ഒരു കണക്കിന് പറഞ്ഞാന്‍ അണ്ണാ ഹസാര തന്നെയാണ് ആം ആദ്മി പാര്‍ട്ടിയുടെ സ്ഥാപക നേതാവ്. 2011 ല്‍ ഡല്‍ഹിയില്‍ അഴിമതിക്കെതിരെ ഹസാരെയുടെ നേതൃത്വത്തില്‍ നടന്ന പ്രക്ഷോഭത്തിന്റെ ഭാഗമായി ജന്മം കൊണ്ട പാര്‍ട്ടിയാണ് ആം ആദ്മി. അഴിമതിക്കെതിരെ രൂപം കൊണ്ട പാര്‍ട്ടി ഇപ്പോള്‍ അഴിമതിയില്‍ മുങ്ങി നില്‍ക്കുകയാണെന്നാണ് ബി.ജ.പിയുടെ കണ്ടെത്തല്‍. അതുകൊണ്ടു തന്നെ ആം ആദ്മി പാര്‍ട്ടിക്കും ഡല്‍ഹി സര്‍ക്കാരിനുമെതിരെ പ്രതിഷേധ സമരത്തിനൊരുങ്ങുകയാണ് ബി.ജെ.പി. ഈ സമരത്തിലേക്ക് അണ്ണാ ഹസാരെ തന്നെ എത്തിക്കാനുള്ള ശ്രമമാണ് ബി.ജെ.പി നടത്തിയത്. എന്നാല്‍ ബി.ജെ.പി നേതൃത്വത്തിന് ഒന്നു പാളി. ക്ഷണം നിരസിക്കുകമാത്രമല്ല നരേന്ദ്ര മോദിയെ വിമര്‍ശിക്കുകയും ചെയ്തു അദ്ദേഹം.

ക്ഷണം നിരസിക്കുന്നതായി ചൂണ്ടിക്കാട്ടി അണ്ണാ ഹസാരെ ഡല്‍ഹി ബിജെപി ഘടകത്തിന് കത്തയച്ചു. 'നിങ്ങളുടെ കത്ത് വായിച്ച് എനിക്ക് നിരാശ തോന്നി. കഴിഞ്ഞ ആറ് വര്‍ഷമായി നിങ്ങളുടെ പാര്‍ട്ടി ബിജെപിയാണ് കേന്ദ്രത്തില്‍ അധികാരത്തില്‍. യുവാക്കളാണ് ഈ രാജ്യത്തിന്റെ സ്വത്ത്. നിങ്ങളുടെ പാര്‍ട്ടിക്ക് അവരുടെ പിന്തുണ വേണ്ടത്രയുണ്ട്. എന്നിട്ടും ഒരു ചെറിയ കൂരയില്‍ കഴിയുന്ന അധികാരവും സമ്പത്തും ഇല്ലാത്ത സാധുവാണ് തന്നെ എന്തിനാണ് ക്ഷണിക്കുന്നതെന്നും ഡല്‍ഹി ബിജെപി മേധാവി ആദേഷ് ഗുപ്തക്കെഴുതിയ കത്തില്‍ അണ്ണാ ഹസാരെ പറയുന്നു. ഇതിലും നിര്‍ഭാഗ്യകരമായി മറ്റെന്താണുള്ളതെന്നും അദ്ദേഹം ചോദിക്കുന്നു. 'അഴിമതി ഇല്ലാതാക്കാന്‍ കേന്ദ്രം ശക്തമായ നടപടികള്‍ സ്വീകരിച്ചതായി പ്രധാനമന്ത്രി നരേന്ദ്ര മോദി പറയുന്നു. ആം ആദ്മി സര്‍ക്കാര്‍ അഴിമതി നടത്തിയിട്ടുണ്ടെങ്കില്‍ എന്തുകൊണ്ടാണ് നിങ്ങളുടെ സര്‍ക്കാര്‍ കര്‍ശന നിയമ നടപടികള്‍ സ്വീകരിക്കാത്തതെന്നും ഹസാരെ ബിജെപിയോട് ചോദിച്ചു.

