍ നീളവുമുണ്ട്. ബണ്ടിനു ഇരുവശത്തും190 സെന്റിമീറ്ററാണ് താഴ്ച. ദേവനന്ദയുടെ ഉയരം 127 സെന്റിമീറ്ററും. പുഴയിലേക്കുള്ള വീഴ്ചയില്‍ വെള്ളംകുടിച്ചാണ്ദേവനന്ദ താഴ്ന്നതെന്നാണ് പോസ്റ്റ്മോര്‍ട്ടത്തിലെ പ്രഥമിക കണ്ടെത്തല്‍. പിന്നീട് വീണ്ടും ഉയരുന്നു. മരണ വെപ്രാളത്തില്‍ വീണ്ടും പുഴയിലേക്ക് താഴ്ന്ന് ചെളിയില്‍ പൂഴ്ന്നിരിക്കാമെന്നും റിപ്പോര്‍ട്ടില്‍ പറയുന്നു. ശ്വാസകോശത്തില്‍ ചെളിയുടെ അംശം കുറവായിരുന്നെങ്കിലും വയറ്റിനുള്ളില്‍ ധാരാളം വെള്ളം കയറിയിരുന്നതായും പോസ്റ്റുമാര്‍ട്ടത്തില്‍ കണ്ടെത്തിയിരുന്നു. പോസ്റ്റുമോര്‍ട്ടത്തിന് നേതൃത്വം നല്‍കിയ തിരുവനന്തപുരം മെഡിക്കല്‍ കോളേജിലെ ഫോറന്‍സിക്ക് സംഘത്തോട് സ്ഥലത്ത് നേരിട്ടെത്തി പരിശോധന നടത്തണമെന്ന് പോലീസ് അഭ്യര്‍ത്ഥിച്ചിട്ടുണ്ട്.ഇവര്‍ നാളെ സന്ദര്‍ശിച്ചേക്കും. വിശദമായ പോസ്റ്റുമോര്‍ട്ടം റിപ്പോര്‍ട്ടും നാളെ പൊലീസിന് കൈമാറും.