ഐപിഎല്‍ കൊടുമ്പിരി കൊള്ളുകയാണ്. അപാര ഫോമിലേക്കുയര്‍ന്ന് വിരാട് കോലി. 7 ഫോറും 6 സിക്‌സുമായി വിരാട് കോലി (47 പന്തില്‍ 92) നിറഞ്ഞാടിയ ഐപിഎല്‍ മത്സരത്തില്‍ പഞ്ചാബ് കിങ്‌സിനെതിരെ റോയല്‍ ചാലഞ്ചേഴ്‌സ് ബെംഗളൂരുവിന് 60 റണ്‍സ് ജയം. സ്‌കോര്‍: ബെംഗളൂരു 20 ഓവറില്‍ 7 വിക്കറ്റ് നഷ്ടത്തില്‍ 241 റണ്‍സ്. പഞ്ചാബ് 17 ഓവറില്‍ 181നു പുറത്ത്. ഉജ്വലമായ ഒരു റണ്ണൗട്ടുമായും തിളങ്ങിയ കോലിയാണ് പ്ലെയര്‍ ഓഫ് ദ് മാച്ച്.

195.74 സ്‌ട്രൈക്ക് റേറ്റുമായി തകര്‍ത്തടിച്ച കോലിക്കു പുറമേ രജത് പാട്ടിദാര്‍ (23 പന്തില്‍ 55), കാമറൂണ്‍ ഗ്രീന്‍ (27 പന്തില്‍ 46) എന്നിവരും ബെംഗളൂരു ബാറ്റിങ്ങില്‍ മിന്നി. ധരംശാല സ്റ്റേഡിയത്തില്‍ ടോസ് നഷ്ടപ്പെട്ട് ബാറ്റിങ്ങിനിറങ്ങേണ്ടി വന്നെങ്കിലും ബെംഗളൂരുവിന് ഒട്ടും നഷ്ടബോധമുണ്ടായില്ല. ക്യാപ്റ്റന്‍ ഫാഫ് ഡുപ്ലെസിയും (9) വില്‍ ജാക്‌സും (12) പവര്‍പ്ലേയില്‍ തന്നെ മടങ്ങിയെങ്കിലും കോലിയും പാട്ടിദാറും ചേര്‍ന്ന് മികച്ച അടിത്തറയിട്ടു. ഇന്നിങ്‌സിന്റെ തുടക്കത്തില്‍ തന്നെ രണ്ടു വട്ടം 'കൈവിട്ടു' സഹായിച്ച പഞ്ചാബ് ഫീല്‍ഡര്‍മാര്‍ക്ക് വൈകാതെ അതിന്റെ വില കോലി മനസ്സിലാക്കിക്കൊടുത്തു.

മൂന്നാം വിക്കറ്റില്‍ 76 റണ്‍സാണ് കോലിയും പാട്ടിദാറും ചേര്‍ന്നു നേടിയത്. 3 ഫോറും 6 സിക്‌സും ഉള്‍പ്പെടുന്നതാണ് പാട്ടിദാറിന്റെ വെടിക്കെട്ട് ഇന്നിങ്‌സ്. പാട്ടിദാര്‍ പുറത്തായതിനു പിന്നാലെ മഴയുമെത്തിയതോടെ കളി കുറച്ചു സമയം തടസ്സപ്പെട്ടു. എന്നാല്‍ മഴ മാറി മാനം തെളിഞ്ഞതിനൊപ്പം തന്നെ കോലിക്കു തിളക്കവും കൂടി. 32 പന്തില്‍ അര്‍ധ സെഞ്ചറി തികച്ച കോലി പിന്നാലെ ഗ്രീനിനെ സാക്ഷി നിര്‍ത്തി തകര്‍ത്തടിച്ചു.

പിന്നീടു നേരിട്ട 15 പന്തില്‍ നിന്ന് കോലി നേടിയത് 40 റണ്‍സ്. സെഞ്ചറിക്കു കാത്തു നിന്ന ആരാധകരെ നിരാശരാക്കി അര്‍ഷ്ദീപിന്റെ 18ാം ഓവറില്‍ റൈലി റൂസോയ്ക്കു ക്യാച്ച് നല്‍കി കോലി മടങ്ങിയെങ്കിലും രാഹുല്‍ ചാഹറിന്റെ അടുത്ത ഓവറില്‍ 21 റണ്‍സാണ് ഗ്രീനും ദിനേഷ് കാര്‍ത്തിക്കും (18) ചേര്‍ന്നു നേടിയത്.

