പാക്ക് ക്രിക്കറ്റ് താരങ്ങള്‍ക്ക് ബിരിയാണി വിലക്കി പരിശീലകനും ചീഫ് സിലക്ടറുമായ മിസ്ബാ ഉല്‍ ഹഖ്
പുതിയ പരിശീലകനും ചീഫ് സിലക്ടറുമായ മിസ്ബാ ഉല്‍ ഹഖ് പാക്കിസ്ഥാനിലെ ക്രിക്കറ്റ് താരങ്ങള്‍ക്ക് ഭക്ഷണ നിയന്ത്രണം ഏര്‍പ്പെടുത്തുന്നു. ആഭ്യന്തര ടൂര്‍ണമെന്റുകള്‍ക്ക് ഇറങ്ങുന്ന താരങ്ങളും ദേശീയ ക്യാംപിലുള്ളവരും ഇനി മുതല്‍ ബിരിയാണിയും മധുരമുള്ള വിഭവങ്ങളും കഴിക്കാന്‍ പാടില്ലെന്നു മുന്‍ ക്യാപ്റ്റന്‍ കൂടിയായ താരം നിര്‍ദേശം നല്‍കി. ഇതുള്‍പ്പെടെ താരങ്ങളുടെ ആരോഗ്യ പരിപാലനത്തിന് കര്‍ശന നിയന്ത്രണങ്ങള്‍ ഉള്‍പ്പെടുന്ന പുതിയ ക്രമീകരണങ്ങളും ഏര്‍പ്പെടുത്തിയിട്ടുണ്ട്.
പഴവര്‍ഗങ്ങള്‍ കൂടുതലായി കഴിക്കണം. എണ്ണയില്‍ വറുത്ത മാംസവിഭവങ്ങള്‍ ഒഴിവാക്കണമെന്നാണ് നിര്‍ദ്ദേശം. അതേസമയം ബാര്‍ബിക്യൂ വിഭവങ്ങള്‍ക്കു നിയന്ത്രണമില്ല. ദേശീയ ടീമിലേക്കെത്താന്‍ മികച്ച ശരീരക്ഷമത വേണമെന്നതിനാലാണു നിയന്ത്രണമെന്നു മിസ്ബാ പറഞ്ഞു.
ദേശീയ ടീമിനൊപ്പമല്ലാത്തപ്പോള്‍ ഇഷ്ടമുള്ള ഭക്ഷണങ്ങള്‍ കഴിക്കുന്നതായിരുന്നു പാക്ക് താരങ്ങളുടെ ഇതുവരെയുള്ള ശീലമെങ്കില്‍, അതെല്ലാം മാറ്റിമറിക്കുന്നതാണ് മിസ്ബയുടെ ഇടപെടല്‍. പൊതുവെ ഭക്ഷണപ്രിയരായ പാക്കിസ്ഥാന്‍ താരങ്ങള്‍ ജങ്ക് ഫുഡിനോടും എണ്ണ വിഭവങ്ങളോടും ഇഷ്ടമുള്ളവരാണ്. തന്റെ നിര്‍ദ്ദേശങ്ങളോടു മുഖം തിരിക്കുന്നവരെ ദേശീയ ടീമിലേക്കു പരിഗണിക്കുക പോലുമില്ലെന്നാണ് പരിശീലകനു പുറമെ സിലക്ഷന്‍ കമ്മിറ്റി ചെയര്‍മാനുമായ മിസ്ബയുടെ നിലപാട്.
43-ാം വയസ്സു വരെ രാജ്യാന്തര ക്രിക്കറ്റില്‍ സജീവമായിരുന്ന മിസ്ബ, വിരമിക്കല്‍ പ്രഖ്യാപിച്ച് വെറും രണ്ടു വര്‍ഷങ്ങള്‍ക്കുള്ളിലാണ് ദേശീയ ടീം പരിശീലകനായി നിയമിക്കപ്പെട്ടത്. ദേശീയ ടീമിലേക്കു താരങ്ങളെ തിരഞ്ഞെടുക്കുന്ന സിലക്ഷന്‍ കമ്മിറ്റി ചെയര്‍മാന്‍ കൂടിയായതിനാല്‍ ഇരട്ടി കരുത്തോടെയാണ് താരത്തിന്റെ രണ്ടാം വരവ്. ഏകദിന ലോകകപ്പിലെ മോശം പ്രകടനത്തെ തുടര്‍ന്ന് പരിശീലകനായിരുന്ന മിക്കി ആര്‍തറിന് കാലാവധി നീട്ടി നല്‍കേണ്ടതില്ലെന്ന് പാക്ക് ക്രിക്കറ്റ് ബോര്‍ഡ് തീരുമാനിച്ചിരുന്നു.
https://www.facebook.com/Malayalivartha
