അമ്മ വാക്സിന് ഉണ്ടാക്കും, മക്കളില് പരീക്ഷിക്കും!
യുകെ ആസ്ഥാനമായുള്ള മരുന്നു നിര്മാതാക്കളായ അസ്ട്രാസെനകയുമായി ചേര്ന്ന് കോവിഡിനു ഫലപ്രദവും സുരക്ഷിതവുമായ വാക്സിന് കണ്ടെത്താന് ബ്രിട്ടനിലെ ഓക്സ്ഫഡ് സര്വകലാശാലയിലെ ഗവേഷകര് രാപ്പകല് അധ്വാനിക്കുകയാണ്. പ്രഫ. സാറ ഗില്ബര്ട്, പ്രഫ. ആന്ഡ്രൂ പൊളര്ഡ്, പ്രഫ. തെരേസ ലാംബ്, ഡോ. സാന്ഡി ഡഗ്ലസ്, പ്രഫ. എഡ്രിയന് ഹില് എന്നിവരുടെ നേതൃത്വത്തിലാണ് 'എസെഡ്ഡി 1222' വാക്സിന് ഒരുങ്ങുന്നത്.
വാക്സിന് വികസിപ്പിക്കുന്നതില് ഏറെ പരിചയസമ്പന്നയാണ് പ്രഫ. സാറ ഗില്ബര്ട്. എബോള മഹാമാരിയുടെ കാലത്തും നിര്ണായക ഗവേഷണങ്ങളിലൂടെ ശ്രദ്ധേയയായിരുന്നു. കോവിഡ് വാക്സിന് പരീക്ഷണങ്ങളില് സാറയുടെ 3 മക്കളും പങ്കാളികളാണ്. ഒറ്റപ്രസവത്തില് പിറന്ന 21 വയസ്സുള്ള 3 പേരും ബയോകെമിസ്ട്രി വിദ്യാര്ഥികളാണ്. അമ്മ ഉണ്ടാക്കുന്ന വാക്സിന് മക്കളില് പരീക്ഷിക്കും. മരുന്നു സുരക്ഷിതമാണോയെന്നാണ് പ്രധാനമായി പരിശോധിക്കുന്നത്. കുത്തിവയ്പെടുത്ത സാറയുടെ മക്കള്ക്ക് ഇതുവരെ കുഴപ്പമൊന്നുമില്ല. അവര് വികസിപ്പിക്കുന്ന സാധ്യതാ വാക്സിന് ആദ്യ 2 കടമ്പകള് കടന്നു ക്ലിനിക്കല് പരീക്ഷണത്തിന്റെ മൂന്നാം ഘട്ടമെത്തി നില്ക്കുന്നു.
ഈ വാക്സിന്റെ പാര്ശ്വഫലങ്ങള് പാരസെറ്റമോള് കഴിച്ചാല് തീരുന്നതേയുള്ളൂ എന്നത് ശുഭപ്രതീക്ഷയാണെന്ന് ശാസ്ത്രജ്ഞര് പറയുന്നു. പ്രഫ. സാറയുടെ വീട്ടിലെന്നപോലെ, പരീക്ഷണാര്ഥം വാക്സിന് നല്കിയവരിലാര്ക്കും അപ്രതീക്ഷിത പാര്ശ്വഫലങ്ങള് കണ്ടില്ല. വാക്സിന് പരീക്ഷണങ്ങള്ക്ക് വേഗവും ഊര്ജവും പകര്ന്ന് 8.4 കോടി പൗണ്ടാണ് (ഏകദേശം 798 കോടി രൂപ) ബ്രിട്ടിഷ് സര്ക്കാര് അനുവദിച്ചിരിക്കുന്നത്.
യുകെയില് മാത്രമല്ല, ബ്രസീല്, ദക്ഷിണാഫ്രിക്ക തുടങ്ങിയ രാജ്യങ്ങളിലും മൂന്നാം ഘട്ട പരീക്ഷണം നടക്കുന്നു. കൊറോണ വൈറസുമായി സമ്പര്ക്കമുണ്ടാകുന്ന ഒരാള്ക്കു കോവിഡ് വരാതെ സംരക്ഷിക്കുന്നതില് ഓക്സ്ഫഡ് വാക്സിനുള്ള ഫലസാധ്യത 80% വരെ ആണെന്നാണു പ്രഫ. സാറ ഗില്ബര്ട് ഈയിടെ ഒരു അഭിമുഖത്തില് പറഞ്ഞത്.
https://www.facebook.com/Malayalivartha