കഴിഞ്ഞ പ്രളയത്തില് തകര്ന്ന പാലം പുനര്നിര്മിക്കാത്തതിനാല് അമിത രക്തസ്രാവമുണ്ടായ ആദിവാസി യുവതിയെ ആശുപത്രിയി ലെത്തിക്കാന് 5 കിലോമീറ്റര് കാട്ടിലൂടെ ചുമക്കേണ്ടിവന്നു!
മലപ്പുറം ജില്ലയിലെ മുണ്ടേരി വനത്തിനകത്ത് തരിപ്പപ്പൊട്ടി കോളനിയിലെ ഒരു ആദിവാസി യുവതിയ്ക്ക് ഗര്ഭം അലസിയതിനെത്തുടര്ന്ന് രക്തസ്രാവമുണ്ടായി ഗുരുതരാവസ്ഥയിലായെങ്കിലും രണ്ടു ദിവസം കഴിഞ്ഞാണ് ആശുപത്രിയിലെത്തിക്കാന് സാധിച്ചത്.
കഴിഞ്ഞ പ്രളയത്തില് ചാലിയാറിന് കുറുകെയുള്ള പാലം ഒലിച്ചുപോയതോടെ ചങ്ങാടത്തിലാണ് ആദിവാസികള് ഇക്കരെയത്തിയിരുന്നത്. എന്നാല്, കഴിഞ്ഞ ദിവസങ്ങളിലെ മഴയില് ചാലിയാറിലെ ജലനിരപ്പുയര്ന്നിരുന്നു. കുത്തൊഴുക്കും കൂടിയായതോടെ ചങ്ങാടം ഉപയോഗിക്കാന് കഴിഞ്ഞില്ല.
തരിപ്പപ്പൊട്ടി കോളനിയിലെ സുനിലിന്റെ ഭാര്യ കാഞ്ചന(20)യ്ക്കാണ് മൂന്നാം മാസത്തില് ഗര്ഭം അലസി അമിത രക്തസ്രാവം ഉണ്ടായത്. ബുധനാഴ്ച ഉച്ചയ്ക്ക് കോളനിയിലെ വീട്ടിലാണു സംഭവം. എന്നാല്, വിവരം പുറത്താരും അറിഞ്ഞിരുന്നില്ല.
കാഞ്ചനയെ ആശുപത്രിയിലെത്തിക്കാന് കോളനി നിവാസികള് പൊലീസിന്റെ സഹായം തേടിയത് ഇന്നലെ ഉച്ചയോടെയാണ്. കോളനിയിലെ പുരുഷന്മാര് 5 കിലോമീറ്ററോളം കാട്ടിലൂടെ കാഞ്ചനയെ തുണിയില് ചുമന്ന് വൈകിട്ട് നാലോടെ ഇരുട്ടുകുത്തിക്കടവിലെത്തിച്ചു. കഴിഞ്ഞ പ്രളയത്തില് തകര്ന്ന പാലം പുനര്നിര്മിക്കാത്തതിനാല് ചാലിയാറിന് അക്കരെയെത്തിക്കാന് അഗ്നിരക്ഷാസേനയുടെ ബോട്ടിനെ ആശ്രയിക്കേണ്ടി വന്നു.
നാലോടെ ഇരുട്ടുകുത്തിക്കടവിലെത്തിച്ച യുവതിയെ വൈകിട്ട് അഞ്ചരയോടെയാണ് നിലമ്പൂര് ജില്ലാ ആശുപത്രിയിലെത്തിക്കാനായത്. പിന്നീട്, മഞ്ചേരി മെഡിക്കല് കോളജ് ആശുപത്രിയിലേക്കു മാറ്റി. യുവതിയുടെ ആരോഗ്യനില തൃപ്തികരമാണെന്ന് ആശുപത്രി അധികൃതര് അറിയിച്ചു.
പാലം ഇല്ലാത്തതിനാല് ആശുപത്രിയിലെത്തിക്കാന് വൈകിയതുമൂലം, അരക്കിലോമീറ്റര് അകലെയുള്ള മറ്റൊരു ആദിവാസി കോളനിയായ വാണിയംപുഴയിലെ യുവതി കഴിഞ്ഞ ജൂണ് 27-ന് ചാലിയാറിന്റെ തീരത്തു പ്രസവിച്ചിരുന്നു.
https://www.facebook.com/Malayalivartha