ബിസിസിഐ നോട്ടിസിനെ തുടര്ന്ന് ദിനേഷ് കാര്ത്തിക്ക് നിരുപാധികം മാപ്പു പറഞ്ഞു
കരീബിയന് പ്രീമിയര് ലീഗ് (സിപിഎല്) മല്സരം കാണാന് പോയത് ഇന്ത്യന് താരം ദിനേഷ് കാര്ത്തിക്കിന് പുലിവാലായി. മുന്കൂര് അനുമതി വാങ്ങാതെ സ്വകാര്യ ട്വന്റി20 ലീഗ് മല്സരം കാണാന് പോയതിന് ഇന്ത്യന് ക്രിക്കറ്റ് കണ്ട്രോള് ബോര്ഡ് (ബിസിസിഐ) കാര്ത്തിക്കിന് കാരണം കാണിക്കല് നോട്ടിസ് അയച്ചു. ബിസിസിഐയുമായുള്ള കരാര് റദ്ദാക്കാതിരിക്കാന് എന്തു ന്യായമാണുള്ളതെന്ന് വിശദീകരണം നല്കാനാണ് നിര്ദ്ദേശം.
ബോളിവുഡ് താരം ഷാരൂഖ് ഖാന്റെ ഉടമസ്ഥതയിലുള്ള ട്രിന്ബാഗോ നൈറ്റ് റൈഡേഴ്സിന്റെ മല്സരം കാണാന് കാര്ത്തിക് വിന്ഡീസില് പോയിരുന്നു. ട്രിന്ബാഗോ നൈറ്റ് റൈഡേഴ്സിന്റെ ജഴ്സിയുമണിഞ്ഞ് ഡ്രസിങ് റൂമിലിരുന്ന് കളി കണ്ടതിനെ തുടര്ന്നാണ് ബിസിസിഐ താരത്തിന് നോട്ടിസ് അയച്ചത്.
ബിസിസിഐയുമായി കരാറുള്ള താരങ്ങള്ക്ക് വിദേശ ലീഗുകളില് പങ്കെടുക്കുന്നതിനും അവരുമായി സഹകരിക്കുന്നതിനും വിലക്കുണ്ട്. മല്സരം കാണാന് പോകണമെങ്കില് പോലും ബിസിസിഐയുടെ അനുവാദം വേണമെന്നാണ് കരാര് വ്യവസ്ഥ. ഇതു ലംഘിച്ചതാണ് താരത്തിന് തിരിച്ചടിയായത്.
ഇന്ത്യയ്ക്കായി 26 ടെസ്റ്റുകളും 94 ഏകദിനങ്ങളും കളിച്ചിട്ടുള്ള കാര്ത്തിക്, ഇക്കഴിഞ്ഞ ഏകദിന ലോകകപ്പ് ടീമിലും അംഗമായിരുന്നു. എന്നാല്, സംഭവിച്ചുപോയ പിഴവിന് കാര്ത്തിക് നിരുപാധികം മാപ്പിരന്നു. അതിനാല് താരത്തിനെതിരെ നടപടി വേണ്ടെന്ന് ബിസിസിഐ തീരുമാനിച്ചു. കാര്ത്തിക്കിന്റെ ക്ഷമാപണം ബോര്ഡ് സ്വീകരിച്ചതായും ഈ സംഭവം അടഞ്ഞ അധ്യായമാണെന്നും ബോര്ഡ് അധികൃതര് വ്യക്തമാക്കി.
ഇന്ത്യന് പ്രീമിയര് ലീഗിലെ (ഐപിഎല്) കൊല്ക്കത്ത നൈറ്റ് റൈഡേഴ്സിന്റെ ഉടമസ്ഥരാണ് സിപിഎല്ലിലെ ട്രിന്ബാഗോ നൈറ്റ് റൈഡേഴ്സിന്റെയും ഉടമസ്ഥര്. കൊല്ക്കത്ത ക്യാപ്റ്റനായ കാര്ത്തിക്, ഈ ബന്ധത്തിന്റെ അടിസ്ഥാനത്തിലാണ് കരീബിയന് പ്രീമിയര് ലീഗ് മല്സരം കാണാന് വിന്ഡീസില് പോയത്. പരിശീലകന് ബ്രണ്ടന് മക്കല്ലത്തിന്റെ ക്ഷണപ്രകാരമാണ് വിന്ഡീസിലേക്കു പോയതെന്നും അദ്ദേഹത്തിന്റെ നിര്ദ്ദേശപ്രകാരമാണ് ട്രിന്ബാഗോ ജഴ്സിയണിഞ്ഞ് കളി കണ്ടതെന്നും കാര്ത്തിക് ബോര്ഡിനു നല്കിയ മറുപടിയില് വ്യക്തമാക്കിയിരുന്നു.
https://www.facebook.com/Malayalivartha