മറുപടി ബാറ്റിങ്ങില്‍ റൂസോയും (27 പന്തില്‍ 61) ജോണി ബെയര്‍‌സ്റ്റോയും (16 പന്തില്‍ 27) പഞ്ചാബിന് മികച്ച തുടക്കം നല്‍കിയെങ്കിലും റൂസോ പുറത്തായത് തിരിച്ചടിയായി. മിക്ക മത്സരങ്ങളിലും പഞ്ചാബിന്റെ രക്ഷകനായിരുന്ന ശശാങ്ക് സിങ് (19 പന്തില്‍ 37) ഒരിക്കല്‍ കൂടി പ്രതീക്ഷയുയര്‍ത്തിയെങ്കിലും 14ാം ഓവറില്‍ ഒരു ഡയറക്ട് ത്രോയിലൂടെ ശശാങ്കിനെ റണ്‍ഔട്ടാക്കി കോലി കളി ബെംഗളൂരുവിന് അനുകൂലമാക്കി. ബെംഗളൂരുവിനു വേണ്ടി മുഹമ്മദ് സിറാജ് 3 വിക്കറ്റ് വീഴ്ത്തി.

അതേസമയം സണ്‍റൈസേഴ്‌സ് ഹൈദരാബാദിനോടു വന്‍ തോല്‍വി വഴങ്ങിയതിനു പിന്നാലെ ലക്‌നൗ സൂപ്പര്‍ ജയന്റ്‌സ് ക്യാപ്റ്റന്‍ കെ.എല്‍. രാഹുലിനോടു ഗ്രൗണ്ടില്‍വച്ച് ചൂടായി ടീം ഉടമ സഞ്ജീവ് ഗോയങ്ക. ഹൈദരാബാദിന്റെ പത്തു വിക്കറ്റ് ജയത്തിനു ശേഷമാണ് ഗ്രൗണ്ടില്‍വച്ച് സഞ്ജീവ് ഗോയങ്ക ലക്‌നൗ ക്യാപ്റ്റനോട് ഏറെ നേരം സംസാരിച്ചത്. ഇരുവരും തമ്മില്‍ എന്താണു പറഞ്ഞതെന്നു വ്യക്തമല്ല. എന്നാല്‍ തോല്‍വിയുടെ നിരാശയും രോഷവും സഞ്ജീവ് ഗോയങ്കയില്‍ പ്രകടമായിരുന്നു. ഗോയങ്കയുടെ വാക്കുകള്‍ ശ്രദ്ധയോടെ കേട്ട കെ.എല്‍. രാഹുല്‍ തിരിച്ച് കാര്യമായൊന്നും പറഞ്ഞതുമില്ല.

രാഹുല്‍ മടങ്ങിയ ശേഷം ലക്‌നൗ പരിശീലകരോടും സഞ്ജീവ് ഗോയങ്ക ഗ്രൗണ്ടില്‍വച്ച് ഏറെ നേരം സംസാരിക്കുന്നുണ്ടായിരുന്നു. മത്സരത്തിനു പിന്നാലെ നടത്തിയ ചര്‍ച്ചയ്ക്കിടെ ഗ്രൗണ്ടിലെ ദൃശ്യങ്ങള്‍ ടിവിയില്‍ കാണിച്ചപ്പോഴാണ് രാഹുലിനെ സഞ്ജീവ് ഗോയങ്ക ശകാരിക്കുന്ന ദൃശ്യങ്ങള്‍ ആരാധകരുടെ ശ്രദ്ധയില്‍പെട്ടത്. ടീം ക്യാപ്റ്റനെ പൊതുവേദിയില്‍വച്ച് ലക്‌നൗ ഉടമ അപമാനിച്ചതു ശരിയായില്ലെന്ന് സമൂഹമാധ്യമങ്ങളില്‍ ചില ആരാധകര്‍ കുറിച്ചു.

ഞെട്ടിക്കുന്ന പ്രതികരണമാണ് സഞ്ജീവ് ഗോയങ്കയുടേതെന്നും, രാഹുല്‍ ലക്‌നൗ ടീം വിട്ടുപുറത്തു പോകണമെന്നും ആരാധകരില്‍ ചിലര്‍ വാദിക്കുന്നു. ഗ്രൗണ്ടില്‍ ഇത്രയേറെ ക്യാമറകള്‍ ഉള്ളപ്പോള്‍ രാഹുലിനെ ലക്‌നൗ ടീം ഉടമ പരസ്യമായി അപമാനിക്കരുതെന്നും വാദങ്ങളുണ്ടായി. മത്സരത്തില്‍ ലക്‌നൗ 240 റണ്‍സെടുത്താലും ഹൈദരാബാദ് അതും പിന്തുടര്‍ന്നു വിജയിക്കുമായിരുന്നെന്ന് കെ.എല്‍. രാഹുല്‍ പ്രതികരിച്ചു.