2014 ല്‍ ബി.ജെ.പി അധികാരം പിടിക്കാന്‍ തന്നെ കരുവാക്കി എന്ന് അണ്ണാ ഹസാരെ അടുത്തിടെ തുറന്ന് പറഞ്ഞിരുന്നു. ബി.ജെ.പിയും പിന്നീട് ആം ആദ്മിയും തന്നെ ഉപയോഗിക്കുകയായിരുന്നുവെന്നാണ് ഹസാരെ പറയുന്നത്. ലോക്പാലിനെതിരെയുള്ള തന്റെ സമരം കേന്ദ്രത്തില്‍ അധികാരത്തില്‍ വരാന്‍ ബി.ജെ.പിയും ഡല്‍ഹിയില്‍ അധികാരത്തിലേറാന്‍ ആം ആദ്മിയും ഉപയോഗിച്ചു. നിലവില്‍ ഈ രണ്ട് പാര്‍ട്ടികളുമായും തനിക്ക് യാതൊരു ബന്ധവും ഇല്ല എന്നും അദ്ദേഹം കൂട്ടിച്ചേര്‍ത്തു. രാജ്യത്തെ സ്വേച്ഛാധിപത്യ രീതിയിലേക്കും ജനങ്ങളെ തെറ്റായ രീതിയിലേക്കും നരേന്ദ്ര മോദി നടത്തുകയാണ് എന്നും അദ്ദേഹം കുറ്റപ്പെടുത്തി.

2014 ല്‍ അന്നത്തെ യു.പി.എ സര്‍ക്കാരിനെതിരെയും പ്രധാനമന്ത്രി മന്‍മോഹന്‍ സിംഗിനെതിരെയും ഏറ്റവും വലിയ സമരം നടത്തിയ വ്യക്തി ആയിരുന്നു അണ്ണാ ഹസാരെ. മന്‍മോഹന്‍സിങ് സര്‍ക്കാര്‍ നടപ്പിലാക്കാന്‍ ഉദ്ദേശിച്ച ലോക്പാല്‍ ബില്ലിനെതിരെ ആയിരുന്നു പ്രമുഖ ഗാന്ധിയന്‍ അണ്ണാ ഹസാരെയുടെ സത്യാഗ്രഹ സമരം. അന്നത്തെ പ്രതിപക്ഷമായിരുന്ന ബി.ജെ.പിയെ പോലും പിന്നില്‍ നിര്‍ത്തുന്ന അണ്ണാ ഹസാരയുടെ സമരത്തെ ശരിക്കും ബി.ജെ.പി മുതലെടുക്കുകയായിരുന്നു. ആ സമരത്തെ സ്‌പോണ്‍സര്‍ ചെയ്യന്നത് ബി.ജെ.പി ആണ് എന്നത് അന്ന് തന്നെ ആരോപണം ഉയര്‍ന്നിരുന്നു. ആ ആരോപണത്തെ ശരി വയ്ക്കുന്ന കുറ്റസമ്മതമാണ് അണ്ണാ ഹസാരെ പിന്നീട് നടത്തിയത്. അന്ന് അണ്ണാ ഹസാരെയുടെ സമരത്തിന്റെ മുന്‍ നിരപോരാളികളായിരുന്നു ഇന്നത്തെ ഡല്‍ഹി മുഖ്യമന്ത്രി അരവിന്ദ് കേജരിവാളും, മുന്‍ ഐ.പി.എസ് ഓഫീസര്‍ കിരണ്‍ ബേദിയും, മുതിര്‍ന്ന അഭിഭാഷകന്‍ പ്രശാന്ത് ഭൂഷണും ഒക്കെ. ബി ജെ പി സര്‍ക്കാര്‍ അധികാരത്തില്‍ കയറിയത്തോട് കൂടി അണ്ണാ ഹസാരെ സമരത്തില്‍ നിന്നും പിന്തിരിയുകയായിരുന്നു.