ലോകത്തെ ഏറ്റവും മനോഹരമായ കാഴ്ചകളിൽ ഒന്നാണ് പ്രകൃതിയിൽ പിങ്ക് നിറത്തിന്റെ പരവതാനി വിരിച്ച് ചെറിപ്പൂക്കൾ കൂട്ടത്തോടെ പൂക്കുന്ന ജപ്പാനിലെ ചെറി ബ്ലോസം സീസൺ. പ്രതിവർഷം ലക്ഷക്കണക്കിന് സഞ്ചാരികളാണ് ചെറി പൂക്കൾ വിടരുന്നത് കാണാൻ ജപ്പാനിലേക്ക് ഒഴുകിയെത്തുന്നത്.

ജപ്പാനിൽ വസന്തകാലത്താണ് ചെറി ബ്ലോസം സീസൺ ആരംഭിക്കുന്നത്. എന്നാൽ, ഇത്തവണ പതിവ് തെറ്റിച്ച് നേരത്തെ എത്തിയിരിക്കുകയാണ് ചെറി വസന്തം.

തീവ്രതയേറിയ ചൂടോട് കൂടി വസന്തകാലം നേരത്തെ എത്തിയതാണ് ഇതിന് കാരണം. 12,09 വർഷങ്ങൾക്ക് ശേഷം ഇതാദ്യമായാണ് ഇത്രയും നേരത്തെ ചെറി ബ്ലോസം സീസൺ എത്തുന്നത്. സാധാരണ മാർച്ചിൽ സാവധാനത്തിൽ മൊട്ടിട്ട് ഏപ്രിൽ മധ്യത്തോടെയാണ് ചെറി ബ്ലോസം സീസൺ പാരമ്യത്തിലെത്തുന്നത്.

എന്നാൽ ഇത്തവണ ഫെബ്രുവരിയിൽ തന്നെയെത്തിയ ചെറിപ്പൂക്കൾ മാർച്ച് 26ന് അതിന്റെ വളർച്ചയുടെ പാരമ്യത്തിലെത്തിയതായി ജാപ്പനീസ് അധികൃതർ വ്യക്തമാക്കുന്നു. എ.ഡി 812ലാണ് അവസാനമായി ഇങ്ങനെ സംഭവിച്ചത്.

ചെറി വസന്തം 1200 വർഷങ്ങൾക്ക് ശേഷം ഇത്രയും നേരത്തെ എത്താൻ കാരണം കാലാവസ്ഥാ വ്യതിയാനമാണ്. ജപ്പാനിൽ ചെറി ബ്ലോസം ഏറ്റവും കൂടുതൽ കാണുന്ന ക്യോട്ടോ മേഖലയിൽ കഴിഞ്ഞ കുറച്ച് വർഷങ്ങളായി വേനൽക്കാലത്തെ താപനില കുത്തനെ കൂടുകയാണ്.

പതിവിലും നേരത്തെയെത്തിയ വേനലും കടുത്ത ചൂടും ആഗോള താപനത്തിന്റെ ഫലമാണെന്ന് വിദഗ്ദ്ധർ ചൂണ്ടിക്കാണിക്കുന്നുണ്ട്.

കാലാവസ്ഥാ വ്യതിയാനം വരും വർഷങ്ങളിൽ സസ്യങ്ങളെയും ജീവികളെയും ഗുരുതരമായി ബാധിക്കുമെന്ന് ഗവേഷകർ പറയുന്നു. അടുത്ത 50 വർഷത്തിനുള്ളിൽ തന്നെ ഭൂമിയിലെ സസ്യ ജന്തു ജാലങ്ങളിൽ മൂന്നിൽ ഒരു സ്പീഷിസിനെ വംശനാശത്തിന്റെ 

വക്കിലെത്തിക്കാൻ വരെ കാലാവസ്ഥാ വ്യതിയാനം കാരണമായേക്കാമെന്ന് ശാസ്ത്രലോകം മുന്നറിയിപ്പ് നൽകുന്നു. നമ്മുടെ നാട്ടിൽ കൊന്ന പൂക്കുന്നതും പലപ്പോഴും ഇതു പോലെ കാലം തെറ്റിയാണ്. കാലാവസ്ഥാ വ്യതിയാനമാണ് അതിനും കാരണം.