ശിവകാശിയിലെ പടക്ക നിര്മാണ ഫാക്ടറിയിലുണ്ടായ സ്ഫോടനത്തില് എട്ട് മരണം
തമിഴ്നാട്ടിലെ ശിവകാശിയിലെ പടക്ക നിര്മാണ ഫാക്ടറിയിലുണ്ടായ സ്ഫോടനത്തില് എട്ട് പേര് മരിക്കുകയും നിരവധി പേര്ക്ക് പരിക്കേല്ക്കുകയും ചെയ്തു. ശിവകാശിയിലെ സെങ്കമലപ്പട്ടിയിലെ സുദര്ശന്റെ ഉടമസ്ഥതയിലുള്ള പടക്കനിര്മാണശാലയില് വ്യാഴാഴ്ച ഉച്ചയോടെയാണ് സ്ഫോടനം ഉണ്ടായത്. സ്ഫോടനത്തില് ഫാക്ടറിയിലെ ഏഴ് മുറികള് തകര്ന്നു.
ഒരു കിലോമീറ്റര് ദൂരത്തില് നിന്ന് വലിയ സ്ഫോടന ശബ്ദം കേട്ടതായി പ്രദേശവാസികള് പറഞ്ഞു. സ്ഫോടനത്തിന് ശേഷം ഫാക്ടറിയില് നിന്ന് വെളുത്ത പുക ഉയരുന്നതും കാണാമായിരുന്നു. രക്ഷാപ്രവര്ത്തകര് സ്ഥലത്തുണ്ട്. കൂടുതല് അന്വേഷണം നടക്കുകയാണ്. സ്ഫോടനത്തില് മരിച്ച തൊഴിലാളികളുടെ കുടുംബങ്ങള്ക്ക് രാഷ്ട്രപതി ദ്രൗപതി മുര്മുവും പ്രധാനമന്ത്രിയും അനുശോചനം രേഖപ്പെടുത്തി.
'തമിഴ്നാട്ടിലെ ശിവകാശിക്ക് സമീപം പടക്കനിര്മ്മാണശാലയിലുണ്ടായ സ്ഫോടനത്തില് നിരവധി ജീവനുകള് പൊലിഞ്ഞ വിവരം അറിഞ്ഞതില് ദു:ഖമുണ്ട്. മരിച്ചവരുടെ കുടുംബങ്ങള്ക്ക് എന്റെ ഹൃദയംഗമമായ അനുശോചനം അറിയിക്കുന്നു. പരിക്കേറ്റവര് വേഗത്തില് സുഖം പ്രാപിക്കട്ടെയെന്ന് പ്രാര്ത്ഥിക്കുന്നു,' രാഷ്ട്രപതി പറഞ്ഞു. സംഭവത്തില് തമിഴ്നാട് മുഖ്യമന്ത്രി എംകെ സ്റ്റാലിനും അനുശോചനം രേഖപ്പെടുത്തി.
'ശിവകാശിക്കടുത്ത് ഗീസാതിരുത്തങ്കല് ഗ്രാമത്തിലെ സ്വകാര്യ പടക്ക ഫാക്ടറിയിലുണ്ടായ സ്ഫോടനത്തില് 8 തൊഴിലാളികള് മരിച്ചതിന്റെ ദാരുണമായ വാര്ത്ത അറിഞ്ഞതില് എനിക്ക് അതിയായ ദുഃഖമുണ്ട്. ഉടന് തന്നെ വിരുദുനഗര് ജില്ലാ കളക്ടറെ ബന്ധപ്പെടുകയും രക്ഷാപ്രവര്ത്തനം എത്രയും വേഗം നടത്താന് നിര്ദ്ദേശം നല്കുകയും പരിക്കേറ്റവര്ക്ക് ശരിയായ ചികിത്സ ഉറപ്പാക്കാന് നിര്ദ്ദേശം നല്കുകയും ചെയ്തു. എക്സ് പോസ്റ്റില് അദ്ദേഹം പറഞ്ഞു.
https://www.facebook.com/Malayalivartha