നേപ്പാളിലെ ഭൂകമ്പം പല നല്ല ഓര്‍മ്മകളേയും തല്ലിക്കെടുത്തുന്നതായിരുന്നു. നേപ്പാളിലെ ചരിത്ര സൗധങ്ങള്‍ ഇന്ത്യക്കാരെ വല്ലാതെ ആകര്‍ഷിച്ചിരുന്നു. അത് പലതും ഇനി ഓര്‍മ്മയാണ്. ഭൂകമ്പത്തില്‍ നേപ്പാള്‍ നേപ്പാള്‍ കുലുങ്ങിവിറച്ചപ്പോള്‍ അതിന്റെ ചരിത്ര സൗധങ്ങള്‍ നിലംപൊത്തി. ആയിരക്കണക്കിനു വിനോദ സഞ്ചാരികളെ മാടിവിളിച്ച ധരഹര ടവറും ദര്‍ബാര്‍ ചത്വരവും തകര്‍ന്നടിഞ്ഞു.
തലസ്ഥാനമായ കാഠ്മണ്ഡുവിന്റെ പ്രധാന ആകര്‍ഷണമായിരുന്നു ദര്‍ബാര്‍ ചത്വരം. ഇതിനുള്ളിലെ ഹനുമാന്‍ പ്രതിമ യുനസ്‌കോ പൈതൃക കേന്ദ്രമാണ്. വെള്ളച്ചാട്ടങ്ങളും ക്ഷേത്രങ്ങളും വിഗ്രഹങ്ങളുമൊക്കെ ഈ ചത്വരത്തിന്റെ മാറ്റ് കൂട്ടി. മഹാന്‍ സിനിമയില്‍ നായിക സീനത്ത് അമാനുമൊത്ത് അമിതാഭ് ബച്ചന്‍ പ്യാര്‍ മേ ദില്‍ പേ മാര്‍ ദേ ഗോലി... എന്ന ഗാനരംഗം തകര്‍ത്തഭിനയിച്ചത് ദര്‍ബാര്‍ ചത്വരത്തിന്റെ പശ്ചാത്തലത്തിലായിരുന്നു. 
ഭൂമികുലുക്ക വാര്‍ത്ത കേട്ടമാത്രയില്‍ ബച്ചന്‍ ട്വീറ്റ് ചെയ്തു: ദൈവമേ, നേപ്പാളില്‍ ഭൂകമ്പമോ, സീനത്തിനൊപ്പം ഇവിടെയാ ഞാനൊരു പാട്ട് ഷൂട്ട് ചെയ്തത്... ബച്ചനു വര്‍ഷങ്ങളായിട്ടും മറക്കാനവാത്ത സ്ഥലം. 
1825 ല്‍ അന്നത്തെ പ്രധാനമന്ത്രി ഭീംസെന്‍ ഥാപ്പ പണികഴിപ്പിച്ചതാണു ധരഹര ടവര്‍. ലളിത് ത്രിപുരസുന്ദരി രാജ്ഞിക്കുവേണ്ടിയാണ് ഈ ടവര്‍ നിര്‍മ്മിച്ചത്. ഈ മിനാരം ഭീംസെന്‍ ടവര്‍ എന്ന പേരിലും അറിയപ്പെടുന്നു. 1834 ല്‍ ഉണ്ടായ ഭൂകമ്പത്തില്‍ ധരഹര ടവറിനു നാശനഷ്ടമുണ്ടായിരുന്നു. ഒരു നൂറ്റാണ്ട് കഴിഞ്ഞപ്പോള്‍ മറ്റൊരു ഭൂകമ്പത്തില്‍ ഇതു തകര്‍ന്നു. 1936 ലാണു പുനര്‍നിര്‍മ്മിച്ചത്. സൈനിക നിരീക്ഷണ ടവറായി നിര്‍മ്മിച്ച ധരഹര പിന്നീട് നേപ്പാളിന്റെ ചരിത്ര സ്മാരകമായി മാറുകയായിരുന്നു. ഒമ്പതു നിലയുള്ള ഈ ടവറിലെ ചുറ്റു ഗോവണിയിലൂടെ എട്ടാം നിലയിലെ മുകപ്പിലെത്താം. ഇവിടെ നിന്നാല്‍ കാഠ്മണ്ഡു താഴ്‌വാരത്തിന്റെ മൊത്തത്തിലുള്ള ദൃശ്യഭംഗി ആസ്വാദിക്കാം. ഒന്‍പതുനിലകളുള്ള 61.88 മീറ്റര്‍ ഉയരമുള്ള ടവര്‍ കാഠ്മണ്ഡുവിന്റെ ഹൃദയഭാഗമായ സുന്ദരയിലാണ് സ്ഥിതിചെയ്തിരുന്നത്. നേപ്പാളിന്റെ പൈതൃകകെട്ടിടമായി യുനസ്‌കോ അംഗീകരിച്ചത് ധരഹാര ടവറായിരുന്നു. 213 പടികളുള്ള സ്‌പൈറല്‍ സ്‌റ്റെയര്‍കേസായിരുന്നു ഇതിന്റെ ആകര്‍ഷണം.
യുനസ്‌കോ ലോക പൈതൃക കേന്ദ്രങ്ങളായി പ്രഖ്യാപിച്ച ഈ കൊട്ടാരമുറ്റങ്ങള്‍ വിനോദ സഞ്ചാരികളുടെ പ്രധാന ആകര്‍ഷണ കേന്ദ്രമാണ്. പഴയ കാഠ്മണ്ഡു നഗരത്തിന്റെ ഹൃദയഭാഗത്താണ് കാഠ്മണ്ഡു ദര്‍ബാര്‍ സ്‌ക്വയര്‍. ഹനുമാന്റെ ഒരു പ്രതിമ സ്ഥിതിചെയ്യുന്നതിനാല്‍ ഹനുമാന്‍ ചത്വരമെന്നും ഇതറിയപ്പെടുന്നു. ഇതും ഭൂകമ്പത്തില്‍ തകര്‍ന്ന് വീണു.
നൂറ്റാണ്ടുകള്‍ പഴക്കമുള്ള കെട്ടിടങ്ങളെല്ലാം പഗോഡരീതിയില്‍ നിര്‍മ്മിച്ചവയായിരുന്നു. പഴമയുടെ പ്രൗഢി അവയിലെല്ലാം തെളിഞ്ഞുനില്‍ക്കുന്നുണ്ടായിരുന്നു. അതു തന്നെയായിരുന്നു നേപ്പാളിന്റെ പൈതൃക കരുത്ത്. ഇവയാണ് ഭൂകമ്പത്തില്‍ മാഞ്ഞ് പോകുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha