വരണം വരാതിരിക്കരുത്... മന്ത്രിയുടെ വിവാഹ ക്ഷണക്കത്ത് തരംഗമാകുന്നു
ഉമ്മന്‍ചാണ്ടി മന്ത്രിസഭയിലെ ഏക വനിതയുംപട്ടിക വര്‍ഗ യുവജനക്ഷേമ വകുപ്പ് മന്ത്രിയുമായ പി.കെ. ജയലക്ഷ്മിയുടെ വിവാഹം മേയ് 10നാണ്. മാനന്തവാടി വാളാട് പാലോട്ട് കുറിച്യ തറവാട്ടില്‍ വച്ചാണ് വിവാഹം നടക്കുന്നത്.
മന്ത്രിയുടെ ലാളിത്യം പോലെ തന്നെ വിവാഹക്ഷണക്കത്തും സുഹൃത്തുക്കള്‍ക്കിടയിലും സമൂഹത്തിലും ശ്രദ്ധ പിടിച്ചു പറ്റുകയാണ്. മന്ത്രിയാണെങ്കിലും യാതൊരുവിധ ആഡംബരങ്ങളുമില്ലാതെയാണ് ക്ഷണക്കത്ത് തയ്യാറാക്കിയിരിക്കുന്നത്. മലയാളത്തില്‍ അച്ചടച്ചിരിക്കുന്ന കത്തില്‍ വിവാഹത്തിന് എത്തിച്ചേരേണ്ട വഴിയും വ്യക്തമായി സൂചിപ്പിച്ചിട്ടുണ്ട്.
കമ്പളക്കാട് പള്ളിയറ തറവാട്ടിലെ അനിലാണ് ജയലക്ഷ്മിയുടെ വരന്‍. ഏഴ് വര്‍ഷം മുമ്പ് തന്നെ ഇരു തറവാട്ടുകാരും ചേര്‍ന്ന് ജയലക്ഷ്മിയുടെ വിവാഹാലോചന നടത്തിയിരുന്നു. വയനാട്ടിലെ 56 കുറിച്യത്തറവാടുകളില്‍ പകുതിയോളം ബന്ധുകുലമാണ്. അവശേഷിച്ച പന്തികുലത്തില്‍ നിന്നാണ് ജയലക്ഷ്മിക്ക് വരനെ കണ്ടെത്തിയിട്ടുള്ളത്.
മാനന്തവാടിക്കടുത്ത തവിഞ്ഞാല്‍ പഞ്ചായത്തിലെ വാളാട് കാട്ടിമൂലയില്‍ പാലോട്ട് തറവാട്ടിലെ കുഞ്ഞാമന്‍ അമ്മിണി ദമ്പതികളുടെ മകളാണ് പി.കെ. ജയലക്ഷ്മി. 1980 ഒക്‌ടോബര്‍ മൂന്നിനാണ് ജനനം. കാട്ടിമൂല സെന്റ് സെബാസ്റ്റ്യന്‍സ് എല്‍.പി സ്‌കൂള്‍, പോരൂര്‍ സര്‍വോദയ സ്‌കൂള്‍, തലപ്പുഴ ഗവ. ഹയര്‍സെക്കന്‍ഡറി സ്‌കൂള്‍ എന്നിവിടങ്ങളിലായിരുന്നു പ്രാഥമിക വിദ്യാഭ്യാസം. കണ്ണൂര്‍ സര്‍വകലാശാലയ്ക്ക് കീഴില്‍ മാനന്തവാടി ഗവ. കോളേജില്‍ നിന്ന് ഇംഗ്ലീഷ് ലിറ്ററേച്ചറില്‍ ബിരുദപഠനം പൂര്‍ത്തിയാക്കി. കമ്പ്യൂട്ടര്‍ ആപ്ലിക്കേഷനില്‍ ഡിപ്ലോമ കോഴ്‌സും പൂര്‍ത്തീകരിച്ചു.
കുറിച്യ സമുദായത്തിന്റെ പാരമ്പര്യ ആയോധന കലയായ അമ്പെയ്ത്തില്‍ ചെറുപ്പത്തില്‍ തന്നെ പരിശീലനം നേടി. പഠനകാലം മുതല്‍ വിവിധ അമ്പെയ്ത്ത് മത്സരങ്ങളില്‍ പങ്കെടുക്കുകയും സംസ്ഥാനതലത്തില്‍ വെള്ളി മെഡല്‍ ഉള്‍പ്പെടെ നേടുകയും ചെയ്തു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
